←  1Timothy (6/6)    
1. Bawi ringkol battuhai chun an puhai chu kong iengkimah an inza ding a nih, chuong naw chun Pathien hming le ei thu inchuktir hi hrilse hlauh rawi an tih.
2. Bawi tu khomin a pu chu kristien a ni lei le ringnaa unau a ni lei sekin a ngaitha ding a ni naw a, tha nawk zuolin rong a bawlpek lem ding a nih; a rongbawlpekhai leh ringna le hmangainaah sung khat an ni si a. Hieng thuhai hi inchuktirin infui tawl rawh.
3. Tu khom ei Lalpa Isu Krista thucha le sakhaw zirtirna thu kal zawnga thuring indik lo inchuktirtu chu,
4. ama chu mi uongthuong tak, ieng khom hre si lo, insel inhalna ding thu se tak tak chok suok thiem mi a nih. Chu chun inhnarna hai, innghirnghona hai, inhrilsietna hai le inringhlelna tha lo hai chok suok thei thila insel inhal zing zingna ding thu se tak tak a hung intlun bakah,
5. lungril se tawng tah, thutak man phak ta lo hrim hrim le sakhuo hi sumdawngnaa hmang tumtuhai lai inhalna a hung intlun bok a nih.
6. Lungawina neituhai ta ding ruok chun sakhaw mi ni hi hlawkna ropui tak a nih.
7. Khawvela hin ieng khom ei lutpui naw a, ieng khom ei suokpui thei bok nawh.
8. Chuleiin, fak le dawn le sil le bil ding ei nei phot chun lungawi ei tiu.
9. Hausak nuomtuhai ruok chu thlemnaah an lut a, chakna invetthlak le tiumah an inawk a, sietna le bohmangna khurah an tlu lut hlak.
10. Tangka sum ngainat hi suol tinreng bul a nih. Sum hau tumna luotah thenkhat chun ringna hi an nghatsan a, lungngaina tam takin an lung a sun tlang hlak.
11. Sienkhom nang, Pathien mi, chuonghai chu tlansan rawh. Felna dam, Pathien ngaisakna dam, ringna dam, hmangaina dam, dawtheina dam le zainemna dam nei tum tlat lem rawh.
12. Ringnaa intlansiekna tha chu bei tang tang rawh. Chatuon hringna chu chel tlat rawh; chu chu chang dinga ko i ni thu khom hretu tam tak hmaah i puong ta kha.
13. Iengkim hringna hnar, Pathien le Krista Isu, Pontia Pilat hmaa ti hlek loa thudik tan tlattu mit hmuah chun hi thu hi ka pek che:
14. Ei Lalpa Isu Krista a hung inlang nawk hma khat chu ka thupek hi soisel le dem kai loin vong tlat rawh.
15. Inpak phu Pathien, iengkim chunga thuneitu um sun, laltakhai Laltak, lalhai Lal chun a hun takah Krista chu a hung inlangtir ding a ni si a.
16. Ama chauh hi thi thei lo, hnai ruol lo vara cheng, tu khom la hmu lo le hmu thei ni bok lo chu a nih. A kuomah chawimawina le thilthawtheina chu chatuonin um raw se. Amen.
17. Khawvel mi hausahai chu chapo lo dingin hril la, ring tlak lo sumah innghat lo a, ei chen dinga iengkim hnienghnar taka mi petu Pathienah innghat lem dingin infui tawl rawh.
18. Thil tha thaw ding dam, thil tha thawa hausa ding dam, phal taka mi danghai sem ve ching ding damin infui bok rawh.
19. Chuongchun, nakie phaa an innghatna ding ro hlu tam tak an inkhawl khawm ning a ta, hringna tak tak chu chang thei an tih.
20. Aw Timothe, mawphurna dandea i um kha vong tha rawh. Sakhaw mi lohaiin indik lo taka 'Hrietna' tia an ko chu hmanga inselkalna laka inthok chun inthier fihlim rawh;
21. thenkhatin anni thu chu an khukpui a, ringna lampuia inthokin an pet hmang tah a nih. Pathien lunginsietna i kuomah um raw se.
←  1Timothy (6/6)