2Chronicles (1/36)  →
1. Davida naupa Solomon kuoma chun LALPA a Pathien a um leiin a lalna chu a ram sungah a suknghet a, nasa takin a sukropui a.
2. Solomon chun Israelhai po po, sipai sang chunga kawmandarhai le za chunga kawmandarhai, roreltuhai, Israel pahnam tina thuoituhai le sungkuo tina lukhaituhai chu a ko khawm a.
3. Pungkhawmhai po po chu Gibeon hmun sangah a thuoi tung a, chu taka chun LALPA siehlaw Mosiein thlalera a siem biekbuk, Intuokna Puon in kha a la um a.
4. Pathien Bawm ruok chu Kiriat Jearim-a inthokin Jerusalemah an lak tung ta a, a siena dinga Davida buotsai puon ina chun an sie a.
5. Amiruokchu, Hura naupa Uri naupa Bezalel siem dar maicham chu Gibeon-a biekbuk hmaa chun a la um zing leiin, Pathien rawn dingin Solomonin chu hmun chu a panpui tawl a nih.
6. Intuokna Puon in hmaia um dar maichama chun Solomon chu LALPA hmaah a hang fe a, maichama chun pumraw thilhlan sangkhat a hang inhlan a.
7. Chu zan chun Solomon kuomah Pathien a hung inlar a, a kuomah, "I dit dit mi hni rawh, peng ka ti che" a ta.
8. Solomon chun Pathien kuomah, "Ka pa Davida kuoma khan lunginsietna nasa tak i'n langtir a, ama hmunah lalin i mi lo sie ta a.
9. Aw LALPA Pathien, pilvut anga tam mipuihai chunga roreltuah i mi sie ta si hin chu, ka pa Davida kuoma i thu tiem kha sukpuitling rawh.
10. Hi mihai hi ka thuoi theina dingin varna le hrietna mi pe rawh. Chuong naw chun i mi hieng zozaihai ro hi tuin am relpek thei an ta?" a ta.
11. Pathien chun Solomon kuomah, "Hieng ang lungril hi put a, sum le pai dam, hausakna dam, chawimawina dam le i hmelmahai thina ding dam hni lo a, dam sawtna hai khom hni bok lo a, an chunga lala ka siena che ka mihai ro i relpek theina dinga varna le hrietna i mi hni lem leiin,
12. varna le hrietna ka pek che bakah i hma le i hnunga lal tu khomin an nei d�r lo ding sum le pai hai, hausakna hai le chawimawina hai pe sa bok ka ti che" a ta.
13. Chuongchun, biekbuk umna Gibeon hmun sanga inthokin Solomon chu Jerusalem tieng a kir nawk a, Israelhai chungah ro a rel a.
14. Solomon chun sakor-tawlailir sangkhat le zali le indona sakor singkhat le sanghni a nei a, chuonghai chu tawlailir sie khawmna khawpui hrang hrangah a sie a, a then Jerusalemah a kol a.
15. A'n lal sung hin Jerusalemah tangkaruo le rangkachak chu lung ang elin a bum hner hnur a; sidar thing khom phai thuta theichang bil ang hiela ngai thei khopin a hau a nih.
16. Solomon sakorhai chu Aigupta le Kilikia a inthokin lal aiawa sumdawnghai chun an inchawk suok hlak a.
17. Aigupta rama inthoka an inchawkhai chu tawlailir pakhat peiah tangkaruo shekel zaruk, sakor pakhat peiah tangruo shekel za le sawmnga an pek a. Anni chun Hit lalhai le Aram lalhai kuomah an zor sawng hlak.
      2Chronicles (1/36)  →