←  1Samuel (3/31)  →

---

1.

Naupang Samuelin Eli hnuoia LALPA rong a bawl lai chun LALPA thu a tlung inkhat hle a, inlarna khom a hung tlung zen zen nawh.

2.

Chuong lai chun Eli mit chu a chau tak leiin khuo a hmu mumal thei ta naw a, a zalna hmun pangngaia chun a zal a.

3.

LALPA tempula PathienThuthlung Bawm bula chun Samuel chu a zal a. Chun, Pathien khawnvar khom an la that hman hmain,

4.

LALPA chun Samuel a ko a. Samuel chun, "Hi taka hin ka um?" a ta.

5.

Eli kuomah a va tlan vat a, "I mi ko maw? Hi taka hin ka um" a ta. Ama chun, "Ka ko naw che, va zal nawk ta rawh" a ta. Chuongchun a fe a, a zal nawk ta a.

6.

LALPA chun Samuel chu a ko nawk a. Samuel chu a tho a, Eli kuomah a fe a, "I mi ko maw? Hi taka hin ka um" a ta. Eli chun, "Ka naupa, ka ko naw che. Fe la, va zal nawk ta rawh" a ta.

7.

Chuong lai chun Samuel chun LALPA a la hriet ve naw a, LALPA thu chu a kuoma puong a la ni bok nawh.

8.

LALPA chun Samuel chu a ko nawk a, chu chu a ko voi thumna a nih. Samuel chu a tho a, Eli kuomah a fe a, "I mi ko maw? Hi taka hin ka um" a va ti nawk a. Chu phing leh naupang chu LALPAN a ko a nih ti Eli chun a hriet ta a.

9.

Eli chun Samuel kuomah, "Fe la, va zal nawk ta rawh. A ko nawk che chun, 'LALPA, thu chu hril rawh, i siehlaw hin a ngaithlak ie' ti rawh" a ta. Samuel chu a khuma chun a va zal nawk a.

10.

LALPA chu a hung a, a bula chun a ngir a, a hmaa ang bok khan, "Samuel, Samuel" tiin a ko nawk a. Samuel chun, "Thu chu hril rawh, i siehlaw hin a ngaithlak ie" a ta.

11.

LALPA chun Samuel kuomah, "Ngai ta, Israel rama a hre taphothai na khel ngei ngei ding thil ka thaw ding a nih.

12.

Chu huna chun Eli kuoma a sungkuo chungchang thua thaw dinga ka thil hril po po chu a bula inthoka a tawp chenin ka hlen ding a nih.

13.

A nauhaiin thil suol thaw a, Pathien an sukmuolphozie hre zing sia a khap naw leia an sungkuo chungthu kumkhuoa dinga ka rel chu ama khom ka hril tah.

14.

Eli sungkuo bawsietna chu inthawina amanih thilhlan amania sukre thei ni ta naw nih' tiin ka lo inkham ta si a" a ta.

15.

Samuel chu zing tieng chen a in a, LALPA in kotkharhai chu a hong a. Inlarna a hmu chu Eliin hrieng a tih ti Samuel chun a tithawng hle a.

16.

Amiruokchu, Eli chun a hung pan a, "Ka naupa Samuel" tiin a hung ko a. Samuel chun, "Hi taka hin ka um" a ta.

17.

Eli chun, "Ieng thil am LALPA chun a hril che a? Ka lakah ieng khom ip naw rawh. I kuoma a hril po po chu ka lakah ip i nei chun i chungah Pathienin a nat thei ang tawpin thaw raw se" a ta.

18.

Chuongchun, Samuel chun iengkim chu ip nei der loin a hril a. Eli chun, "LALPA a na, tha a ti ang peiin thaw raw se" a ta.

19.

Samuel chu a hung inthang lien pei a, a kuomah LALPA a um a, a hril hrim hrim chu a sukdik pei a.

20.

Dan-a inthoka Beersheba chena Israel mihai po po chun Samuel chu LALPA zawlnei indik a ni takzet ti an hung hriet tah vong a.

21.

LALPA chu Silo-a chun a'n lar zui pei a, Samuel kuomah a thu a puong hlak a. Samuel thu chu Israel mihai po po lai a hung inthang suok ta a.

---

←  1Samuel (3/31)  →