←  1Samuel (7/31)  →
1. Chuongchun, Kiriath-Jearim khuoa mihai chu an hung a, LALPA Bawm chu an lak tung a, tlanga Abinadab ina chun an chawi a, a naupa Eleazar chu LALPA Bawm enkoltu dingin an inhlan thienghlim a.
2. LALPA Bawm chu kum sawmhni zet Kiriath-Jearimah a um a, chu sung chun Israelhai chu LALPA tieng an lung an leng nawk ta a.
3. Samuel chun Israel sungkuo po po kuomah, "In lungril po poa LALPA tienga hung ngha in ni tak tak chun, ram dang pathienhai le Astoret lemhai chu sie hmang dai unla, in lungril LALPA ta dingin buotsai unla, ama rong chauh bawl ro, chuongchun Filistinhai kuta inthok hin san suok a ti cheu" tiin a hril a.
4. Israel mihai chun Baal le Astoret hai lem chu an sie hmang a, LALPA rong chauh chu an bawl ta a.
5. Samuel chun, "Israel mihai po po Mizpa-ah ko khawm vong ro, LALPA kuomah tongtaipek ka ti cheu" a ta.
6. Mizpa-a chun an fe khawm a, tui an chawi a, LALPA hmaah an bun thlak a. Chu ni chun bu an nghei a, "LALPA lakah thil suol kan lo thaw a nih" tiin an inpuong a. Mizpaa inthok chun Samuelin Israelhai ro a relpek a.
7. Mizpaah Israelhai an pung khawm ti Filistinhaiin an lo hriet chun anni chu bei dingin Filistin lalhai chu an inthok tung a. Filistinhai hung thu Israelhaiin an lo hriet chun an ti hle a.
8. Samuel kuomah, "Filistinhai kuta inthoka a mi san suok theina dingin LALPA chu ma loin ko zing rawh" an ta.
9. Samuel chun beramte, nene ne lai a lak a, LALPA kuomah pumraw inthawina dingin a'n hlan a. Israelhai aiawin Samuel chun LALPA a ko a, LALPA chun a hung don a.
10. Samuelin pumraw thilhlan a'n hlan lai chun Filistinhai chun Israelhai chu bei dingin an hung nangching tep ta a. Nisienlakhom, chu ni chun LALPAN vaninrumin Filistinhai chu a hrawk a, nasa takin a sukchi-ai a, Israel mihai chun an intlawm ta der a.
11. Israelhai chu Mizpaa inthok chun an suok a, Filistinhai chu Beth Kar chuonhnuoi chen an hnot a, lampui intluonin an that a.
12. Samuel chun lung a lak a, Mizpa le Sen inkara chun a phun a, "Hi chen rauh hi LALPAN a mi thangpui a nih" tiin a hmun hmingah Ebenezer a'n buk a.
13. Chuongchun, Filistinhai chu tukdolin an um a, Israel ram chu an run nawk ta ngai nawh. Samuel dam sung po po chu LALPA kutin Filistinhai a dang tlat a nih.
14. Filistinhaiin Israelhai an lakpek khuo po po chu, Ekron-a inthoka Gath chenin, Israelhai kutah an pek kir nawk vong a, an sevel ram po po chu Filistinhai kuta inthokin Israelhaiin an san suok a, Israel mihai le Amor mihai inkarah inremna a hung um ta a.
15. Samuel chun a dam sungin Israel mihai ro a rel a.
16. Kum tinin Bethel le Gilgal le Mizpa khuohai chu a kan vel hlak a, a fena naah Israelhai ro a rel pei a.
17. Amiruokchu, ama in umna Rama khuoah a kir nawk zie a, chu taka inthok khom chun Israelhai ro a rel a, LALPA ta dingin maicham a siem a.
←  1Samuel (7/31)  →