←  1Samuel (22/31)  →
1. Davida chun Gath khuo chu a suoksan a, Adulam pukah a fe a, chu taka chun a um ti a sunghaiin an lo hriet chun zu kan dingin an fe thla a.
2. Mi beidong le leibat neihai le lungawi nawna neihai chu a bula chun an hung fuon khawm a, an hotuah a um a, mi zali lai hiel an hung tling ta a.
3. Chu taka inthok chun Davida chu Moab ram Mizpa-ah a fe a, Moab lal kuoma chun, "Pathienin thil a mi thawpek ding ka hriet hma po chu ka nu le pahai hi i kuomah lo um raw hai se aw?" a ta.
4. Chuongchun Moab lal kuoma chun anni chu a maksan a, kulbinga Davida a um sung po chu chu taka chun an lo um a.
5. Chun, thiempu Gad chun Davida kuomah, "Kulbinga hin um zing loin Judai ramah fe rawh" a ta. Chuongchun, Davida chu a suok a, Heret ramngawah a lut a.
6. Saula chun Davida le a mihai chu an hmu suok tah ti thu a lo hriet a. Ama chu Gibea tlang tamariske thing buk hnuoiah fei chawiin a thung a, a rawihai chun an ngir huol a.
7. Saula chun an kuomah, "Nangni Benjamin mihai, ngaithla ro. Jesai naupain lo le grep huonhai a pek ding cheu a ni? Sipai sangkhat chunga kawmandar le zakhat chunga kawmandarin a sie tawl ding cheu am a ni?
8. Chu lei chu a ni, hienga ka chunga thil in phier ruk hi? Ka naupain Jesai naupa thu a thlungpui khom khan tu khomin in mi hril nawh. Tu khom a mi'n voi in um naw a, voisuna a thaw ang hin kei mi'n chan ruk dinga ka naupain ka siehlaw a'n fui por thu khom tu khomin in mi hril bok nawh" a ta.
9. Saula bula ngir Edom mi Doeg chun a lo don a, "Jesai naupa chu Nob khuoah Ahitub naupa Abimelek kuoma a hung ka hmu a.
10. Thiempu Abimelek chun LALPA a rawnpek a, fak ding a pek bok a, Filistin mi Goliat kawlhnam a pek bok" a ta.
11. Chu phing leh lal chun Ahitub naupa thiempu Abimelek le a pa sungkuo, Nob khuoa thiempu sinthaw po po chu a ko a, lal kuoma chun an rengin an hung a.
12. Saula chun, "Ahitub naupa, tu hin ngaithla rawh" a ta. Ama chun, "Ni e, ka lalpa" a ta.
13. Saula chun, "Bei le kawlhnam dam pe a, LALPA dam rawnpek a, voisuna a thaw anga mi do ding le mi'n chan ruk dinga ieng leia nang le Jesai naupa hin thu in phier ruk am a na?" a ta.
14. Abimelek chun lal kuomah, "Lal makpa, a vengtuhai che chunga kaptena i sie, i sungkuohai laia mi inzaum tak Davida anga i ta dinga ringum hi i siehlawhai po po lai hin tu am an um a?
15. Tuta tum chauh hi Pathien ka biek rawnpek tanna a ni am a ni? Ni lo e! Lal chun i siehlaw amanih a pa sungkuohai reng reng amanih mi'n tum naw raw se; i siehlaw hin nangni inkar thu po po hi ieng khom ka hriet ve der nawh" a ta.
16. Nisienlakhom lal chun, "Abimelek, i thi ngei ngei ding a nih, nang le i pa sungkuohai po po leh" a ta.
17. A bula ngir vengtu sipaihai kuoma chun, "Ngha kir unla, hieng thiempuhai hin Davida an san a, a tlan hmang ti hre zing sia an mi hril naw leiin, that vong ro" tiin thu a pek a. Amiruokchu, lal siehlawhai chun LALPA thiempuhai chunga chun kut an thlak nuom nawh.
18. Chu phing leh lal chun Doeg chu thu a pek a, "Ngha kir la, hieng thiempuhai hi bei rawh" a ta. Edom mi Doeg chu a ngha kir a, thiempuhai chu a bei a, thiempu zakuo hak mi sawmriet le panga a that a.
19. Chun, thiempuhai khuo Nob chu kawlhnamin a bei a, a nuhmei a pasalin, naupang le nene ne lai chenin, bawng le sabengtung le beramhai leh a sat hlum a.
20. Sienkhom Ahitub naupa Abimelek naupahai laia pakhat, a hming Abiathar chu a tlan suok hman a, Davida kuomah a tlan a.
21. Abiathar chun LALPA thiempuhai Saulan a that thu chu Davida a hril a.
22. Davida chun, "Kha nia Edom mi Deog lo um ve khan Saula a hril ngei ngei ding ti ka hriet sa hrim a nih. I pa sungkuohai po po chu keima leia thi an nih.
23. Nang chu ka kuomah um la, ti der naw rawh; nangma that tumtu che chun kei khom mi that a tum a nih. Ka kuomah i um chun him i tih" a ta.
←  1Samuel (22/31)  →