← 1Timothy (4/6) → |
1. | Hun nuhnunga hai chun mihaiin ringna thu hi bansanin, hlemtu thlarau le ramhuoia inthoka suok zirtirna indik naw chu la zui an tih ti chieng takin Thlarauin a hril a. |
2. | Chuong ang zirtirna thu the dartuhai chu khela mi lemder thiem an ni a, an sie le tha hrietna khom thir linga dep angin a kang char tah. |
3. | Mi innei ding dam an khap a; mihriem fak dinga Pathien siem thil thenkhat, thutak hrea pomtuhaiin lawmthu hril puma fak el ding a nih ti an hriet chu, fak an khap bok a. |
4. | Pathien thilsiem taphot hi a tha vong a, ieng khom hnawl ding a ni nawh. |
5. | Pathien thu le tongtainaa inhlan thienghlim ta chu lawmthu hril puma dong el ding a nih. |
6. | Hieng thuhai hi unauhai kuomah hril la, Krista Isu rongbawltu tha ning i tih; ringna thu le inzirtirna tha i zawm hlakhai khan thlarau tieng inthang lientir pei bok a ti che. |
7. | Pathien thu le inzom lo thusim le pitarhai tienami mei mei chu nghatsan la, Pathien mi ni dingin insawizoi rawh. |
8. | Taksa sawizoi hi iemani chenah a tangkai ngei a, sienkhom Pathien ngaisak mi ni hi iengkimah a hlu lem a, hi dam sung nun le la hung um dinga thil tangkai a nih. |
9. | Hi thu hi a'n dik a, pom tlak a nih. |
10. | Pathien hring chu ei beisei innghatna a ni tak leiin sin ei thaw inrimin hma ei nor nasa a nih. Ama chu mi po po ta dinga sandamtu a na, a ringtuhai ta dingin a ni nawkzuol. |
11. | Hieng thuhai hi pein inchuktir pei rawh. |
12. | I naupang leiin tu khomin ngainep naw raw hai se che. Thuhril konga dam, chetziea dam, hmangainaa dam, ringnaa dam, thienghlimnaa dam ringtuhai enton tlak ni ngei rawh. |
13. | Ka hung hma po chu vantlang laia Pathien thu tiem tienga dam, thuhril tienga dam le zirtir tienga dam inhmang rawh. |
14. | Upahaiin i chungah kut an innghat tuma zawlneihaiin an puong, thlarau tienga i thilpek donghai kha ngaitha naw rawh. |
15. | Chuong tienga chun taima takin inhmang la, i pumin inpe la, mi tinin i hmasawnzie hmu thei an tih. |
16. | I khawsak le i thil inchuktirah inveng fimkhur la, chuonga i thaw fan fan chun nang le i thu hretuhai chu san himin um in tih. |
← 1Timothy (4/6) → |