| ← 1Thessalonians (4/5) → |
| 1. | A tawp taka chun unauhai, Pathien lawmzawnga um dan ding kan inchuktir hlak cheu ang khan tu hin in um a, chuong anga um zuol pei dingin Lalpa Isu hminga ngenin kan infui bok cheu a nih. |
| 2. | Lalpa Isu thuneina hmanga kan thu inchuktirhai cheu kha in hriet. |
| 3. | Pathien ditzawng chu hi hi a nih- in thienghlim hi. Chuleiin, inngaihai bansan ro. |
| 4. | Mi tinin mani taksaa seng thienghlim le inzaum taka thunun dan inchuk raw se. |
| 5. | Pathien hre lo Jentelhai angin tisa chaknaah tlu lut naw ro. |
| 6. | Hi thila hin tu khomin a unau hlemin a lakah thil tha naw thaw naw raw se; chuong ang thawtuhai chunga chun Lalpan phuba lang a tih ti hrilin kan inhriettir tah cheu kha. |
| 7. | Pathien chun thienghlim lo dingin a mi ko naw a, thienghlim taka khawsa dingin a mi ko lem a nih. |
| 8. | Chuleiin, hi thu poisa nawtu chun mihriem a poisa naw ni loin Thlarau Thienghlim petu cheu Pathien a poisa naw a ni lem. |
| 9. | Pathienin nangni ngei inhmangai tuo dan a'n chuktir ta cheu leiin unau in inhmangai dan ding thu chu in kuomah ziek hran a ngai nawh. |
| 10. | Chuong ang chun Makedonia rama unau po po khom in hmangai hlak kha. Unauhai, chu chu thaw zuol pei dingin ka ngen cheu. |
| 11. | Kan infui tah cheu ang khan, dei dapa khawsain mani sin sengah inbur unla, mani kut ngeia sinthaw uor ro. |
| 12. | Chuongchun, in ni tin khawsaka chun puo tieng mi inza phur in ta, tu chunga khom innghat naw bok in tih. |
| 13. | Unauhai, beiseina hrim nei lo mi danghai anga in lungngai nawna dingin, lo in tahai chanchin chu in hriet naw ka nuom nawh. |
| 14. | Isu a thi a, a tho nawk ti ei ring a, amaa in tahai chu Pathienin Isu leh hung thuoi a tih ti ei ring bok a. |
| 15. | Lalpa thuin hi hi kan hril cheu a nih: eini Lalpa hung chena dama la um zinghai hin a lo in tahai chu lekhal naw top ei tih. |
| 16. | Lalpa ngei chu, thupek inring tak le vantirko ropui tak rawl le Pathien kona tawtawrawt ri leh, vana inthokin hung tum a ta, Kristaa thi tahai chu tho hmasang an tih. |
| 17. | Chu hnunga chun eini dama la um zinghai hi boruokah Lalpa hmuok dingin anni ruolin sum lai khin lak tungin um ei ta, Lalpa kuomah um kumkhuo tang ei tih. |
| 18. | Chuongchun, hieng thuhai hin inthlamuong tuo hlak ro. |
| ← 1Thessalonians (4/5) → |