←  1Samuel (17/31)  →
1. Filistin mihai chun indo dingin an sipaihai an khawm a, Judai rama Soko khuoah an pung khawm a, Soko le Azeka inkara Efes Damim-a chun thanghmun an khaw a.
2. Saula le Israel mihai khom an pung khawm a, Ela ruomah thanghmun an khaw a, Filistinhai lo dang dingin an inzar phar a.
3. Filistinhai chun tlang pakhat an hluo a, Israelhai chun tlang dang an hluo a, an inkara chun ruom a um a.
4. Gath khaw mi a hming Goliat chu Filistinhai inkulnaa inthok chun Israelhai chu cho dingin a hung suok a. A dung chu meter thum deuthawa insang a nih.
5. Dar awmphaw kilogram sawmnga pasaria rik a hak a, dar lukhum a khum bok a.
6. Dar ngal phaw a ngala chun a bun a, a ruongzang tieng chun dar fei a pai a.
7. A fei ngul chu puonkhawngna themtlang tiet a na, a fei lu zum chu kilogram saria rik a nih. A phaw chawitu chu a hmaah a fe a.
8. Goliat chu a ngir a, Israel sipaihai chu a khek khum a, "Indo dinga ieng leia in mi hung ep am a na? Kei hi Filistin mi ka ni naw maw? Nangni khom Saula siehlawhai in ni naw maw? Nangni laia pakhat thlang suok unla, a mi bei dingin hung thla raw se.
9. A mi hnea a mi sukhlum chun in siehlawah um kan ta, keiin ka ngama ka sukhlum ruok chun kan siehlawah um in ta, kan rong bawl in tih" tiin.
10. Filistin mi bok chun, "Voisun hin Israel sipai po po ka cho cheu. Mi pakhat hung thlang suok unla, lo inbei kan tih" a ta.
11. Filistinpa rawl an hriet chun Saula le a sipaihai chu zamzalin an inthin hawp a.
12. Chun, David chu Efrat mi Jesai naupa, Judai rama Bethlehem khaw mi a nih. Jesai chun nau pasal pariet a nei a, Saula hun lai chun upa tak le tar tak a ni tah.
13. Jesai naupahai laia a upa tieng pathum chun indonaah Saula an zui a, chuonghai chu an upat dan indotin Eliab hai, Abinadab hai le Sama hai an nih.
14. Davida chu an unau laia naupang tak a na, Saula zuituhai chu a upa tieng pathum an nih.
15. Davida chu Saula kuoma inthokin Bethlehema a pa beram enkol dingin a fe zing zing hlak a.
16. Ni sawmli sung zet el chu Filistinpa chu zing tieng le zan tieng zatin a hung suok a, Israelhai chu a cho hlak a.
17. Ni khat chu Jesai chun a naupa Davida kuomah, "Bufai zeu tawl kilogram sawm le bei tluon sawm hi chawi la, i unauhai inkulna hmunah va tlanpui vat raw khai.
18. Chun bawngnene khal tlang sawm hi an pawla sangkhat chunga kawmandar ta dingin chawipek bok la, i unauhai iem an chang hung indon la, an chanchin hung hawnkir rawh.
19. Saula le anni le Israel mi po po chu Filistin mihai beiin Ela ruomah an um a nih" a ta.
20. Zingkar inhma takin Davida chun a ran ruolhai chu berampuhai kuomah maksanin a pa Jesaiin thu a pek ang chu phurin a uhai inkulna tieng panin a suok a. Ral bei dinga sipaihai an inthok mek lai le an khek dur dur lai chun an inkulna chu a va tlung a.
21. Israelhai le Filistinhai chu inbei dingin an lo inzar phei a, sipai le sipai chu an lo inep thup el a.
22. Davida chun a thil chawi chu fak ding enkoltuhai kuta chun a sie a, sipaihai umna tieng chun a tlan a, a uhai chu chibai a buk a.
23. Chun, a unauhai a biek lai chun Filistinhai mi suongtawlol Goliat, Gath khuoa mi chu sipai pawlhai laia inthokin a hung inchawm suok a, a chona thu pangngai bok a hril nawk a, chu chu Davidan a lo hriet a.
24. Israel mihaiin chu pa an hmu chun ti em emin an tlansie a.
25. Israel mihai chun, "Kha mihriem hung suok kha in hmu am? Israel mihai cho dinga hung suok a ni kha. Tu khom ama that thei taphot chu lalin nasa takin sum tieng sukhausang a ta, a naunu peng a ta, a pa sungkuohai chun Israel rama hin leiman le sie ieng khom chawi ve naw ni hai" an ta.
26. Davida chun a bula ngirhai kuomah, "Hi Filistinpa thattu le Israelhai hmingsietna sukretu chunga chun ieng am ie an thaw ding chu? Hi sertan lo Filistinpa hi tu am a na, Pathien hring sipaihai a hang cho ngam vei chu?" a ta.
27. Anni chun, "A sukhlumtu taphot chu kan hril tah ang khan a chungah thaw ning a tih" an ti nawk a.
28. Davida u a upa takin mihai kuoma a sang thuhril a lo hriet chun Davida chungah nasa takin a lung a sen a, "Ieng dinga hi taka hung thla ve che? Thlalera beram tlawmte kha tu am i'n vengtir a na? I chapozie le i lungril ritlozie ka hriet. Indo en ding damin maw i hung mei mei chu?" a ta.
29. Davida chun, "Iem a na ka thaw suol? Ka tong khom in khap a ni?" a ta.
30. Chuongchun, mi dang kuom tieng a ngha a, a hril ngai bok chu a hril nawk a, mihai chun a hmaa an don ang bok khan an don nawk a.
