1Samuel (21/31)  

1. Davida chu Nob khuoa thiempu Abimelek kuomah a fe a. Abimelek chun inthin pumin a lo hmuok a, "An leh, makhat chaua hung i ni? Tu khom fepui i nei naw maw?" a ta.
2. Davida chun thiempu Abimelek kuomah, "Lalin thil iemani thaw ding a mi dande a, 'I thil thaw ding le ka thupek che hi mi dang tu khomin hre naw raw se' a ti a nih. Ka mihai le kan inhmuna hmun ding ruok chu ka hril tawl tah.
3. Tu hin i kutah iem kol i nei a? Bei tluon nga mi pe la, an naw khoma i nei thei ang zat zat chu" a ta.
4. Thiempu chun Davida kuomah, "Bei pangngai chu kol ka nei der nawh. Bei thienghlim hlanbei ruok chu ka nei, tlangvalhai chu nuhmei laka an thienghlim phot chun" a ta.
5. Davida chun, "Kan suok naran chang khomin nuhmei lakah kan inthier fihlim hlak hrim hrim a. Tu lem hin chu thil poimaw bik thaw dinga suok kan ni leiin thienghlim nawkzuol ngei an tih" a ta.
6. Chuongchun, thiempu chun hlanbei chu a pek a; chu taka chun hlanbei, LALPA hmaa inthoka an lak nia bei tharlama an thlak zie hlak ti chauh naw chu bei dang a um nawh.
7. Chun, chu ni chun Saula siehlaw laia mi pakhat, a hming Doeg, Edom mi, Saula beram enkoltuhai laia lu tak chu LALPA hmaa thil hlen ding a nei leiin chu taka chun a lo um ve a.
8. Davida chun Abimelek kuomah, "Fei amanih kawlhnam amanih i kol naw maw? Lalin inhmaw thuta a mi tir a ni leiin ka kawlhnam le hriemhrei dang ieng khom ka hung chawi hman naw a nih" a ta.
9. Thiempu chun, "Ela ruoma i that, Filistin mi Goliat kawlhnam kha thiempu zakuo hnunga khan puona tuomin a um kha. Chu chu i lak nuom chun la la, chu naw chu a dang a um nawh" a ta. Davida chun, "Chu bak bak chu iem, mi hung pe raw khai" a ta.
10. Davidan Saula chu a ti leiin chu ni la la chun Gath lal Akis kuomah a tlan a.
11. Akis siehlawhai chun, "Ama hi a ram lal Davida kha a va hoi de! 'Saulan a sanga sang a that,Davidan a singa sing a that'tia lam puma a chungchang thu hlaa an sak dur dur kha a ni naw maw?" an ta.
12. Davida chun chuong thu chu a lungrilin a pai zing a, Gath lal Akis chu a ti ta hle a.
13. Chuongchun, an renga hmaa chun a um dan a sukdanglam a, invet nungchang a'n sir a, kotkharhai a thai tiel a, a khakhmulah a zer huom a'n fartir duon duon a.
14. Akis chun a siehlawhai kuomah, "En ta u, invet a nih ti hre zing sia ieng dinga ka kuomah in hung thuoi am a na? Mi invet ka tlaksam leia ka hmaa a'n vetzie inentir dinga in hung thuoi a ni? Hi mi hi ka inah hung chuong lut hrep naw raw se" a ta.
15. (A um nawh)

  1Samuel (21/31)