←  1Samuel (18/31)  →
1. Davidan Saula kuoma thu a hril zo chun Jonathan lungril chu Davida chungah a fu ta hmak a, ama a'n hmangai ang topin a hmangai a.
2. Chu nia inthok chun Saula chun Davida chu a pa in tieng infetir phal ta loin ama inah a'n umtir nghal a.
3. Jonathan chun David chu lungril taka a ngaina leiin dam sunga ruol tha ni dingin zawlin a man a.
4. A zakuo fuol hak lai chu a hlip a, Davida a pek a, a thuom le a kawlhnam le a thalngul le a kawngchun chenin a pek sa a.
5. Saulan thil thaw dinga a tirna taphotah hlawtling taka a hlen pei leiin Davida chu a sipaihai lai ngirhmun insang takah Saula chun a hlangkai a. Chu chun mipui po po le Saula thoktuhai chen khom a suklawm a.
6. Davidan Filistinpa a that hnunga mihai an hung kir chun, Israel khaw tinah nuhmeihai chu hla saka lamin khuong le dar le tum rik thei tinreng leh hlim takin Lal Saula hmuok dingin an hung suok a.
7. Nuhmeihai chun lam pumin,Saulan a sanga sang a that a,Davidan a singa sing a thattiin an insam a.
8. An hla sak chun hmai sen rak khopin Saula lung a suksen el a. "Davida chu a singa sing thatah an ngai a, kei chu a sanga sang chauh thatah an mi ngai a na, a ram ti ngot naw chu chang naw muol ieng am a nei ta a?" tiin a ngaituo a.
9. Chu nia inthok chun Saula chun David chu a thik ta em em a.
10. A zinga chun Pathien tir thlarau suolin Saula chu nasa takin a hung soisak a, ni danga a thaw dan pangngaiin Davidan tingtang a tum lai chun thu a hril buon buon a.
11. Saula chun fei a chawi a, "Banga son Davida hang khaw de chor ka tih" tiin a khaw a, Davida chun voi hnih a'n tawl kiengsan hman a.
12. Davida kuomah LALPA a um a, ama hlak a maksan ta si leiin Saula chun Davida chu a ti a nih.
13. Chuleiin, Davida chu a son hmang a, sipai sang chunga kawmandar-ah a sie a, an ral beinaah Davida chun hma a thuoi a.
14. A kuomah LALPA a um leiin a thilthaw taphotah nasa takin a hmuingil a.
15. A hlawtlingzie Saulan a hriet chun ama chu a ti nawkzuol a.
16. Israelhai le Judahai po po ruok chun ral beinaa an hma thuoitu a ni leiin Davida chu an ngaina hle a.
17. Chun, Saula chun Davida kuomah, "Ka naunu upa lem Merab hi i nuhmei dingin ka pek che. Huoisen takin ka rong bawl phot la, LALPA indonaa hin thang la nasa rawh" a ta. Saula chun a lungrilin, "Kei chun a chungah kut thlak naw ning. Filistinhaiin thaw lem raw se" a ti a.
18. Davida chun Saula kuomah, "Lal makpa ni dingin kei hi tu am ka na, ka sunghai le kan pahnam hi Israelhai lai khom ieng am an ni a?" a ta.
19. Amiruokchu, Saula naunu Merab le Davida innei hun a hung tlung chun Meholat mi Adriel nuhmei dingin Saula chun a pek lem ta dai a!
20. Saula naunu Mikal chun Davida a ngaizawng a, chu thu chu Saula kuomah an hril a, a lawm hle a.
21. Saula chun a lungrilin, "A'n awkna ding chang le Filistin mihaiin a chunga kut an thlakna remchang a ni takduoiin ka naunu chu peng ka tih" a ta. Chuleiin, Saula chun Davida kuomah, "Voisun hin ka makpa ni theina remchang i nei nawk tah" a ta.
22. Saula chun a siehlawhai kuomah, "Arukin Davida inbiekpui unla, 'Ngai ta, lal chu i chungah a lawm hle a, a siehlawhai po po khomin an hmangai che a, chuleiin lal makpaah um rawh' ti ro" a ta.
23. Chuong thu chu siehlawhai chun Davida an hril sawng a. Davida ruok chun, "Lal makpa ni hi thil tenaua in ngai am a ni? Kei chu mi rethei le tu hriet hlaw lo ka ni hi" a ta.
24. Saula siehlawhaiin Davida thu hril an ripawt chun Saulan,
25. "Davida kuomah hi thu hi va hril ro: 'Lal chun hmelma chunga phuba lakna dingin Filistinhai ser vun hmawr zakhat ti naw chu a naunu man dingin ieng khom a dit nawh' ti ro" a ta. Filistinhai kuta Davida inthitir dan ding chu chuong ang chun Saulan a phier ruk a nih.
26. Saula siehlawhaiin chuong ang thu Davida an hril chun, lal makpa a hang ni el ding chu a lawm hle a.
27. Ni tiem a bo hmain Davida le a mihai chu an inthok suok a, Filistin mi zahni an that a, an ser vun hmawr chu a hung chawi a, lal makpa a ni theina dingin lal chu kim takin a pek a, Saula chun a naunu Mikal chu nuhmeiah a'n neitir ta a.
28. Saula chun Davida kuomah Pathien a um ti le a naunu Mikal chun a hmangai ti a hung hmu chieng ta a.
29. Chu taka inthok chun Saula chun Davida chu a ti nawkzuol a, a dam sunga a hmelma a hung ni ta a.
30. Filistin sipai kawmandarhai chun an hung indopui zing a, an hung do zatin Davida chu Saula kawmandar danghai nekin a hlawtling lem zie a, a hming chu a hung inthang ta em em a.
←  1Samuel (18/31)  →