1Timothy (1/6)  →
1. Kei Paula, a mi sandamtu Pathien le ei beisei innghatna Isu Krista thupek anga Krista Isu tirko hin,
2. ringnaa ka naupa indik tak Timothe chibai ka buk che. Pa Pathien le Isu Krista ei Lalpaa inthoka lunginsietna dam, zangaina dam le inremna dam i kuomah um raw se.
3. Makedonia rama ka fe ding laia ka ngen che ang khan Efesi khuoa um zing dingin ka ngen nawk che a nih, thuring indik lo inchuktir hlak mi thenkhathai kha i khap theina ding le
4. pipu thusim le thlatuhai tobul sui rak rak kha i'n bansantir theina dingin; chuong ang thilhai chun ringnaa inthoka Pathien thiltum hrietna intlun nekin zeldin thua inselna a suktam mei mei a nih.
5. Hi ka thupek thiltum chu lungril thienghlim, sie le tha hrietna indik le ringna tak taka inthoka suok hmangaina nei a nih.
6. Mi thenkhat chu, chu taka inthok chun an pet hmang a, hmangna bo inselna tieng an lut a.
7. Dan inchuktirtu inti nuom bok siin, an thu hril umzie le indik anga ngam taka an hrilhai khom chu an hriet tak tak bok si nawh.
8. Dan hi a hmangna ding taka hmang chun a tha ti ei hriet.
9. Dan hi mi thahai chunga hmang dinga siem ni loin dan bawsetu le mi hel hai, sakhaw poisa lo le thil suol thawtu hai, mani nu le pa thattu le tuolthat hai,
10. uire le mongkawhur hai, mihriema sumdawng mi le khela inkham hmanghai le
11. Pathienin puong dinga a mi'n koltir Chanchin Tha ropui kal zawnga zirtir chinghai chunga hmang dinga siem a nih.
12. Mi sukhrattu, ring tlaka mi ngaia a rongbawlna sin thaw dinga mi ruottu Krista Isu, ei Lalpa kuomah lawmthu ka hril hlak.
13. Kh� hma khan a hrilsetu, sukdudatu le rawng taka soisatu lo ni lang khom, ringtu ka ni hmaa hre loa thaw hlak ka ni leiin ka chungah za a ngai a,
14. ei Lalpa lunginsietna chu Krista Isua ringna le hmangaina leh ka chungah a vur ta teuh lem a nih.
15. Krista Isu chu mi suolhai sandam dingin khawvelah a hung ti hi a'n dikin pom tlak a lo va ni de aw! Chuong lai chun kei hi a suol lor lak ka nih.
16. Nisienlakhom, chu lei tak chun, ama ringtuhai chungah Krista Isun dawtheina tawp lo a neizie le chatuon hringna a pek dingzie inentirna dingin kei mi suol tak chungah hin zangaina a hung inlangtir a lo nih.
17. Laltak, chatuon mi, thi thei lo, mita hmu thei lo, Pathien pakhat chauh kuoma chun chawimawina le ropuina chatuon chatuonin um raw se. Amen.
18. Ka naupa Timothe, hieng thupekhai hi ka'n koltir che: zawlneihaiin i chungchang an hril lawk kha hre zing la, chuong thu chu zuiin indona tha chu bei la,
19. ringna le sie le tha hrietna fim tak vong tlat rawh; mi thenkhatin an sie le tha hrietna an poisa naw leiin an ringna long a koi dar tah a nih.
20. Chuonghai lai chun Humenai le Aleksandra khom an thang ve a, Pathien poi hril an simna dingin thunun an ngai a, Setan kutah ka pek suok tawl tah a nih.
      1Timothy (1/6)  →