| ← 2Chronicles (17/36) → |
| 1. | A naupa Jehosafat chun a lalna chu a hung hluo a, Israelhai do thei dingin a ngirhmun a suknghet a. |
| 2. | Judai rama kul nei khuo po poah vengtu sipai a sie a, Judai ram le a pa Asa lo lak Efraim rama khuoa hai chun sipai hmunpui a sie vong bok a. |
| 3. | Jehosafat chun a hung inlal tir lai chun a thlatu Davida kalchawi dan a zui a, Baal a biek naw leiin a kuomah LALPA a um a. |
| 4. | Israel lalhai ching dan zui ve loin an pi le puhai Pathien a zong a, a thupekhai a zawm a. |
| 5. | Chuleiin, a ram chu ama enkolna hnuoiah LALPAN a suknghet a, Judai rama mi po poin thilpek an hung pek a, hausain a hung ropui ta hle a. |
| 6. | A lungril chu LALPA lampui tieng a thle a, Judai ram hmun sanga bawlhmun po po chu a thiek a, Ashera lem thinghai chu a phur thluk vong bok a. |
| 7. | A hung inlala inthoka kum thumnaa chun a thoktu Ben-Hail hai, Obadia hai, Zekaria hai, Nathanel hai le Mikaia hai chu Judai ram khuoa mihai inchuktir dingin a tir suok a; |
| 8. | chuonghai chu Levi chia mi Semaia hai, Nethania hai, Zebadia hai, Asahel hai, Semiramot hai, Jehonathan hai, Adonija hai, Tobija hai le Tob-Adonija hai bakah thiempu Elisama le Jehoram haiin an zui a. |
| 9. | LALPA Dan Bu chawiin Judai rama khaw tin an sir a, mihai an inchuktir a. |
| 10. | Judai ram vela ram dang po po chun LALPA an ti leiin tu khomin Jehosafat chu an do ngam nawh. |
| 11. | Filistin mi thenkhatin Jehosafat chu thilpek an hung inhlan a, a thenin sie dingin tangkaruo an hung chawi a; Arab mihai khomin ran ruol, beramchal sangsari le zasari le kelchal sangsari le zasari an hung pek bok a. |
| 12. | Jehosafat chu a hung ropui deu deu a, Judai rama chun kul le thil siekhawmna khuohai a bawl a, |
| 13. | Judai ram khuoa hai chun fak ding a sek khawm teu a. Jerusalemah ral do thiem mi a sie teu bok a. |
| 14. | A chi chiin mani chi hotu an nei a, Juda thlahai laia sipai sangkhat pei inrawituhai chunga kawmandarhai chu Adna a na, mi nuoithum chunga kawmandar a nih. |
| 15. | A dottu chu Jehohanan a na, sipai nuoihni le singriet chunga kawmandar a nih. |
| 16. | A pathumna chu LALPA rongbawltu dinga ama thu ngota inpe Zikri naupa Amasia a na, sipai nuoihni chunga kawmandar a nih. |
| 17. | Benjamin sungkuoa inthok chun, sipai huoisen Eliada, thal le phaw chawi mi nuoihni chunga kawmandar le |
| 18. | Jehozabad, indo dinga inralthuom sa mi nuoikhat le singriet chunga kawmandar hai an nih. Hienghai hi Judai ram sunga kul nei khaw hrang hranga sipai a siehai baka lal kuoma umhai chu an nih. |
| 19. | (A um nawh) |
| ← 2Chronicles (17/36) → |