1Samuel (25/31)  

1. Samuel chu a thi a, Israel mihai po po chu an pung khawm a, an sun a, a umna Rama khuoa chun an phum a. Chu zoah Davida chu Maonf thlaler tieng a'n son thla a.
2. Maon khuoa chun mi hausa pakhat a um a, a'n bengbelna tak chu Karmel tlang a na, chu taka chun beram sangthum le kel sang khat a vai a, a beram hmul vawin Karmel tlangah a um a.
3. A hming chu Nabal a na, a nuhmei hming chu Abigail a nih. Nu var tak le hmel tha tak a na, a pasal ruok chu pa biek intak le tikkom, Kaleb thlaa mi a nih.
4. Thlalera Davida a um lai chun Nabal chu Karmel tlangah a beram hmul vawin a fe ti a hriet a.
5. Chuongchun tlangval sawm a tir a, an kuomah, "Karmel tlanga khin Nabal kuomah hang fe unla, ka hmingin chibai hang buk ro.
6. Chun, a kuomah, 'I chunga le i sunghai chunga le i nei po po chungah dam sawtna le thlamuongna tlung raw se.
7. Beram hmul vawin hi taka hin i um ti Davidan a hriet a, i beram vengtuhai hi kan kuoma khawsa hlak an nizie dam, an poi ieng khom kan tawk ngai nawzie dam le Karmel tlanga an um sungin thil ieng khom an inhmang ngai nawzie dam lo hre ve la ti a nuom a.
8. Chu chu i beram vengtuhai indon la, anni ngeiin hril an ti che. Hi, ruoi the ni takin kan hung tlung a, kan tlangvalhai hi lo ditsak la, i nei ang ang chu i siehlawhai le i naupa Davida lo pe ve rawh tiin a mi'n cha a nih' tiin hril ro" a ta.
9. Davida rawihai an tlung chun Davida hmingin a thucha chu Nabal kuomah an hril a, a donna chu an nghak a.
10. Iemani chen hnunga chun Davida rawihai kuoma chun Nabalin, "Tu'm a na Davida chu? Jesai naupa chu tu am a na? Tu lai hin an puhai tlan hmangsan siehlaw an tam khop el.
11. Ka beihai, ka tuihai le ka beram hmul vawtuhai ta dinga ran ka that sa chu tu am an nih ti khom hriet lohai kuomah ka pek lul ding maw?" a ta.
12. Tlangvalhai chu an kir nawk a, chuong thu po po chu Davida an hril a.
13. Davida chun a mihai kuomah, "In kawlhnam pai seng ro" a ta, an pai a, Davida khomin a pai a, mi zali laiin Davida chu an zui tung a, mi zahni chu thuomhnaw veng dingin an sie a.
14. Nabal siehlaw laia pakhat chun Nabal nuhmei Abigail kuomah, "Thlalera inthokin chibai buk dingin Davidan ka pu kuomah mi a hung tir a, sienkhom ka puin a lo rau tawl a.
15. Nisienlakhom, hieng mihai hi kan chungah an tha em em a, phula kan um tlang sung po poin kan poi an tawk ngai naw a, kan thil ieng khom a'n hmang ngai bok nawh.
16. Anni bula beram kan veng sung po poin sun le zanin kan ta dinga kulpui an ni ringot a nih.
17. Tu hin ka pu le a sungkuohai chunga sietna hung tlung ding hi dawn la, iem i thaw thei in ngaituo rawh. Ama hlak hi tu khom biek thei lo khopa mi rilo a ni si a" a ta.
18. Abigail chun inhmaw takin bei tlang zahnih, uoiin peng pahnih, fak el theia inpei sa diem beram pum nga, bu em tang kilogram sawm le pasari, grep em tawl bawr zakhat le theichang em tawl phek zahni chu a lak khawm a, sabengtung a'n phurtir a.
19. Siehlaw tlangval kuoma chun, "Ka hmaah fe pei unla, hung zui ka ti cheu" a ta, sienkhom a pasal Nabal ruok chu a hril nawh.
20. A sabengtungah chuonga tlang kar leisekot a hraw lai chun Davida le a mihai chun an hung pan thlak a, an intuok ta a.
21. Davida chun, "Ieng khom a'n hmang nawna dingin hi pa thil nei po po hi a thlawn mei meiin ka lo vengpek a ni takluo ngei hi tie! Thil tha chu thil tha loin a mi thungrul ta si a.
22. Zingah zingkar chena a ta po po laia mi pasal naupang pakhat te khom ka hla vai chun Pathienin Davida hi a nuom ang angin law sien la, chu neka nasa khomin thaw raw se" a lo ti zo hlim hlol a nih.
