←  1Samuel (15/31)  →
1. Samuel chun Saula kuomah, "Israelhai lal ni dinga hriek nal ding chea LALPA hung tir kha ka na, tu hin LALPA thu chu ngaithla rawh.
2. Iengkim LALPA chun hieng hin a hril: Aigupta rama inthoka Israelhai an hung laia Amalek mihaiin lo lambuna an soisak lei khan ka hrem tawl ding a nih.
3. Tuhin Amalekhai bei dingin fe la, an thil nei hrim hrim hla nei der loin sukbohmang vong rawh. Tu khom hla nei naw la, a nuhmei a pasal, naupang le naute, bawng le beram le sanghawngsei le sabengtung hai chu that ram vong rawh" a ta.
4. Chuongchun, Saula chun mipui chu a ko khawm a, Telaim khuoa chun a tiem a, Israel mi nuoi hni le Juda mi singkhat an nih.
5. Saula chun Amalek mihai khuo chu a zu tlung a, ruom karah an lo lambun a.
6. Saula chun Ken mihai kuomah, "Hung suok unla, Amalek mihai laia inthokin inthier fihlim ro, chuong naw chun sukhlum ve pal rawi ka ti cheu. Nangni chun Israel thlahai Aigupta rama inthoka an hung suok lai khan in lo lunginsiet si a" a ta. Chuongchun, Ken mihai chu Amalek mihai laia inthok chun an inthier fihlim a.
7. Chu zoah Saula chun Amalek mihai chu Havilaa inthoka Aigupta sak tienga Sur chenin a bei a.
8. Amalekhai lal Agag chu a hringin a man a, a mihai chu kawlhnamin a that ram vong a.
9. Amiruokchu, Saula le a mihai chun Agag chu an hla a, beram le bawng tha tha, bawngchal tuoi le beram thau tha tha le thil tha an ti hrim hrim chu an sukhlum naw a, a tha naw an ti le a ongrop hai ruok chu an sukhlum vong a.
10. Chuongchun, LALPA thu chu Samuel kuomah a hung tlung a,
11. "Saula hin a mi nghatsan a, ka thupek anga a thaw naw leiin lala ka lo ruot hi ka'n sir a nih" a ta. Samuel chu a lungzing hle a, zankhuoin LALPA a ko a.
12. A zinga chun inhma takin Samuel chu a tho a, Saula hmuok dingin a suok a. Sienkhom, "Saula chu Karmel tlangah a fe a, chu taka chun ama hriet zingna lung a phun a, chun, a kir nawk a, a fe pei a, Gilgalah a fe thlak" tiin Samuel chu an lo hril a.
13. Samuel-in Saula kuom a tlung chun Saulan, "LALPAN malsawm che raw se. LALPA thupek angin ka thaw tah" a ta.
14. Samuel chun, "Chuong beram inbe ri ka naa hung lut le bawng inbu ri ka hriethai chu ieng thil am an ta a?" a ta.
15. Saula chun, "Sipaihaiin Amalek mihai ta an hung lakpek a ni chu. LALPA i Pathien kuoma inthawina dingin sipaihaiin beram tha tha le bawngchal tha tha an hla a, a dang po chu kan sukhlum vong a nih" a ta.
16. Samuel chun Saula kuomah, "La to ta, LALPAN voizana ka kuoma thu a hril chu hang hril ka ti che" a ta. Saula chun, "Mi hril raw khai" a ta.
17. Samuel chun, "Nangma ngaia ieng khop lo i ni zing lai khan Israel hnamhai lu taka sie i ni naw maw? LALPA chun Israelhai chunga lal dingin hriek a nal che a.
18. LALPA chun a tir suok che a, 'Fe la, mi suolhai, Amalek mihai chu sukhlum vong rawh, an bohmang der hma khat chu bei pei rawh' a ti che a.
19. Iengti leia LALPA thu chu inza loa i um am a na? Ieng leia rallak thil chu baw huom huom a, LALPA mithmuah thil suol i thaw am a na?" a ta.
20. Saula chun, "LALPA thu chu ka zawm annawm. LALPA mi tirnaa chun ka fe a. Amalek mihai chu ka sukhlum vong a, an lal Agag ka hung hawn a.
21. Rallak thil, sukbohmang el ding laia beram le bawng tha tha chu Gilgala LALPA i Pathien kuoma inthawina dingin sipaihaiin an hung hawn bok a nih" a ta.
22. Samuel chun Saula kuomah, "LALPA chun a thupek zawm ang tlukin pumraw thilhlanhai le inthawinahai hi a lawm am a ni? Inthawina nekin thu awi a tha lem a, beramchal thau nekin a thu poisak a tha lem.
23. Helna hi aien thiemna suol ang a na, lululna hi milem biekna suol ang a nih. LALPA thu chu i hnawl leiin, ama khomin lal dingin a hnawl ta che a nih" a ta.
24. Chun, Saula chun Samuel kuomah, "Thil suol ka lo thaw a nih. LALPA thupek le i thu mi pekhai chu ka lo bawsiet a nih. Mipuihai chu ka ti a, anni tieng ka lo thle a nih.
25. Chuongchun, ka suol ngaidam la, LALPA ka chawibiek theina dingin mi fepui nawk hram raw khai" tiin a ngen a.
26. Samuel chun, "Fepui naw top ka ti che. LALPA thu chu i hnawl a, Israelhai chunga lalah LALPA khomin a hnawl ta che a nih" a ta.
27. Chuongchun, fe dinga Samuel a hang inher lai chu Saulan a zakaw fuol hmorah a man a, a zakuo chu a'n thler a.
28. Samuel chun, "Voisuna inthok hin Israel lalram chu LALPAN a lakpek ta che a, i neka tha lem i tuolbawmhai laia mi pakhat a pek tah.
29. Ama Israel Ropuina chun khel a hril ngai naw a, a lamlet ngai bok nawh; Ama chu mihriem anga lungril thlak dingin mihriem a ni ve si nawh" a ta.
30. Saula chun, "Ka lo suol a nih. Amiruokchu, lunginsiet takin Israel upahai le mipuihai hmaa hin mi chawimawi la, LALPA i Pathien chu ka chawibiek theina dingin mi fepui hram raw khai" a ta.
31. Chuongchun, Samuel chun Saula chu a kirpui a. Saula chun LALPA chu a chawibiek a.
32. Chu zoah Samuel chun, "Amalekhai lal Agag chu ka kuomah hung thuoi ro" a ta. Agag chun thina chu a pumpel taa inngaiin, ngaingam takin Samuel kuoma chun a hung a.
33. Sienkhom, Samuel chun, "I kawlhnamin nuhmeihai nau nei loa i siem ang bokin i nu khom nuhmei laia nau nei lo ni ve tang a tih" a ta, Gilgala LALPA maicham hmaa chun Agag chu a sat hlum a.
34. Chun, Samuel chu Rama khuoah a fe a, Saula ruok chun a in umna Gibea tieng a pan tung a.
35. Saula chan chu Samuel chun tuorpui hle sienkhom a thi chenin Saula chu a hmu nawk ta ngai nawh. Israelhai lala Saula a lo siem leiin LALPA chu a'n sir hle si a.
←  1Samuel (15/31)  →