←  1Thessalonians (3/5)  →
1. Chuongchun, kan nghak zo ta uoi naw leiin, keini chauh Athen khuoah la chambang inlang tha tak dingin kan ngai a.
2. Chuleiin, kan unaupa Timothe, Krista Chanchin Tha hrila Pathien rong kan bawlpui hi in ringna suknghet le sukphur ding le hieng ang fiena leia nangni lai tu khom an inhning nawna dingin kan hung tir a nih.
3. Nangni khomin hieng thil hi ei tuor ngei ding a nih ti in hriet ta sa a ni kha.
4. In kuoma kan um laia sukdudana ei la tuor ding thu kan hril rop tah cheu ang tak khan a hung tlung tah a nih ti in hriet.
5. Hi lei hin, ringnaa in nghet pei le pei naw hre loa ka um thei tak naw leiin le ieng kong zawngin amanih thlemtu chun thlem hne cheu a, kan sinthaw a thlawn el pal kan inlau leiin Timothe hi ka hung tir a nih.
6. Timothe chu in kuoma inthokin a hung kir nawk tah a, chanchin lawmum tak, in ring nghetzie dam, hmangaina in hauzie dam, keinin hmu cheu kan chak em em ang boka mi hmu in chak vezie thu hai dam, ieng lai khomin in mi hriet zing ti thuhai dam a mi hril a.
7. Chuleiin, unauhai, in ringna a nghet leiin kan lungzingna le rinumna po poah lung muong takin kan um thei tah a nih.
8. Lalpaa in nghet pei lei hin kan ta dingin dam man a um.
9. Nangni zara Pathien hmaa kan hlimna po po lei hin Pathien kuomah lawmthu hril kan va bat nasa de aw!
10. In hmel kan hmu theina ding le ringnaa in tlaksam kan phuhruk theina ding cheuin Pathien kuomah sun le zanin thahnemngai takin kan hni hlak.
11. Tu hin ei Pa Pathien le ei Lalpa Isu chun nangni kan hung kan theina ding cheuin lampui mi siempek raw se.
12. Keinin kan hmangai ang cheua nasaa in inhmangai theina dingin, in hmangaina chu Lalpan sukthangin sukpungpek cheu raw se.
13. Chuongchun, a mi thienghlim po po le ei Lalpa Isu a hung phaa Pathien, ei Pathien hmaah thienghlim le soisel boa in um theina dingin in lungril suknghet bok raw se.
←  1Thessalonians (3/5)  →