← 2Chronicles (12/36) → |
1. | Rehoboam chu a hung inlal nghet phing leh ama tienga thang Israelhai po po leh LALPA dan an nghatsan ta a. |
2. | LALPA chungah an ringum naw leiin lal Rehoboam inlala inthoka kum nganaa chun Aigupta lal Sisak-in Jerusalem a hung run a. |
3. | Sisak chun sakor-tawlailir sang le indo sakor singruk le Libya mi hai, Suki mihai le Kushd mihai, tiem seng loa tam chu Aiguptaa inthokin a hung thuoi a, |
4. | Judai rama kula inhuon khuohai chu a lak a, Jerusalem chen a hang tlung a. |
5. | Rehoboam le Juda hnama lukhaituhai, Sisak an ti leia Jerusalema pungkhawmhai kuoma chun zawlnei Semaia a hang fe a, an kuomah, "LALPA chun hieng hin a hril: 'In mi nghatsan a, chuleiin kei khomin Sisak kutah ka maksan ve ta cheu a nih' a tih" tiin a hril a. |
6. | Israel lal le an lukhaituhai chu inpha hnuoiin, "LALPA chu a'n dik a nih" an ta. |
7. | An inpha hnuoi ti LALPAN a hmu chun LALPA thu chu Semaia kuomah a hung tlung a, "An inpha hnuoi leiin anni chu sukse loin intlan suok vat tawl ka tih. Sisak hmangin Jerusalem chungah ka lungsenna bun thla ta naw ning. |
8. | Amiruokchu, ka rongbawl le hnuoi lalhai rongbawl indanglamzie an hriet theina dingin Sisak thu hnuoiah sie tawl ka tih" a ta. |
9. | Aigupta lal Sisak chun Jerusalem chu a bei a, LALPA tempul le lal ina rosum po po chu a lak fai vong a, Solomon siem rangkachak phawhai po po khom a lak bok a. |
10. | Lal Rehoboam chun a aiin dar phaw a siem a, lal in kot vengtu kawmandarhai chu a'n koltir a. |
11. | LALPA tempulah lal a fe pha leh vengtuhai chun dar phaw chu an chawi a, an hung kir pha leh vengtuhai pindana a siena hmuna chun an thak kir nawk hlak a. |
12. | Rehoboam inpha hnuoi lei chun LALPAN a lungsenna a lak kieng a, a suksiet vong ta naw a, Judai ram chu a tha tluong pei a. |
13. | Lal Rehoboam chu Jerusalemah inlal zom peiin a'n suknghet pei a. Kum sawmli le kum khat a ni kuma inlal tanin, LALPAN a hming umna dinga Israel hnam po pohai hmun laia a thlang bik khuo Jerusalema chun kum sawm le kum sari a'n lal a, a nu hming chu Naama a na, Amon mi a nih. |
14. | LALPA tieng lungril a pek naw leiin thil suol a thaw a. |
15. | Rehoboam inlal sunga thil tlunghai, a bula inthoka a tawp chen chu zawlnei Semaia ziek le zawlnei Ido zieka inthla sawng dan chanchin an suinaah a chuong. Rehoboam le Jeroboam chu an indo zing zing hlak a. |
16. | Chun, Rehoboam chu a pi le puhai kuomah a chawl a, Davida khuoah an phum a, a naupa Abija-in a lalna chu a hung hluo ta a. |
← 2Chronicles (12/36) → |