23. Abigailin Davida a hmu chun a sabengtunga inthokin inrang takin a tum a, bawka hnuoi sikin chibai a buk a.
24. Chun, a ke bula chun a bokkhup a, "Ka lalpa, keima ngeiin thiem naw arbawm chu phur el ka tih. I siehlaw hin thu a hril ding phalpek la, i siehlawnu thu hril hi lo ngaithlapek hram rawh.
25. Ka lalpa hin mi rilo Nabal thu chu ienga khom ngai naw hram raw se, ama chu a hming ang char put zo, mi Invet a na, thil invetthlak a thaw hlak hrim a nih. Kei i siehlawnu hin ka pu hung tirh tlangvalhai chu ka lo hmu ve naw lei a nih.
26. Thisen insuo lo ding le i kuta phuba la lo dinga siemtu che chu LALPA a nih. Tu hin LALPA hringna le i hringna salin ka hril, i hmelmahai le i that nawna ding zongtuhai po po chu Nabal anga hrem ni raw hai se.
27. Pu, i ta dinga i siehlawin thilpek a hung chawi hi nangma hung zuitu tlangvalhai kuomah pek ni raw se.
28. I siehlawnu hin thaw suol a nei a ni chun lunginsiet takin ngaidam rawh. LALPA indona chu i bei leiin ama chun i lalna chu suknghet a ta, i dam sungin i chungah thil tha lo hrim hrim a tlung hmu naw ti nih.
29. I hringna lak tuma hnottu che um hai sienkhom, miin a rohlu a veng him tlat angin LALPA i Pathien chun ka pu hringna chu veng himpek a tih. I hmelmahai ruok chu miin saihlia saihlum a per hmang angin per hmang a tih.
30. LALPA chun a tiem anga i chunga thil tha po po intlungtir a, Israelhai lala a siem pha che chun,
31. ka pu hin a san um loa thisen insuo lo a, phuba i lak bok naw lei hin lungrila poitina le insirnain hnot zui naw ni che. LALPAN ka pu chunga thil tha a thaw pha chun i siehlawnu hi hung hre zing rawh aw" a ta.
32. Davida chun Abigail kuomah, "Voisuna mi hmuok dinga tirtu che LALPA, Israelhai Pathien chu inpakin um raw se.
33. Phuba la a, mi ka that ding voisuna mi'n pumpeltirtu i remhrietna chu malsawmin um bok raw se.
34. I chunga kut ka thlak ding vengtu chu LALPA a nih. Nangin mi lo hmuok vat naw la chu, LALPA Israelhai Pathien hringna salin ka hril, zinga khawvar chen hin Nabal mihai chu naupang pakhat te khom hla nei naw top ka tih" a ta.
35. Chuongchun, Davida chun a thil hung chawipekhai chu a lak a, "Thlamuong takin i in tieng kir nawk ta rawh. I thu ka ngaithlak a, i hnina khom ka pompek ta che" a ta.
36. Abigail chu Nabal kuomah a hang fe a, a ina chun lal ruoi the ang elin ruoi a lo the a, an rui leiin a hlim hle a, chuleiin zing khawvar hma chun ieng khom a hril nawh.
37. Zingkara Nabal uoiin inrui a hung har chun a nuhmeiin thil chinchang chu a hril a, a lung an chek dar a, a pumin a zeng ta vong a.
38. Ni sawm vel hnunga chun LALPAN Nabal chungah kut a thlak a, a thi ta a.
39. Davidan Nabal thi thu a hriet chun, "Nabalin hmusit taka a mi thawna laka phuba mi lapek a, a siehlawin thil tha lo a thaw ding laka cheltu LALPA chu inpakin um raw se. Nabal thil tha naw thaw chu ama lu chunga ngei LALPAN a'n tlaktir a ni chuh" a ta. Chun, Abigail chu a nuhmei dinga va be dingin Davida chun mi a tir a.
40. Davida siehlawhaiin Karmel tlanga Abigail kuom an tlung chun, "Davidan a nuhmei dinga thuoi ding chein a mi tir a nih" tiin ama chu an va biek a.
41. Ama chu a tho a, a bawka hnuoi sikin chibai a buk a, "In siehlawnu hi in rong bawl ding le ka pu ke sawp dinga siehlaw ka ni ie" a ta.
42. Abigail chu a tho vat a, sabengtung chungah a chuong a, a hnung zuitu nunghak pangahai le chun Davida mi hung tirhai chu a zui a, Davida nuhmeiah a um ta a.
43. Davida chun Jezrel-a mi Ahinaomi chu a lo nei ta bok a, a nuhmeiah an um ve ve ta a.
44. Saula naunu Mikal, Davida nuhmei ruok chu a pain Galim khuoa mi Laisa naupa Palti a lo inneitir tah hrim a nih.

  1Samuel (25/31)