←  1Timothy (2/6)  →

---

1.

Ka thu incha nuom hmasa tak che chu thil hnina dam, tongtaina dam, hnipekna dam le lawmthu hrilna dam mi po po ta dingin nei unla,

2.

Pathien ngaisak a, thienghlim taka um a, muong taka ei khawsak diel diel theina dingin lalhai le roreltuhai ta dingin hnipek bok ro;

3.

chu chu a tha a, ei Sandamtu Pathien lawmzawng a nih.

4.

Ama chun mi po po sandama um a, thutak an hung hriet chu a dit si a.

5.

Pathien pakhat chauh a um a, Pathien le mihriem inkarah palai pakhat chauh a um bok, mihriem Isu Krista chu.

6.

Mi po po intlannain ama chu a'n pek a, sandamna thu chu hun a ti takah a hung puong a.

7.

Kei hi Jentelhai laia chu ringna thu chu puong ding le thutak zirtirtu le tirko ni dinga ruot ka nih. Chu chu thudik a ni a, khel ka hril nawh.

8.

Chuongchun, in inkhawmna taphotah pasalhai chun titak zetin, lungsen le insel puma thaw loin, an kut thienghlim pharin, tongtai raw hai se.

9.

Nuhmeihai khom a mawi tawk le inchawi tawkin inchei hai sien la, sam siem ler hai, rangkachak thuoma inchei hai, tuikeplung thi hli hai, puon man tam inbel hai ching naw raw hai se.

10.

Nuhmei, Pathien ngaisak mihai thaw dan awm hrimin, thilthaw thatin inthuom lem raw hai se.

11.

Nuhmei chun to inchuin, thu awi takin thil inchuk raw se.

12.

Nuhmeiin mi a zirtir amanih le pasal chunga thu a nei amanih ka phal nawh; to an inchu ding a nih.

13.

Adam chu siem hmasak a ni a, chu zoah Evi siem a nih.

14.

Hlema um kha Adam a ni nawh; nuhmei kha a nih hlema um le bawsetu lem chu.

15.

Amiruokchu ringnaa dam, hmangainaa dam le thienghlimnaa dam mawi taka a um zing phot chun nau a nei leiin nuhmei chu sandam ning a tih.a

---

←  1Timothy (2/6)  →