←  2Chronicles (13/36)  →
1. Israel lal Jeroboam inlala inthoka kum sawm le kum rieta chun Abija chu Judahai chunga lalah a hung um a.
2. Jerusalemah kum thum a'n lal a, a nu hming chu Maaka a na, Gibea khaw mi Uriel naunu a nih. Abija le Jeroboam chu an indo a.
3. Abija chun indo mi, sipai huoisen thlang khawm nuoi li leh a va bei a, Jeroboam chun mi hrat thlang khawm nuoi riet leh thang a lo khaw a.
4. Abija chu Efraim tlang rama Zemaraim tlangah a ngir a, "Aw Jeroboam le Israel mi po pohai, lo ngaithla ro.
5. LALPA, Israel Pathien chun Israel ram chu Davida le a thlahai kuomah machi thuthlunge thlungin kumkhuoa dingin a pek tah ti in hriet naw am a ni?
6. Chuong sa khom chun Nebat naupa Jeroboam, Davida naupa Solomon siehlaw chu a pu chungah a lo hel el ta hi!
7. Solomon naupa Rehoboam chu naupang dawng a la ni lai le a la do hne tawl hmain ama kal zawngin Jeroboam chun mi hmangna bo ruol a'n pung khawm a.
8. Tu khom hin Davida thlahai kuta um LALPA ram chu do dingin in inpuocha a, sipai khom in hau hle a, Jeroboamin in pathien dinga a siempek cheu bawngte lemhai khom in kuomah a um a.
9. LALPA thiempu, Aron nauhai le Levi-hai chu hnot suokin, ram dang mihai thaw danin thiempu in insiem chop a ni naw am a ni? Bawngchal tuoi le beramchal pasari chawia hung inhlan taphothai chu pathien ni hrim hrim lohai thiempuah in lo siem thei pei a ni khah.
10. "Keini Pathien ruok chu LALPA a na, ama chu kan inphatsan naw a, LALPA rongbawltu thiempuhai khom Aron naupahai le anni thangpuitu Levihai an nih.
11. Ni tin zing tieng le zan tieng pumraw thilhlan le rimtui thilhlan LALPA kuomah an inhlan a; dawkan thienghlimah bei an sie diem a, zan tieng zatin rangkachak khawnvar sienaa khawnvarhai chu an insit a. Keini chun LALPA kan Pathien thupek chu kan zawm zing a, nangni ruok chun ama chu in nghatsan ta si a.
12. Ngai ta u, Pathien chu kan kuomah a um a, ama chu mi thuoitu a nih. A thiempuhai chun nangni dona dingin tawtawrawt mut an tih. Israel mihai, in pi le puhai Pathien LALPA chu kalin do naw ro, hmuingil naw top in tih" a ta.
13. Nisienlakhom Jeroboam chun an hnung tienga inchantu sipai a sie a, ama chu Judahai hma tieng chun a um a.
14. Judahai an hang ngha kir chun hnung tieng le hma tieng ralin an inhuol an hmu a, chuongchun LALPA chu koin thiempuhai chun tawtawrawt an mut a.
15. Judahai chu an khek dur dur a, an khek ruol chun Abija le Judahai hmaah Pathienin Jeroboam le Israel mihai po po chu a suktlawm a.
16. Judahai hmaa chun Israelhai chu an tlansie a, Pathienin an kutah a pek a.
17. Abija le a mihai chun an that teu a, Israel sipai tha tha nuoinga an that a nih.
18. Chu tum chun Israel mihai chu an tlawm a; LALPA, an pi le puhai Pathiena an innghat leiin Judahai chun hnena an chang a nih.
19. Abija chun Jeroboam chu a hnot a, Bethel khuo hai, Jesana khuo hai, Efron khuo hai le an khawperhai chu a lakpek a.
20. Abija inlal sungin Jeroboam chu a ngir suok nawk ta nawh. LALPAN a hrem a, a thi a.
21. Abija ruok chu a hung hrat deu deu a. Nuhmei sawm le pali a nei a, naupa sawmhni le pahni le naunu sawm le paruk a nei a.
22. Abija chanchin danghai, a thilthawhai le a thil hrilhai chu zawlnei Iddo ziek chanchin inchiknaah a chuong.
←  2Chronicles (13/36)  →