←  1Samuel (30/31)  →
1. Ni thum hnunga Davida le a mihaiin Ziklag an tlung chun Amalekhaiin Negev le Ziklag khuo chu an lo run der ta a, an raw a,
2. nuhmeihai le chu khuoa um taphot chu a chin a lienin salah an man a, tu khom that loin an thuoi vong a.
3. Davida le a mihaiin an umna khuo an va tlung chun a lo kang fai ta a, an nuhmeihai le an naupahai le naunuhai chu salah an lo man fai vong a.
4. Davida le a mihai chu inring takin, chaua an rawl a suok thei naw hiel chenin, an tap a.
5. Davida nuhmei pahnih, Jezrel-a mi Ahinoam le Karmela Nabal nuhmei thisan Abigail-hai khom chu an thuoi a.
6. A mihai chun lunga deng hiel an nuom el leiin Davida chu a beidong hle a, mi tin chu an naupahai le naunuhai lei chun an lung a na hle si a. Davida ruok chu LALPA a Pathienah a'n sukhrat a.
7. Davida chun Abimelek naupa thiempu Abiathar kuomah, "Thiempu zakuo Efod kha hung la raw khai" a ta, Abiathar chun a hung lak a.
8. Davida chun "Mi hung runtuhai hi hnot lang hnot phak ka tim?" tiin LALPA chu a'n don a. LALPA chun, "Hnot rawh, hnot phak ngei ngei i ta, san suok tawl ngei ngei bok i tih" a ta.
9. Chuongchun, Davida le mi zarukhai chun an hnot a, Besor Ruom inthuk an tlung chun a then an maksan a.
10. Mi zahni pawl chu an chau ta em leiin Besor Ruom chu an kan pei ta naw a, sienkhom Davida le mi zali chun an hnot ta ngar ngar a.
11. Phula hin Aigupta mi an hmu a, David kuomah an hung thuoi a, fak ding bei le dawn ding tui an pek a,
12. theichang tawl fun khat le grep em tawl bawr hnih an pek bok a, chuonghai a hang fak chun a hung har nawk a, ni thum le zan thum bu fa ta lo le tui dawn ta lo a ni si a.
13. Davida chun a kuomah, "Tu am i na? Khaw laia inthoka hung am i na?" tiin an don a. Ama chun, "Aigupta tlangval, Amalek siehlaw ka nih. Ni thum a ni ta a, ka damnaw leiin ka puin a mi maksan el a nih.
14. Kereth sim tieng le Judahai chan sim tieng kan run a, Kaleb sim tieng kan run bok a, Ziklag khuo khom kan raw" a ta.
15. Davida chun, "Chuonghai umnaa chun mi thuoi thei i tim?" a ta. Ama chun, "Mi that lo ding le ka pu kuta mi pe kir nawk lo dingin Pathien hming salin ka kuomah thu intiemkam phot la, chuonghai umnaa chun thuoi ka ti che" a ta.
16. A zuk thuoi tlung chun, ngai ta, Filistin ram le Judai rama inthoka rallak tam tak an hawn leiin ruoi an lo the mup mup a, an lo um dar nuoi el a.
17. Davida chun thimbuta inthoka a zing zan tieng chenin a bei ngat ngat a, sanghawngsei chunga chuong tlangval zali tlan suokhai ti naw chu a that fai vong a.
18. Amalekhai rallak po po chu a lak kir nawk a, a nuhmei pahnihai chu a san suok bok a.
19. Chuongchun, a chin a lien, an naupahai le an naunuhai, an rallakhai le an thil lakhai po po chu kim takin Davida chun a hung hawn kir nawk vong a.
20. Davida chun beram ruol le an ran ruol po po chu a lak a, a rawihai chu a'n somtir a, "Hienghai hi Davida rallak a nih" tiin an insam pei a.
21. An chau leia mi zahni a maksanna Besor Ruom an tlung chun ama le a fepuihai hmuok dingin an hung suok a, Davidan a chibai tawl a.
22. Sienkhom Davida zuituhai laia mi suolhai le buoina siem chinghai po chun, "An hung ve si naw leiin rallak ei va lak kirhai hi an chang ve ding a ni nawh. Amiruokchu, mi tinin an nuhmei le nauhai seng ruok chu an thuoi phalpek ei tih" an ta.
23. Davida chun an kuomah, "Unauhai, LALPAN a mi pek thilhai chu chuong ang chun in thaw ding a ni nawh. Ama chun mi humin, mi dotuhai chu ei kutah a pek a.
24. Hi thila hin tuin am in thu chu a pom ding? Indonaa zu fehai chan ang tho chu thuomhnaw vengtuhai khomin inang sengin an chang ve ding annawm" a ta.
25. Chu nia inthok chun tu chen hin Israelhai ta dinga thupek le danah an hmang tah a nih.
26. Davidan Ziklag a hung tlung chun rallak thenkhat chu a ruolhai, Juda upahai kuoma chun, "Hi, LALPA hmelmahai laka rallak thilpek chu kan hung hle ve cheu a nih" tiin a thon tawl a.
27. Chu thilpek lo dongtuhai chu Bethel-a um hai, Ramot sim tienga um hai, Jatira-a um hai,
28. Aroer-a um hai, Sifmot-a um hai, Estemo-a um hai,
29. Rakala um hai, Jehramel mi hai Ken mi hai,
30. Horma-a um hai, Bor Asan-a um hai, Athaka um hai,
31. Hebron-a umhai le Davida le a mihai chettlatna hlak hmun po poa umhai an nih.
←  1Samuel (30/31)  →