←  2Chronicles (15/36)  →
1. Oded naupa Azaria chungah Pathien thlarau a hung tlung a.
2. Asa hmuok dingin a suok a, a kuomah, "Asa le Juda mi po po le Benjamin mi po po hai, mi lo ngaithla ro. Amaa in um sung po nangniah LALPA khom um a tih. In zong chun ama chu hmung in ta, in inphatsan chun inphatsan veng a ti cheu.
3. Israelhai chu Pathien tak be loin hun sawt tak an khawsa a, zirtirtu ding thiempu an nei naw a, dan khom an hriet bok nawh.
4. Amiruokchu, an beidongin LALPA, Israel Pathien tieng an ngha a, an zong a, ama chu an hmu a.
5. Chuong hun lai chun a ram chu buoina runpuiin a chim leiin inzin suok ngamna khom a ni nawh.
6. Hnam le hnam, khuo le khuo an insuksiet rem rum a, an chungah beidongna chi tinreng Pathienin a'n tlungtir a nih.
7. Nangni ruok chu hrat takin um unla, inthlada naw ro, in thilthaw ra chu in hmu ding a ni si a" a ta.
8. Chuong thuhai le zawlnei Oded naupa Azaria thu hrilhai Asa-in a hriet chun a sukhuoi pha a, Judai ram le Benjamin ram po po le Efraim tlangrama khuo an lak po poa inthok chun thil tirdakum mi lemhai chu a'n thiel fai vong a. LALPA Tempul tuola maicham chu a siem tha a.
9. LALPA chun a umpui ti an hrietin Israel rama inthokin mi tam takin an hung bel a. Asa chun Judai ram le Benjamin rama mihai le anni laia cheng Efraim le Manase le Simeon mihai chu a ko khawm a,
10. a hung inlala inthoka kum sawm le kum ngana, a thla thumnaa chun Jerusalemah an hung pung khawm a.
11. Chu ni chun an rallak bawngchal zasari le beram le kel sangsariin LALPA kuomah an inthawi a.
12. Lungril po po le thlarau po poa LALPA, an pi le puhai Pathien chu zong dingin thu an thlung a.
13. LALPA, Israelhai Pathien zong lo chu a chin a lien, nuhmei pasal tu khom sukhlum dingin thu an thlung bok a.
14. LALPA kuomah rawl inring taka khekin, tawtawrawt le beram ki mutin, intiemkamna thu chu an insam a.
15. Titakzeta intiemkamna thu an thlung tlang leiin Judai ram mihai chu an lawm hle a, thahnemngai takin LALPA chu an zong a, hmu khom an hmu hrim a, LALPA chun kil tinah hadamna a pek a.
16. Lal Asa chun a pi Maaka khom chu Asera lem tirdakum tak thing an kertir leiin lalnu a nina a hlippek a. Asa chun a milem siem chu a phur thluk a, a sat nawi vong a, Kidron vadungah a raw a.
17. Israel rama inthokin hmun sanghai chu inthiel fai zo naw sienkhom Asa lungril chu a dam sungin LALPA chungah a ringum a nih.
18. A pain Pathien kuoma a lo inhlan tah leh ama lo inhlan tah tangkaruo le rangkachak le bur le belhai po po chu Pathien tempulah a lak lut a.
19. Asa inlal hun kum sawmthum le kum nga sungin indo hrim hrim a um nawk ta nawh.
←  2Chronicles (15/36)  →