← 1Samuel (20/31) → |
1. | Davida chu Rama khuo Naioth- a inthokin a tlan hmang a, Jonathan kuomah a fe a, a kuomah, "Iem a na ka thaw suol? I pa poi ieng am ka tawk a, hienga mi that a tum hi?" a ta. |
2. | Jonathan chun, "That naw top a ti che. Thi naw ti nih. Ngai ta, ka pa hin thil lien amanih thil chin amani khom mi hril loin ieng khom a thaw ngai nawh. Ieng leiin am hi thu hi ka lakah a ip ding? Ip naw top a tih" a ta. |
3. | Davida chun, "I pa chun i mi ditsakzie hi a hriet chieng a. 'Hi thil hi chu Jonathanin hre naw raw se, a sukbeidong awm em el' a ti lungril khom a ni el thei. Chuong chu a ni lai zingin, nangma le keima inkara tla thei chu thina chau hi a nih ti Pathien hringna le i hringna salin ka hril" a ta. |
4. | Jonathan chun, "Thaw dinga i mi ti taphot chu i ta dingin thawng ka tih" a ta. |
5. | Davida chun, "Ngai ta, zing hi thla thar lawmna hun a ni ta a, lal kuoma ruoi ka kil ngei a ngai a, sienkhom ni thum ni zan tieng chenin phul tieng inbiru dingin fe lem el ka tih. |
6. | I pain ka um naw hi a hriet suok leh, 'Davida chun a khuo Bethlehema fe vak dingin a mi hni a, an sungkuo ta dinga kum tina inthawina an nei hun a ni leiin' lo ti rawh. |
7. | A tha chu' a ti leh i siehlaw hi a him ning a ta, sienkhom a lung a sen ruok chun ka poi tawk a tum tlat a nih ti hre chieng thei i tih. |
8. | I siehlaw chunga hin ngilneina insuo rawh, nang le zawla inman dingin LALPA hmaah thu ei thlung ta si a. Bawsiet ka nei a ni chun nangin mi that el rawh. Ieng leiin am i pa kuta chun i mi pek suok ding?" a ta. |
9. | Jonathan chun, "Chu chu thaw ngai naw ning. Ka pain i chungah poi tawk a tum ti ka hriet phot chun ka hril naw ding che am a ni?" a ta. |
10. | Davida chun Jonathan kuomah, "I pain bul deuin lo don sienla che, tuin am mi hril tang a ta?" a ta. |
11. | Jonathan chun, "Hung ta, phula son va fe vak ei tih" a ta, an fe ta a. |
12. | Jonathan chun Davida kuomah, "LALPA Israelhai Pathien chu hrepuitu ni raw se. Hieng ang huna hin zingah an naw leh zing nawk hin ka pa lo dawp ka ta, a ditsak che chun hung hril ngei ka ti che. |
13. | I poi tawk a la tum tlat a, chu chu ka hril naw che amanih, him taka ka'n suoktir che amanih a ni naw chun, LALPAN Jonathan hi ieng anga na khomin a law lawin law raw se. LALPA chu i kuomah um raw se, ka pa kuoma a um hlak ang bokin. |
14. | Ka dam sung phot chun LALPA lunginsietna chuoi lo chu ka chungah inlangtir zing la, |
15. | ka thi khomin ka sungkuohai chungah i lunginsietna chu tawp naw sien la, LALPAN Davida hmelmahai po po hnuoi chunga inthoka a sukbohmang vong chen khomin tawp naw raw se" a ta. |
16. | Chuongchun, Jonathan chun, "LALPAN Davida hmelmahai chu zong suok raw se" tiin Davida sungkuo le chun thu a thlung a. |
17. | Jonathan chun Davida chu a hringna tluka a hmangai leiin Davida khoma ama chu hmangai zing dingin thu a'n tiemkamtir nawk a. |
18. | Jonathan chun Davida kuomah, "Zing hi thla thar ni a ni ta a, i thungna a ruok ding a ni leiin i um naw chu inhriet hleng a tih. |
19. | Zing nawk zan tieng hin kha hmaa buoina intan hlima i'n bikrukna hmuna khan hung la, Ezel lungpui bula bok khan mi lo nghak rawh. |
20. | Inthemthiem ni awm takin thal pathum a sira khan hung kap ka ta. |
21. | Chun, naupang kuomah, "Ka thalhai kha va zong rawh" tiin tir ka ta. "En ta, thal chu i hnung tieng khan a um, la la, hung chawi rawh" ka ti chun, LALPA hringna salin ka hril, a muongum a, i ta dingin ti ding a um nawh tina ning a tih. |
