1Samuel (29/31)  

1. Filistinhai chun an sipaihai po po chu Afek-ah an ko khawm a, Israelhai chun Jezrel-a tuikhur bulah thanghmun an khaw a.
2. Filistin lalhai chun an rawihai a za ruol le a sang tel tela an the darhai chu somin an fe zut zut a, Davida le a mihai chu Akis leh a hnung dalah an thang a.
3. Filistin kawmandarhai chun, "Hieng Hebrai mihai hin iem a na an hung thaw ve?" an ta. Akis chun, "Hi hi Davida, Israel lal Saula hnuoia ofisar a ni naw am a ni? Saula maksana ka kuoma a hung tluk lut nia inthoka voisun ni chen hin, kum khat neka tam rau ka kuomah a um ta a, a tlak nawna hrim hrim ka la hmu nawh" a ta.
4. Sienkhom Filistin lalhai chu a chungah an lung a sen a, "Chu pa chu i hmun ruotpeka khan inkirtir rawh, indonaa chu ei kuomah hung naw raw se, indonaah ei hmelma tieng thang pal hlau rawi a tih. Eini mihai lu lang a ta, a pu leh inrem nawk hlauh sing an ta.
5. Hi Davida hi a ni naw maw, lam pum a,Saulan a sanga sang a that,Davidan a singa sing a that"tia a chungchang thu hlaa an sak hlak kha?" an ta.
6. Akis chun David chu a ko a, "LALPA hringna salin ka hril, mi ringum i ni a, ka sipaia thang dingin ka dit em em che a. Ka kuoma i hung nia inthoka voisun ni chen hin i tlak nawna hrim hrim ka la hmu naw a, sienkhom lalhaiin an pom tlat naw che a nih.
7. Chuleiin, Filistinhai lalhai suklungninaw nekin lungawi takin kir lem el rawh" a ta.
8. Davida chun, "An leh iem a na ka thaw suol chu? Ka hung nia inthoka voisun chen hin i siehlaw laka hin thil indik lo i hmu hrim hrim am a ni? Ieng leiin am ka pu, lal hmelma do dingin ka fe ve thei naw ding?" a ta.
9. Akis chun, "Ka mita chu Pathien vantirko angin i tha a, amiruokchu Filistin kawmandarhaiin, 'Indonaa chu eini lai hung thei naw nih' an ti tlat a nih.
10. Chuleiin, i kuoma hung ve, i pu siehlawhai le hin zingkar inhma takin tho unla, khuo a var hlimin kir nawk ro" a ta.
11. Chuongchun, Davida le a mihai chu Filistin rama kir nawk dingin zing inhma takin an tho a, Filistinhai chun Jezrel an pan tung a.

  1Samuel (29/31)