← 1Samuel (16/31) → |
1. | LALPA chun Samuel kuomah, "Ka mi Israelhai lal dinga ka hnawl ta hnung Saula hi ieng chen am i sun ding a na? I hriek bur fungkiah hriek thun sip la, fe rawh. Bethlehem khuoa Jesai kuomah ka tir ding che a nih. A naupahai laia mi lal dingin ka ruot tah" a ta. |
2. | Samuel chun, "Iengtin am fe thei ka ta? Saulan a lo hriet chun a mi that el ding a nih" a ta. LALPA chun, "Bawngla tuoi kei la, 'LALPA kuoma inthawi dinga hung ka nih' ti rawh. |
3. | Chun, inthawinaa chun Jessai chu ko la, i thaw ding hril ka ti che. Mi ka kawkhmu ding che chu hriek i mi nalpek ding a nih" a ta. |
4. | Samuel chun LALPA hril angin a thaw a. Bethlehem a tlung chun a khaw upahaiin inthin pumin an lo hmuok a, "A tha tienga hung am i ni?" tiin an indon a. |
5. | Samuel chun, "A tha tienga hung ni e, LALPA kuoma inthawi dinga hung ka nih. Insukthieng unla, inthawinaah hung ro" a ta. Chun, Jesai le a naupahai chu a sukthieng a, inthawinaa hung thang dingin a fiel a. |
6. | An hung tlung chun Samuelin Eliab chu a hmu a, a lungrilin, "LALPA hriek nal ding chu LALPA hmaa um hi a ni ngei el" a ta. |
7. | Sienkhom, LALPA chun Samuel kuomah, "A hmel tieng amanih, a dung insang tieng amaniah en naw rawh, ama hi chu ka dit nawh. LALPA chun mihriem en dan angin a en ve nawh; mihriem chun puo tieng inlang dan an en hlak a, LALPA ruok chun lungril tieng a en lem hlak a nih" a ta. |
8. | Chun, Jesai chun Abinadab a ko a, Samuel hmaa chun a hungpui a. Ama chun, "Hi khom hi LALPA thlang a la ni nawh" a ta. |
9. | Jesai chun Sama a hung thuoi a, Samuel chun, "Hi khom hi LALPA thlang a la ni naw rop" a ta. |
10. | Chuongchun, Jesai chun a nau pasarihai chu Samuel hmaah a hung inlangtir a, Samuel chun Jesai kuomah, "Hienghai khom hi LALPA thlang an la ni nawh." a ta. |
11. | Samuel chun Jesai kuomah, "Hitaka hin i naupahai an kim vong a ni?" a ta, ama chun, "A naupang tak a la um nawh, beram a veng a nih" a ta. Samuel chun Jesai kuomah, "Va'n kotir raw khai. A hung tlung hma khat chu ei tan thei naw ding a nih" a ta. |
12. | Chuongchun, a va'n kotir a, an hung thuoi a. Ama chu sar veng vong, hmel tha tak le mit meng mawi tak a nih. LALPA chun Samuel kuomah, "Ama hi a nih; tho la, hriek va nal rawh" a ta. |
13. | Samuel chun a hriek thunna fungki chu a lak a, a unauhai mithmua ngei chun hriek a nal a, chu nia inthok chun Davida chungah LALPA Thlarau chu thilthawtheina leh a hung tlung a. Samuel chu a tho a, Rama khuoah a fe ta a. |
14. | LALPA thlarau chun Saula chu a suoksan a, LALPA tirh ramhuoiin ama chu a soisak a. |
15. | Saula siehlawhai chun a kuomah, "En ta, Pathien tir ramhuoiin a soisak che a ni hi. |
16. | Kan pu hin a siehlawhai hi tingtang tum thiem zong dingin thu mi pe sien, ama chun Pathien tir ramhuoiin a hung hluo pha che tingtang chu tum a ta, hung tha el i tih" an ta. |
17. | Saula chun a siehlawhai kuomah, "Chuonga tum thiem chu zong inla, ka kuomah hung thuoi ro" a ta. |
18. | A siehlaw laia pakhat chun, "Bethlehema Jesai naupa tingtang tum thiem ka hmu ta a. Ama chu mi huoisen, raldo thiem, thu hril thiem le hmel tha tak a na, a kuomah LALPA khom a um" a ta. |
19. | Chuongchun, Saula chun Jesai kuomah mi a tir a, "Beram vengtu i naupa kha ka kuomah hung tir rawh" tiin thu a'n cha a. |
20. | Jesai chun sabengtung a buotsai a, bei le uoiin peng khat a'n phurtir a, kel tuoi a hung lak bok a, chuonghai chu inchawitirin a naupa David chu Saula kuomah a tir a. |
21. | Davida chun Saula kuom chu a va tlung a, a hmaa chun a ngir a, ama chun a lo ngaina hle a, a ralthuom chawituhai laia pakhatah a hmang a. |
22. | Saula chun Jesai kuomah, "I naupa Davida hi ka kuomah um raw se. Ka mit a tlung hle a nih" ti thu hril dingin mi a tir a. |
23. | Pathien tir ramhuoiin Saula chu a hung soisak zatin Davida chun tingtang a lak a, a tum a, Saula chu a hung har a, a tha nawk a, ramhuoi chun a suoksan hlak. |
← 1Samuel (16/31) → |