← 1Samuel (8/31) → |
1. | Samuel chu a hung upa ta a, a naupahai chu Israelhai chunga roreltuah a sie a. |
2. | A upa tak hming chu Joel a na, a dottu hming chu Abija a na, Beershebaa inthokin ro an rel a. |
3. | Nisienlakhom, a nauhai chun a um dan la ve loin sum le pai an hnot a, thamna an lak a, indik lo takin ro an rel a. |
4. | Chuongchun, Israel upahai po po chu an inkhawm a, Rama khuoah Samuel kuoma chun an fe a, |
5. | a kuomah, "Ngai ta, i hung upa ta hle a, i naupahai hlak chun i um dan an lak ve si naw a, hnam dang po pohai thaw dan angin kan chunga roreltu dingin lal mi ruotpek rawh" an ta. |
6. | "Roreltu dingin lal mi ruotpek rawh" an ti lei chun Samuel chu a lawm naw hle a, LALPA kuomah a tongtai a. |
7. | LALPA chun a kuomah, "Mipuiin i kuoma an hril po po chu ngaithla rawh. Nangma an dit naw lei che a ni naw a, an chunga roreltu dingin keima an mi dit naw lei lem a nih. |
8. | Aigupta rama inthoka ka thuoi suok nia inthok tah khan tu chen hin mi nghatsan le pathien dang rong mi bawlsan an ching a, chuong ang chun i chunga khom an thaw ve a ni hih. |
9. | Chuleiin, an thu ngaithla la, amiruokchu, an chunga lalhaiin an la hung thaw dan dinghai chu ngun takin hril lawk tawl rawh" a ta. |
10. | Samuel chun LALPA thu po po chu lal hnitu mipuihai chu a hril vong a. |
11. | An kuoma chun, "In chunga roreltu lal a la hung chet dan ding chu hieng ang hin ning a tih: A tawlailir le a sakorhai enkoltu dingin in naupahai lakpek a ti cheu a, a tawlailir hmaa chun tlan an tih. |
12. | A then chu mi sang chunga kawmandar dam le sawmnga chunga kawmandar damin sieng a ta, a thenin a hnuoi inletin a bu sik an ta, a then ralthuom siemtu le a tawlailir hmangruo siemtuah hmang tawl a tih. |
13. | In naunuhai chu rimtui siemtua dam, bu suongtua dam, bei siemtua dam hmang a tih. |
14. | Chun, in in le lohai, in grep huonhai le in oliv huonhai a tha tha lakpek a ti cheu a, a siehlawhai peng a tih. |
15. | In bu tharsuok le in uoin tharsuok sawma pakhat lang a ta, a thoktuhai kuomah peng a tih. |
16. | In bawipa le bawinuhai le in ran ruol laia a tha tak ngot le in sabengtunghai chu ama hmang dingin lapek a ti cheu. |
17. | In beram ruol laia mi sawma pakhat lang a ta, nangni ngei a siehlawah thang in tih. |
18. | Chu ni chu a tlung pha leh in lal thlang laka inthoka thawvengna hniin inrum in ta, chu huna chun LALPAN donsak naw ni cheu" a ta. |
19. | Nisienlakhom, mipuihai chun Samuel thu chu an ngaithlak nuom naw a, "Ni lo e, kan chunga lal ding kan dit a nih. |
20. | Chuongchun, hnam danghai ang hung ni veng ei ta, ei lal chun ro mi relpek a ta, hma thuoiin ei ralhai mi dopek a tih" an ta. |
21. | Samuel chun an hril po po chu a hriet a, LALPA hmaa chun a hril sawng pei a. |
22. | LALPA chun, "An thu ngaithla la, lal pe tawl rawh" a ta. Samuel chun Israel mihai kuomah, "Mi tin mani khuo sengah kir nawk ta ro" a ta. |
← 1Samuel (8/31) → |