←  1Thessalonians (5/5)    
1. Amiruokchu, unauhai, a hun le ni thu chu in kuoma ziek a ngai nawh.
2. Lalpa ni chu zana rukru a hung angin a hung tlung ding a nih ti in hriet si a.
3. Mihaiin, "A him, a muong" an ti laiin nuhmei nauha se angin sietna an chungah hung tlung thut a ta, pumpel top naw ni hai.
4. Unauhai, nangni chu thima um in ni naw leiin chu ni chun rukru angin nang nawng a ti cheu.
5. In rengin var nauhai le ni nauhai in ni vong si a. Zana mi ei ni naw a, thima mi ei ni bok nawh.
6. Chuleiin, mi danghai anga in ve loin, meng zingin ngaiven lem ei tiu.
7. Inhai chu zanah a nih an in hlak; zuruihai khom zanah a nih an inrui hlak.
8. Eini chu suna mi ei ni leiin ringna le hmangaina awmphaw hakin, sandam beiseina chu lukhuma hmangin, har fim takin um lem ei tiu.
9. Pathien lungsenna tuor ding ni loin ei Lalpa Isu Krista zara sandam ni dingin a mi ruot lem a nih.
10. Ei dam khoma ei thi khoma ama leh ei hring theina dingin ama chu ei ta dingin a thi ta si a.
11. Chuleiin, in thaw hlak ang hrimin, inthlamuong tuoin insukhrat tuo ro.
12. Unauhai, in ta dinga inrim taka sinthawtuhai, Lalpaa nangni enkoltuhai le kawktuhai cheu chu hre zing dingin ka ngen cheu a nih.
13. Anni chu an sinthaw leiin hmangainain ngai chunghnung tak unla, inngei diel dielin um ro.
14. Chun, unauhai, ka ngen cheu hi, mi thabohai chu kawk unla, zaksiehai chu sukphur unla, mi hrat nawhai chu thangpui unla, mi tin chungah dawthei ro.
15. Tu khomin tu suol khom suola thungrul lo dingin fimkhur unla, ieng lai khoma thil tha inthawpek tuoin, mi po po chungah thil tha thaw pei ro.
16. Lawm rop unla,
17. ma loin tongtai unla,
18. iengkimah lawmthu hril rop ro. Hi hi Krista Isua chun in ta dinga Pathien ditzawng a nih.
19. Thlarau mei chu sukmit naw ro.
20. Thuhriltuhai hmusit naw ro.
21. Iengkim fie unla, a tha taphot chu chel nghet ro.
22. Suol taphot laka chun inthier fihlim ro.
23. Remna Pathien ngei chun in pumin sukthienghlim sien cheu, ei Lalpa Isu Krista hung pha in thlarau le in lungril le in taksa a rengin soisel boin inumtir raw se.
24. A kotu cheu chu a ringum a, thaw khom thaw ngei a tih.
25. Unauhai, mi tongtaipek ro.
26. Unau po pohai kha fawp inthiengin mi hung chibai vong ro.
27. Hi lekha hi unau po po hrieta tiem dingin Lalpa hmingin ka ngen cheu a nih.
28. Ei Lalpa Isu Krista lunginsietna chu in kuomah um raw se.
←  1Thessalonians (5/5)