31. Davida thu hril lo hretuhai chun Saula kuomah an hril sawng a, Saula chun a ko a.
32. Davida chun Saula kuomah, "Hi pa lei hin tu khomin lung sukhnuol naw raw hai se; i siehlaw hi feng ka ta, keiin va bei ka tih" a ta.
33. Saula chun, "Hi Filistinpa bei ding hin nang em chu fe lo e. Tleirawl chauh i la ni a, ama ruok chu a tleirawla inthoka indo mi a ni si a" a ta.
34. Sienkhom Davida chun Saula kuomah, "I siehlaw hin ka pa beram ka veng hlak a. Sakeibaknei amanih savom amanih an hung a, beram ruol laia beram te an lak chang a um hlak.
35. Chuonghai chu ka hnot a, ka bei a, an baua inthokin ka san suok hlak a; chun, mi bei dinga an hung inthok changin an bak hmulah ka man a, ka bei a, ka that hlak a nih.
36. I siehlaw hin sakeibaknei le savomhai khom ka that ta hlak. Chuong ang bok chun sertan lo Filistinpa khom hi ka soisak ding a nih, Pathien hring sipaihai dam a hang cho ngam vei chu.
37. Sakeibaknei kutbawr le savom kutbawra inthoka mi sansuoktu LALPA chun hi Filisitinpa kuta inthok khom hin mi sansuok ngei a tih" a ta. Saula chun, "Chuong an leh fe raw leh, LALPAN umpui a ti che" a ta.
38. Ama thuomin Saula chun Davida chu a'n thuomtir a, dar lukhum a'n khumtir a, awmphaw a'n haktir bok a.
39. Davida chun a thuom chungah kawlhnam a pai a, hang fe a tum a, chuong ang chun a la thaw ngai si naw leiin Davida chun Saula kuomah, "Ka la thaw thang naw leiin hieng hin chu fe thei naw ning" a ta, a hlip nawk a.
40. Chuongchun, a hmol chu a chawi a, vadungtea lung inmum tha panga a rut a, a beram vengna mansaa chun a pai a, a kuta virvom chawiin Filistinpa chu a pan ta a.
41. Filistinpa chu a hung phei a, Davida chu a hung pan hnai a, a phaw chawitu chu a hmaa chun a fe a.
42. Filistinpa chu a hang ngha a, Davida a hmu chun a tham naw hle a, sar veng vong, mit meng mawi tak le tleirawl el a ni si a.
43. Davida kuoma chun, "Ui am ka ni, hmol le i mi hung pan chu?" a ta. Filistinpa chun an pathienhai hming salin Davida chu tongsie a'n phur a.
44. "Hi taka hin hung rawh, i taksa kha chungleng vatehai le ram sahai lo infaktir ka tih" a ta.
45. Davida chun Filistinpa kuomah, "Nang chu kawlhnam dam, fei dam, feite dam chawiin mi bei dingin i hung a, kei ruok chu i cho pung pung Iengkim LALPA, Israel sipaihai Pathien hmingin ka hung bei che a nih.
46. Voisun hin nang hi ka kutah LALPAN a mi pek ding a na, hneng ka ti che a, i ring tan ka tih. Filistin sipaihai ruong chu voisun hin chungleng vatehai le ram sahai ka'n faktir ding a nih. Chuongchun, hnuoi chunga mi po po hin Israelhai lai Pathien a um ti hre thei an tih.
47. Chun, LALPA chun kawlhnam le feiin a sandam nawh ti pungkhawm po po hin hre thei bok an tih. Indona chu LALPA indona a ni si a; Ama chun kan kutah nangni rawi hi a mi pek ding a nih" a ta.
48. Bei dinga Filistinpain a hung pan hnai lai chun Davida chu inrang takin sipaihai umna tieng chun lo bei dingin a tlan phei a.
49. Davida chun a mansa a pur a, lungte a phor a, a virvom chun Filistinpa chaldar takah a deng a, a chalah lung chu a tlum a, a khupbokin a tlu ta ruoi ruoi el a.
50. Chuongchun, Davida chun Filistinpa chu saihli le lungtein a ngam a, kawlhnam thang der loin a per thluk a, a that ta a.
51. Davida chu a tlan a, Filistinpa bula chun a va ngir a, a kawlhnam chu a paia inthokin a lak suok a, chu chun a that a, a lu chu a tan a. Filistinhaiin an mi hrat khawkheng a thi ti an hriet chun an tlansie a.
52. Israel mihai le Juda mihai chu an tho a, an khek dur dur a, Filistin mihai chu Gath chen le Ekron kul kotkhar chen an hnot a. Filistin mi an thathai chu Saraim lampui intluonin, Gath-a inthoka Ekron chenin an inthal pheng phung a.
53. Israelhaiin Filistin mihai an hnot chu an hung kir a, an riebuk chu an rok a.
54. Davida chun Filistinpa lu chu a lak a, Jerusalemah a fepui a, a ralthuom ruok chu a puon inah a sie a.
55. Filistinpa bei dinga Davida a fe lai Saulan a hmu khan a sipai kawmandar Abner kuomah, "Abner, hi tleirawl hi tu naupa am a na?" a ta, Abner chun, "I hringna salin ka hril, aw lalpa, ka hriet der nawh" a ta
56. Lal chun, "Hi naupang hi tu naupa am a na ti indon suok rawh" a ta.
57. Filistinpa a that zo hung kir tieng Davida chu Abnerin Saula kuomah a thuoi a, Filistinpa lu chu a la chawi zing a.
58. Saula chun, "Tu naupa am i na, tlangval?" a ta. Davida chun, "Bethlehema mi, i siehlaw Jesai naupa ka nih" a ta.
←  1Samuel (17/31)  →