←  1Samuel (9/31)  →
1. Benjamin hnama mi pa challang tak el a um a, a hming chu Kisa a na, ama chu Abiel naupa a na, ama chu Zeror naupa a na, ama chu Bekora naupa a na, ama chu Afia naupa a nih.
2. Kisa chun naupa a nei a, a hming chu Saula a nih. Ama chu tlangval duongkai tha tak el a na, ama tluk hrim Israelhai lai an um naw a, a dung khomin mi a khum vong a nih.
3. Saula pa Kisa chun a sabengtung ruol an tla hmang leiin a naupa Saula kuomah, "Siehlawhai laia pakhat hi thuoi la, ei sabengtunghai va zong rawh" a ta.
4. Chuongchun, Efraim tlangram le Salisa le a se vel chen an dap vong a, sienkhom an hmu zo naw a. Salim bielah an zong nawk a, sienkhom an hmu nawh. Chu zoah Benjaminhai ramah an zong nawk a, sienkhom an hmu zo chuong nawh.
5. Zufa biel an tlung chun Saulan a siehlaw kuomah, "Thaw rawh, kir nawk tang ei tih. Chuong naw chun ka pa'n a sabengtunghai nek hmanin eini mi lo ngaituo lem rawi a tih" a ta.
6. A siehlaw chun, "Ngai ta, hi khuoa hin Pathien mi a um a, mi inzaum tak a na, a hril taphot chu a hung tlung indik ngei ngei hlak a nih. Thaw ta, a umnaa chun feng ei ta, ei fena ding tieng khom mi hril thei rawi naw nim" a ta.
7. Saula chun a siehlaw kuomah, "An leh, ei fe ding chun iem a na ei chawipek hrim hrim ding? Ei bu chawi hlak ei fak zo ta si. Pathien mi kuoma thilpek chawi ding ei nei der naw a nih. Iem nei ei nei hrim hrim a?" a ta.
8. Siehlaw chun, "Tangka shekel hmun lia thea hmun khat chu ka la kol a, chu chu ei fena ding a mi hril manah Pathien mi chu pe el ei tih" a ta.
9. (Kha hma khan chu Israel mihai laia miin Pathien rawn an nuom changin, "Thaw ro, hmutheitu kuomah feng ei tiu" an ti hlak a; tu laia 'zawlnei' an ti hlak hi 'hmutheitu' an ti hlak a nih.)
10. Saula chun a siehlaw kuomah, "A tha hlauh a ni chu, feng ei tih" a ta. Chuongchun, Pathien mi umna khuo tieng pan chun an inthok suok a.
11. Khuo an pan tung lai chun tui chawia hung nunghak ruol an hmu a, "Hi taka hin hmutheitu a um?" tiin an indon a.
12. Anni chun, "Um e. In hma ela khan a fe. Inhmaw unla, hmun sangah mipuiin inthawina an nei ding a ni leiin kan khuoah voisun hin a hung vak a nih.
13. Khuo in lut charin, hmun sanga bu faka a fe hmain ama chu hmu el in tih. An inthawina malsawmna hriltu ding a ni leiin, a tlung hma chun tu khomin bu fa naw ni hai, chu zoah fielhai chun bu an fak chauh hlak a nih. Chuleiin, fe unla, hang nang el in tih" an ta.
14. Chuongchun, khuo chu an pan tung a, an lut chun hmun sanga fe ding Samuel chu an hang nang a.
15. Saula hung hma ni khata chun LALPAN Samuel kuomah hieng ang hin thu a puong a:
16. "Hieng tik huna hin zingah Benjamin rama inthokin tlangval pakhat i kuomah hung tir ka ta, ka mi Israelhai chunga hotu dingin hriek lo nal rawh. Ama chun Filistinhai kuta inthokin ka mihai san suok a tih. An khek ri chun ka kuom a hung tlung tah leiin anni chu ka ngaisak a nih" tiin.
17. Samuelin Saula a hmu char chun LALPAN a kuomah, "En ta, i kuoma ka hril pa kha; ama hin ka mihai chungah ro rel a tih" a ta.
18. Chuongchun, Saula chun kul kotkhara ngir Samuel chu a va hnai a, "Hmutheitu in chu khaw lai am a um ti mi hril raw khai" a ta.
19. Samuel chun, "Keima hi hmutheitu chu ka nih. Ka hmaah fein hmun sang tieng khi pan la, voisun hin ka kuomah bu i fak ding a nih. Zingah infetir chauh ka ti che a, i thil hriet nuom po po khom hril vong ka ti che.
20. I sabengtung, ni thum inhmang tah khom chu lungkham naw rawh, an hmu tah. Israelhai mamaw tak tu am a na? Nang le i pa sunghai hi in ni naw am a ni?" a ta.
21. Saula chun, "Israel pahnamhai laia hnam chin tak Benjamin hnama mi ka ni a, Benjamin pahnam sunga khom a chin tak kan nih. Iengti leia hieng thil hi ka kuomah i hril am a na?" a ta.
22. Samuel chun Saula le a siehlaw chu a thuoi a, mikhuol pindana chun a thuoi lut a, an mi fiel sawmthumhai lai chun thungna poimaw takah a'n thungtir a.
23. Samuel chun bu suongtu kuomah, "Sie hran dinga ka pek che satlang kha tu hin hung la rawh" a ta.
24. Thlai suongtu chun a mal le an thil buotsai danghai chu a hung lak a, Saula hmaa chun a sie a, Samuel chun, "En ta, hi huna i ta dinga sa ka lo sie hranpek che chu a nih. Ka mikhuolhai ruol hin kilin fa rawh" a ta. Chu ni chun Saula chu Samuel leh thlaithleng an kil tlang ta a.
25. Inthawina hmun sanga inthoka khuoa an fe thlak hnung chun Samuelin Saula chu in chung zawlah a'n biekpui a.
26. Zingkar inhma takin an tho a, Samuel chun Saula chu in chung zawlah a ko tung a, "In siem zo la, infetir tang ka ti che" a ta. Saula a'n siem zo chun Samuel leh an suok tlang a.
27. Kotsuo an tlung chun Samuelin Saula kuomah, "Siehlaw hi ei hmaa lo fe dingin hril rawh. Nang ruok chu hi taka hin la ngir phot la, Pathiena inthoka ka thu dong chu ka hril ding che a nih" a ta, siehlaw chu a lo fe hmasa a.
←  1Samuel (9/31)  →