←  1Samuel (24/31)  →
1. Filistin mihai a va hnot zam hnunga Saula a hung kir chun, "Davida chu Engedi thlalerah a um" tiin an hril a.
2. Saula chun Israelhai po po laia mi sangthum a thlang suokhai chu thuoiin, sakelhai tlatna ram lungkawhrot hmun tieng chun Davida zong dingin a'n thok suok a.
3. Lampuia chun beram riek khawmna puk pakhat hi a va tlung a, Saula chu inthier dingin a va lut a. Davida le a mihai chu puk ril tieng chun an um a.
4. Mihai chun, "Voisun ni hi a nih LALPAN i kuoma, 'I nuom ang anga i law dingin i hmelma chu i kutah peng ka ti che' tia a hril che kha" an ta. Chuongchun Davida chu a tho a, a rukin Saula silpuon hmor chu a va at thlak a.
5. A hnunga chun Saula silpuon hmor a at thlak chu a lungrilin an thiem naw hle a.
6. A mihai kuoma chun, "LALPA hriek nal, ka lalpa chunga hieng ang thil ka thaw amani le a chunga kut ka thlak chu LALPAN mi phalpek naw hram raw se, ama chu LALPA hriek nal ta sa a ni tlat si a" a ta.
7. Chuong ang thu chu hrilin Davida chun a mihai chu a zil a, Saula an bei chu a khap a. Chuongchun, Saula chun puk chu a suoksan a, a fe ta a.
8. Davida khom puka inthok chun a hung suok a, "Ka pu, ka lalpa" tiin Saula chu a ko zui a. Saula a hang ngha kir a, Davida chun hnuoi sikin chibai a buk a.
9. Davida chun Saula kuomah, "Ngai ta, 'Davida chun i sietna a zong a nih' tia mihaiin i kuoma an hril chu ieng dinga i awi hlak am a na?
10. Ngai ta, voisun hin hi puka hin LALPAN ka kutah a'n hlanzie che i mit ngeiin i hmu a; thenkhat chun sukhlum ding chein an mi ti a, sienkhom kei chun, 'Ka lalpa chungah kut thlak naw ning, LALPA hriek nal a ni leiin' ka ta, i hringna ka hla a.
11. Chu chau chu a ni nawh. Pa, en ta, i silpuon hmawr hlek khom ka chawi zing hi. I silpuon hmawr at thla thei sia ka that naw chea inthok khan ka kuta hin thil tha naw le bawsietna a um nawh ti le nangin ka hringna lak tumin mi zong mi zong la khom, i chungah ka suol ve nawh ti hre ngei ngei raw khai.
12. Nang le ei inkar thu hi LALPAN rel sien la, LALPA chun ka poi i tawkna chunga phuba chu mi la pek sien la, kei chun i chungah kut thlak naw hrim hrim ka tih.
13. Tienlai thuvar chun, 'Misuola inthokin thil suol a suok hlak' a lo ti a, chuleiin i chungah kut thlak naw ning.
14. Israel lal chu tu zong dinga inthok suok am a na? Tu am a na i hnot thlur hi? Ui thi hnung maw? Ui hrik maw?
15. Eini inkara roreltu chu LALPA ni raw se. Ka chungthu hi ngaituoin thiem mi'n chang sien, i kuta inthok hin mi san suok raw se" a ta.
16. Davidan a hril zo chun Saulan, "Ka naupa Davida, chu chu i rawl ngei chu a ni maw?" a ta, inring takin a tap a.
17. Saula bok chun, "Keima nek daiin i fel lem. Nang chun tha takin i mi thaw a, kei ruok chun tha lo takin ka thaw che a nih.
18. Voisun i kutah keima hi LALPAN pe zing si chea i mi sukhlum nawa inthok hin ka chunga i thatzie i suklang a nih.
19. Miin a hmelma hmu sien la, him rongin a'n suo ding maw? Voisuna i mi thaw thatna chungah LALPAN thil thain rul che raw se.
20. Ngai ta, lal i la hung ni ngei dingzie le Israel lalram khom i kut hnuoiah suknghet a ni dingzie ka hriet.
21. Chuleiin, ka thlahai le ka pa sungkuoa inthoka ka hming sukbo lo dingin LALPA hmingin ka kuomah inkham meuin thu intiemkam rawh" a ta.
22. Chuongchun, Davida chun Saula kuomah thu a'n tiemkam a. Saula chu a in tieng a kir a, Davida le a mihai chu kulbinga chun an kai a.
←  1Samuel (24/31)  →