←  1Thessalonians (2/5)  →
1. Unauhai, in kuoma kan hung inzin kha a thlawn nawh ti nangni ngeiin in hriet.
2. In hriet tah angin Filipi khuoah inzakum taka soisak tuor inlang khom, dodalna tam tak karah in kuoma Chanchin Tha hril dingin Pathienin a mi sukhuoi ta lem hlauh a ni kha.
3. Kan thu hril cheu hi thu indik lo amanih, tum ruk tirdakum neia inhlem tumna thu amanih a ni nawh.
4. Chanchin Tha inkoltir tlaka Pathienin a mi ruot ang ngeiin, mihriem suklawm tum ni loin, kan lungril fietu Pathien suklawm dingin thu kan hril lem hlak a nih.
5. Ieng lai khomin mi kan inpak der ngai naw a, duamna thup dingin hmaithinghawng kan inbel ngai nawh ti in hriet a, a mi hrepuitu chu Pathien a nih.
6. Mihai inpak kan phut naw a, nangni amanih mi dang amanih inpak kan ngiet bok nawh.
7. Krista tirko kan ni leiin in ta dinga phurrik inchang thei kan na, sienkhom nuin a nauhai a duot angin kan duot lem cheu a ni kha.
8. Chuong ang khopa ngainaa kan hmangai em cheu leiin, Pathien Chanchin Tha chauh ni loin kan hringna chen khom hlim taka pek hiel cheu khom kan inhuom a ni kha.
9. Unauhai, sin kan thaw inrimzie le thaw nasatzie kha in hriet a, nangni lai tu khom kan sukharsat nawna dingin, a sun a zana sin inrim taka thaw pumin Chanchin Tha kan hril hlak cheu a ni kha.
10. Thienghlim le fel le dem kai loin ringtu nangnihai lai kan um hlak ti hretu chu nangni in ni a, Pathien khom a nih.
11. Pain a nauhai chunga a thaw angin nangni chunga khom kan thaw hlak ti in hriet.
12. A ram le a ropuina chang ve dinga kotu cheu Pathien mi ni tlaka um dinga sukphur le thlamuongin, kan infui mol mol hlak cheu a ni kha.
13. Kan thu hung hril in lo pom lai khan, mihriem thu anga pom loa Pathien thutak a nina ang taka in pom lem lei khan ma loin Pathien kuomah lawmthu kan hril bok hlak. Chu chu nangni ringtuhaia thok hlak, Pathien thutak ngei chu a ni hrim a nih.
14. Unauhai, nangni khom Judai rama Isu Kristaa um Pathien kohranhai ang in lo ni ve tah; annin Judahai lakah an tuor angin nangni khom in mihai lakah in tuor kha.
15. Chuong Judahai chun Lalpa Isu le anni zawlneihai ngei an that a, keini khom an mi hnot suok a, Pathien an suklawm naw a, mi dang hrim hrim an dodal vong a nih.
16. Jentelhai sandam an ni vena dinga Chanchin Tha an kuoma kan hril chen khom an khap a, an suol vawr tawp an tong a, a tawpah Pathien lungsenna chu an chungah a hung tlung tah a nih.
17. Sienkhom, unauhai, lungril tieng ni loin taksa tieng hun iemani chen ei lo inthe tah a, chuleiin in hmel hmu nawk kan chak a, hmu cheu tumin kan thang nasa a nih.
18. Hung sir cheu kan tum hlak a, kei Paula ngei khom hin ka tum rop a, sienkhom Setanin a mi dal hlak a.
19. Ei Lalpa Isu hung nawk phaa thil kan beisei, kan hlimna ding le chawimawina suongum a hmaa kan khum ding chu nangni naw tu dang am ning an ta?
20. Nangni hi kan ropuina ding le kan hlimna ding chu in nih.
←  1Thessalonians (2/5)  →