22. | Amiruokchu, naupang kuomah, "En ta, thalhai chu i khel tieng son a um" ka ti chun fe hmang nghal rawh; LALPAN a'n fe hmangtir che ning a tih. |
23. | Chun, hi hi hre zing rawh, nang le keiin hi chungchanga ei thu hril mi hrepuitu chu LALPA ni kumkhuong a tih" a ta. |
24. | Chuongchun, Davida chu phula chun a'n bi a, thla thar ruoi kil hun a hung tlung chun lal chu kil dingin a'n thung a. |
25. | Lal chu ni danga a thungna pangngai bang hnaia chun a thung a, Jonathan chu a hma zawna chun a thung a, Saula dotah Abner a thung a, Davida thungna chu a ruok a. |
26. | Amiruokchu, chu ni chun Saulan ieng khom a hril nawh. "A chungah thil ieng amani a tlung leia thienghlim lo ning a tih, ni ngei ngei a tih" a ti lungril a. |
27. | Amiruokchu, a ni hnina khom chun Davida hmun chu a la ruok ta zing leiin Saula chun a naupa Jonathan kuomah, "Ieng leia Jesai naupa hi zani le voisun khom ruoi kil dinga a hung ve naw am a na?" a ta. |
28. | Jonathan chun, "Davidan Bethlehema fe phalna nasa takin a mi hni a. |
29. | Mi'n fetir hram rawh khai. Kan khuoah kan sungkuoin inthawina kan nei ding a na, ka uhaiin hung ngei dingin an mi'n cha a nih. I mit tlunga ka um a ni phot chun ka unauhai hmu dingin mi'n fetir hram raw khai' a ta. Chu leia lal dawkana hung kil ve thei lo a nih" a ta. |
30. | Saula lungsen chu Jonathan chunga chun a'n tek a, "Nang, nuhmei kawmaw le lulul naupa, Jesai naupa chu i muolphona ding le a hringtu che i nu muolphona dingin i thlang ti ka hriet nawa i bawl a ni? |
31. | Jesai naupa dam sung chun nang le i lalram chu suknghet ni ngai naw nih. Chuleiin, inkotir nghal la, ka kuomah hung thuoi ro, a thi ngei ding a nih" a ta. |
32. | Jonathan chun a pa Saula chu a don a, "Ieng leiin am sukhlum a ni ding? Iem a thaw suol hrim a?" a ta. |
33. | Saula chun khaw tumin a fei chu a hlang ur a, chu taka inthok chun Davida chu that a lo tum tak tak a nih ti Jonathan chun a hriet ta a. |
34. | Lungsen takin dawkana inthok chun Jonathan chu a tho a, a pain muolpho taka Davida a soisak lei chun poi a ti a, chu thla ni hninaa chun ruoi chu a kil ve ta nawh. |
35. | Zingkar chun Jonathan chu Davida hmu dingin phula chun a fe a, naupang a thuoi a. |
36. | Naupang kuoma chun, "Tlan la, ka thal kaphai hi va zong raw khai" a ta. A tlan charin thal chu ama khela chun a kap a. |
37. | Naupangin Jonathan thal kap thlakna hmun a va tlung chun Jonathanin, "Thal chu i khela mi saw an naw maw?" a ta. |
38. | Chun, Jonathan bokin, "Hung tlan nawk nghal rawh. Inhmaw la, muong naw rawh" a ta, naupang chun thal chu a rut khawm a, a pu kuom tieng chun a hung tlan a. |
39. | (Naupang chun chu thil chu ieng khom a hriet ve nawh, Jonathan le Davida chauin an hriet a nih). |
40. | Jonathan chun a hriemhreihai chu naupang kuomah a pek a, "Chawi la, in tieng lo kir nawk ta rawh" a ta. |
41. | Naupang a fe hnung chun Davida chu lungpui sim tieng panga inthok chun a hung suok a, Jonathan hmaah bawka hnuoi sikin voi thum a bokkhup a, an infawp a, an tap a, Davida chu a tap nasa zuol bik a. |
42. | Jonathan chun Davida kuomah, "Thlamuong takin fe ta rawh. 'LALPA chu nang le ei inkar le ka thlahai le i thlahai inkara kumkhuoa hrepuitu a nih' tiin LALPA hmingin inruolthatna thu ei intiemkam ta kha" a ta. Chuongchun, Davida chu a fe a, Jonathan khom chu khuo tieng a kir nawk ta a. |
← 1Samuel (20/31) → |