←  1Samuel (26/31)  →
1. Zif mihai chu Saula umna Gibea-ah an fe a, "Davida chu Jesimon epa Havila muolah a'n bi a ni naw am a ni?" an ta.
2. Chuongchun, Saula chun a mi thlang thieu sangthum thuoiin Davida zong dingin Zif thlalera chun a fe thlak a
3. Saula chun Jesimon ep Havila muola lampui sira chun thanghmun a khuor a, Davida ruok chu thlalerah a'n kul thung a.
4. Ama zongin Saula a hung ti Davidan a hriet chun enthlatu mi a tir a, a hung tak tak ti an hriet chieng ta a.
5. Chuongchun, Davida chu a tho a, Saula thanghmun khuornaa chun a fe a. Saula le a sipai kawmandar Nera naupa Abner zalna chu a hmu a, Saula chu an riebuk sunga chun a zal a, a velin sipaiin an inhuol a.
6. Davida chun Hit mi Abimelek le Zeruia naupa Abisai, Joab unaupa kuoma chun, "Saula umna riebuka zu fe dingin a tu lemin am in mi zui ding?" a ta. Abisai chun, "Keiin zui ka ti che" a ta.
7. Zana chun Davida le Abisai chu sipaihai riebuka chun an zu fe a, Saula chu riebuk sungrila chun a lo zal a, a lu thluon tieng chun a fei chu hnuoiah a sun bur a. Abner le a mihai chu a vela chun ama inhuol tuokin an zal bok a.
8. Abisai chun Davida kuomah, "Voisun hin Pathienin i hmelma chu i kutah a pek che a ni hi. Chuleiin, fei hin hnuoi leh hang sun deng ka ti aw, voi hni ka sun ngai naw nih" a ta.
9. Davida chun Abisai kuomah, " That naw rawh. LALPA hriek nal chunga kut thlak tu am thiem chang an um hlak a?
10. LALPA hringna salin ka hril hi, LALPA chun a chungah kut thlak a tih, a thlak naw khoma a thi ni la hung tlung el a tih. Chu chu a ni naw le khom indonaah feng a ta, la thi el a tih.
11. LALPA hriek nal chunga kut thlak chu LALPAN mi phal lul naw raw se. A lu thluona fei le tuium kha chu la la, fesan ei tih" a ta.
12. Saula lu thluona a fei le a tuium chu Davida chun a lak a, an fesan a. LALPAN imu inhnik taka a'n intir tawl leiin tu khomin an hmu naw a, tu khom an thang har bok nawh.
13. Davida chu ral khing tieng a kai a, tlang sipah a ngir a, an inkar chu hla rei a ni tah.
14. Chu taka inthok chun sipaihai le Nera naupa Abner chu a ko khek a, "Abner, i mi hung don naw ding am a ni?" a ta. Abner chun, "Tu am i na lal hang ko tho ngam hrim hrim chu?" a ta.
15. Davida chun Abner kuomah, "Pasal i ni naw maw? I ni tak tak naw am a ni? Israelhai lai hin nangma ang tu am an um a? Iengtiziea i pu i veng tha naw am a na? Lal, i pu chu that dingin tuhai amanih an hung kha.
16. I thaw indik naw top a nih. LALPA hringna salin ka hril hi, LALPA hriek nal i pu i veng tha naw leiin nang le i sipaihai kha thi tlak in nih. Hang ngha vel la, lal lu thluona fei le a tuium kha khaw lai am an um ta a?" a ta.
17. Saula chun Davida rawl a nih ti a hriet a, "David, ka naupa, chu chu i rawl ngei an naw maw?" a ta. Davida chun, "Aw lal le ka pu, ka rawl ni e.
18. Iengtiziea ka pu hin a siehlaw hi a hnot thlur am a na? Ieng thil am ka thaw suol a, thiem naw changna ding ieng poi am ka tawk reng reng a?
19. Tu hin ka lalpa, ka pu hin a siehlaw thu hi ngaithla raw se. Mi do dinga i lungril chokthotu chu LALPA a ni chun thilhlan chu pom hram sien la, mihriem nauhai an ni ruok chun LALPA hmaah tongsie phurin um raw hai se. 'Fe la, pathien danghai rong va bawl rawh' tiin, LALPA rochung rama ka chanvo hluo ve thei lo dingin an mi hnot suok a ni hi.
20. Tu hin LALPA um nawna ram leilung hla taka hin ka thisen infartir lul naw ro. Tlanga varung pel dinga mi a ramsuok ang elin, Israel lal meu uihrik zong dingin a'n thok suok a ni hi" a ta.
21. Saula chun, "Thil suol ka lo thaw a nih. Ka naupa David, hung kir rawh. Voisun hin ka hringna chu i hlutsak leiin i sietna ding ieng khom thaw tum ta naw ning. Invet angin ka lo khawsa chieng khop el, nasa takin ka thaw suol a nih" a ta.
22. Davida chun, "Hi, lal fei chu ka kol hi, in tlangval laia pakhatin hung la raw se.
23. LALPA chun mi tin an fel le an ringum man a pek hlak a. LALPA chun ka kutah voisun hin a'n hlan che a, sienkhom LALPA hriek nal chungah kei chun kut thlak naw ning.
24. Voisuna i hringna ka ngaihlut ang bok hin LALPAN ka hringna ngaihlu sien, buoina po po lakah mi san suok raw se" a ta.
25. Saula chun Davida kuomah, "Ka naupa David, malsawmin um raw khai; thil ropui tak tak la thawng i ta, hnena chu chang ngei i tih" a ta. Chuongchun, Davida chu a fe a, Saula khom a in tieng a kir nawk ta a.
←  1Samuel (26/31)  →