←  1Samuel (23/31)  →
1. Chun, Davida kuomah,"Filistinhaiin Keila khuo an run a, an hrizawla buhai khom an lakpek vong a nih" tiin an hung hril a.
2. Davida chun Pathien a rawn a, "Inthok suokin Filistinhai chu ka zu bei ding am a ni?" tiin a'n don a. LALPA chun, "Filistin mihai chu zu bei la, Keila khuo chu zu san suok rawh" a ta.
3. Davida mihai ruok chun a kuomah, "Ngai ta, hienga Judai rama ei um hman hin ei ti a na, Keila khuoah zu fe a, Filistin sipaihai ei zu bei nawk lem lem chu a va tium nasa zuol awm de!" an ta.
4. Davida chun LALPA a rawn nawk a. LALPA chun, "Tho la, Keila-ah fe thla rawh, Filistin mihai chu i kutah peng ka ti che" a ta.
5. Chuongchun, Davida le a mihai chu Keilaa chun an fe thla a, Filistin mihai chu an zu bei a, an ranhai an lakpek a, an that teu a. Chuong ang chun Keila khuoa mihai chu Davidan a humhim a nih.
6. Keila khuoa Davida kuoma Abimelek naupa Abiathar a hung tlan chun thiempu zakuo a hung chawi a.
7. Chun, Keila khuoah Davida a fe ti Saula an hril chun, "Pathienin ka kutah a pek tah a ni chu; kul kotkhar le a kalna nei khuoah lutin Davida chun ama le ama a'n khum tang an ta chu" a ta.
8. Chuongchun, Saula chun Keila khuoa Davida le a mihai inhuol dingin a sipaihai chu a ko khawm a.
9. Saulan a chunga thil tha lo thaw dingin a phan ruk ti Davidan a lo hriet chun thiempu Abiathar kuomah, "Thiempu zakuo kha hung la rawh" a ta.
10. Davida chun Pathien kuomah, " Aw LALPA, Israelhai Pathien, Saula chun keima leiin khuo sukse dingin Keila-ah hung a tum ti thu ka lo hriet a.
11. Keila khuoa mihai hin kei le ka mihai hi Saula kutah mi peng an ti'm? I siehlawin ka lo hriet dan angin Saula chu a hung ding am a ni? Aw LALPA, Israelhai Pathien, lunginsiet takin i siehlaw hi mi hril rawh" a ta. LALPA chun, "Hung a tih" a ta.
12. Davida chun, "Keila khuoa mihai hin kei le ka mihai hi Saula kutah mi peng an tim?" a ta. LALPA chun, "Peng an ti che" a ta.
13. Chuongchun, Davida le a mi zaruk vel chu an tho a, Keila khuoa inthokin an suok a, a remchangna tieng hmun hmunah an insaseng pei a. Keila khuoa inthokin Davida a tlan suok tah ti Saula an hril chun an inthok suok ding chu an thulh ta a.
14. Davida chu Zif thlaler tlangrama kulbinga chun a um a. Ni tin tinin Saula chun Davida chu a zong a, sienkhom Pathienin a kutah a pek nawh.
15. Zif thlalera Hores hmuna a um laiin ama that tumin Saula a hung inthok ti Davidan a lo hriet a.
16. Chun, Saula naupa Jonathan chu Hores-a chun Davida kuomah a fe a, Pathiena innghat dingin a kut a sukhratpek a.
17. A kuomah, "Ti der naw rawh, ka pa Saulan i chungah kut thlak naw nih. Israelhai chungah lalin um i ta, kei i dottu ning ka tih. Ka pa Saula khomin chu chu a hriet vong a nih" a ta.
18. An pahni chun LALPA hmaah thu an thlung a. Chuongchun, Jonathan chu in tieng a kir nawk a, Davida chu Hores-ah a um ta zing a.
19. Zif mihai chu Gibea um Saula kuoma chun an fe a, "Davida chu keini lai, Jesimon sim tieng Hakila muola Hores kulbingah a'n bi zing a ni naw am a ni?
20. Chuleiin aw lalpa, i nuom hun hunah hung thla la, lalpa kuta ama pek chu kan mawphurna ni raw se" an ta.
21. Saula chun, "In mi ngaituona leiin LALPAN malsawm cheu raw se.
22. Kir nawk ta unla, a sulhnung le ama hung hmutuhai chu va dilsut zuol ro. Dawha nei taka che hlak a nih ti miin an mi hril a.
23. Inbiknaa a hmang hlak hmun po po sui suok unla, thu chieng tak leh ka kuomah hung nawk ro. Chu pha leh nangni ruolin hung ka ta, hi rama um hi a ni phot chun Juda mi sang tam tak lai khom zong suok ka tih" a ta.
24. Chuongchun, anni chu an suok a, Saula inthok suok hmain Zif tieng an kir nawk a, sienkhom Davida le a mihai chu Jesimon sim tieng Arabaa Maon thlalera chun an lo inson ta a.
25. Saula le a mihai chu Davida zong suok dingin an inthok a, chu chu Davida an hril a, Maon thlalera lungpui bel dingin a fe thlak a. Saulan a lo hriet chun Maon thlalera chun Davida chu a hnot a.
26. Saula chu tlang pang khing tieng chun a fe a, Davida le a mihai chu tlang let liem tieng an fe a. Saula tiin Davida chu inhmaw takin a tlan a; Saula le a mihai hlak chun Davida le a mihai chu man tumin an inhuol vel a.
27. Chuong lai tak chun Saula kuomah zuolko a hung a, "Inhmaw takin hung rawh, Filistin mihaiin ei ram an hung bei a nih" tiin a hung ko a.
28. Saula'n Davida a hnot lai chu a kirsan a, Filistin mihai bei ding chun a fe ta lem a. Chuleiin, hi hmun hi Sela Hamalekot tiin an ko tah a nih.
29. Chu taka inthok chun Davida chu a fe tung a, Engedi kulbinga chun a'n bi a.
←  1Samuel (23/31)  →