←  1Samuel (6/31)  →
1. LALPA bawm chu Filistinhai ramah thla sari a um a.
2. Filistinhai chun an thiempuhai le ai en thiemhai an ko a, "LALPA Bawm hi iem ei law ding a na? Ieng tin am ei thon kir ding a na ti mi hril ro" tiin an indon a.
3. Anni chun, "Israelhai bawm hi in thon kir ding khomin a ruok chun infetir naw ro. A kuomah bawsiet inthawina inhlan unla, chuongchun sukdamin um in ta, nangnia inthoka kut a lakson nawna san khom hung hrieng in tih" an ta.
4. Filistinhai chun, "Ieng ang bawsiet inthawina am inhlan ei ta?" an ta. Anni chun, "Rangkachakin khuoihli lem panga le mazute lem panga siem unla, Filistin lal tinin pakhat seng inhlan ro, in renga chunga hri inleng le in lalhai chunga hri inleng chu thuhmun a ni si a.
5. Chuleiin, khuoihli lem le in ram suksetu mazute lem chu siem unla, Israelhai Pathien chu chawimawi ro, a kut chu in chunga le in pathienhai chungah a sukzang nuom el rawi mawh!
6. Faraw le Aigupta mihaiin lungril an sukkhauh ang khan ieng dinga in lungril in sukkhauh am? Anni chungah na taka a thaw lei khan Israelhai chu insuoin an infetir chauh a ni naw am a ni?
7. Chuleiin, tu hin tawlailir thar buotsai unla, bawngpui pahni, a nene sawr lai, ringkol la bat ngai der lo chu buotsai unla, tawlailir chu inkeitir unla, an tehai chu hung thuoi kir unla, thlung ro.
8. LALPA Bawm chu la unla, tawlailira chun sie unla, bawsiet inthawina dinga in inhlan rangkachak thil hluhai chu thingremah khumin a sirah sie unla, infetir unla, inthla el ro.
9. Ramri tieng pana Beth-semes tieng tawlailir a fe chun ei chunga thil tlung tha lo tak hi ama thaw ning a ta, a fe naw chun a mi hremtu chu ama kut ni loin, eini chunga tla ve hrim hrim a nih ti hrieng ei tih" an ta.
10. Chuong ang tak chun an thaw a, bawngpui, a nene sawr lai pahni an va kei a, tawlailir chu an inkeitir a, an tehai chu in tieng an khum a.
11. Chun, LALPA Bawm chu tawlailira chun an sie a, rangkachak mazute lem le khuoihli lem siena thingrem chu an sie bok a.
12. Bawngpuihai chun Beth-semes an pan ngat ngat a, inbu pei pumin lampui chu an hraw a, voi tieng amanih chang tieng amani khom an pet nawh. Filistin lalhai chun Beth-semes ramri chenin an zui a.
13. Beth-semes khuoa mihai chun ruoma hin bu an lo sik a, an hang ngha a, Bawm chu an hmu a, an lawm hle a.
14. Tawlailir chu Beth-semes khuoa Josua loa chun a lut a, lungpui lien tak umna lai chun a ngir ta zing a. Chun, tawlailir thing chu an chek nawi a, bawngpuihai chu LALPA ta dinga pumraw inthawinaah an inhlan a.
15. Levihai chun LALPA Bawm le rangkachak thil lem umna thingrem chu an lak thlak a, lungpui chunga chun an sie a. Chu ni vek chun Beth-semes khuoa mihai chun pumraw thilhlan le inthawinahai chu LALPA kuomah an inhlan a.
16. Chun, Filistin lal pangahai chun chuong thil chu an hmu hnungin a ni la lain Ekron tieng an kir nawk ta a.
17. Filistin mihaiin bawsiet inthawina dinga rangkachaka siem khuoihli lem an inhlan zat chu hieng ang hin a nih: Asdod khaw puolin pakhat, Gaza khaw puolin pakhat, Askelon khaw puolin pakhat, Gath khaw puolin pakhat le Ekron khaw puolin pakhat seng a nih.
18. Rangkachaka siem mazute lem an inhlan zat chu Filistin lal pangahai khuo, kula inhuon le an khawperhai po po zat a nih. LALPA Bawm an innghatna lungpui chu Beth-semes khuo Josua loah tu chen hin inchikna dingin a la um zing a nih.
19. Amiruokchu, LALPA Bawm sung an en leiin Beth-semes khuoa mihai chu Pathienin a hrem a, mi sawmsarib a sukhlum a. LALPA kut thlak nat leia thihai chu mipuiin an sun a.
20. Beth-semes khaw mihai chun "Hi Pathien thienghlim LALPA hmaa hin tu am ngir theiin, ei kuoma inthok hin tu kuom tieng am pan tung nawk a ta?" an ta.
21. Chuongchun, Kiriath-jearim khuoa mihai kuoma chun, "Filistin mihaiin LALPA Bawm an hung sie nawk ta a, hung thla unla, in kuom tieng la tung ro khai" tia hril dingin mi an tir a.
←  1Samuel (6/31)  →