←  1Samuel (14/31)  →
1. Ni khat chu Saula naupa Jonathanin ralthuom chawi tlangval kuomah, "Thaw ta, ral khing tienga Filistinhai ralvengtu sipaihai umnaa son va feng ei tih" a ta, sienkhom a pa ruok chu a hril nawh.
2. Saula chu Gibea kotsuoa Migron theibufai kung hnuoia chun a um a, a kuoma um chu mi zaruk lai an nih.
3. Chuonghai laia pakhat chu Ahija a na, thiempu thuom efod a hak a. Ama chu Siloa LALPA thiempu Eli naupa Finehas naupa Ahitub unaupa Ikabod naupa a nih. Chun, Jonathan chu a fe ti tu khomin an hriet bok nawh.
4. Filistinhai ralveng buk panna, Jonathan fe tumna chu kawn, khing tieng khing tienga lungtolawt chep de a na, pakhat chu Bozez an ta, pakhat chu Seneh an tih.
5. Lung tolawt pakhat chu Mikmas zawn, hmar tieng panga um a na, a dang pakhat chu Geba ep sim tienga um a nih.
6. Jonathan chun ralthuom chawitu tlangval kuomah, "Thaw rawh, LALPAN thil a mi thawpek takduoiin ser tan lo ruol sipaihai umnaa son va feng ei tih, LALPA ta ding chun a tlawm amanih a tam amanih ieng khom a thei naw a um chuong si naw a" a ta.
7. A ralthuom chawitu chun, "I lungril ang char chu thaw rawh, lungril le thlarauin ka thlop che a nih" a ta.
8. Jonathan chun, "Chuong an leh hung rawh, an umna tieng son va kai ei ta, mi lo thlir raw hai se.
9. Annin, 'Kan hung hma chun lo nghak phot ro' an tih leh kai loin ei umnaa chun um ei ta.
10. Amiruokchu, "Hung kai ro" an ti leh kai ei ta, chu chu LALPAN anni chu ei kutah a pek a nih ti inchikna ning a tih" a ta.
11. Chuongchun, an pahni chun Filistin diuti-hai hmua chun an va'n lang a. Filistinhai chun, "En tu, Hebrai mihai chu an inbikna kuoa inthokin an hung invak suok ie" an ta.
12. Vengtuhai chun Joanathan le ralthuom chawitu kuoma chun, "Hung tung ro, lo zil met kan ti cheu" an ta. Jonathan chun a ralthuom chawitu kuomah, "Ka hnunga hin mi hung zui rawh, LALPAN Israelhai kutah a pek tawl tah a ni chu" a ta.
13. Jonathan chu a kut le kea thangin a'n ban tung a, a hnunga chun a ralthuom chawitu chun a zui a. Jonathan hmaa chun Filistinhai chu an tlu zot zot a, a ralthuom chawitu chun a hnungah a hung that pei a.
14. Chu an bei voi khatnaa chun Jonathan le a ralthuom chawitu chun sangngam khat biel velah mi sawmhni an that a nih.
15. Chuongchun, Filistin sipai po po, an riebuka inkulhai, phula umhai, a hmatawnga umhai le runtu pawlhai chu chi-ainain a man a, hnuoi chu an hning dur dur a. Chu chi-aina chu Pathien hung tir a nih.
16. Benjamin ram Gibea Saula ralveng buka inthoka an hang en chun sir tinah sipai an te dar hum hum a, an buoi nuoi nuoi el a.
17. A bula umhai kuoma chun Saulan, "Tu hin hang intiem unla, tuhai am a kim naw hang en ta u" a ta. An hang intiem chun Jonathan le a ralthuom chawitu chu an lo um ve naw a.
18. Saula chun Ahija kuomah, "Pathien Bawm chu hang la raw khai" a ta. Chuong lai chun Pathien Bawm chu Israel thlahai kuoma um a nih.
19. Chun, Saulan thiempu a biek lai mek chun Filistinhai riekhmun tienga buoi mur murna chu a hung zuol deu deu pei a. Saula chun thiempu kuomah, "La thaw naw phot el rawh" a ta.
20. Chuongchun, Saula le a kuoma um po pohai chu an tlan khawm a, indonaa chun an fe ta a. Filistin mihai chu namen loin an buoi a, anni le anni kawlhnamin an insat a.
21. Kha hmaa Filistinhai tienga thang le an inkulnaa hang fe Hebrai mihai khom chu Saula le Jonathan tienga thang Israel mihai kuoma chun an hung pakai a.
22. Efraim tlang rama Israel mi inbihaiin Filistinhai tlansiet thu an hriet chun indoah an hung thang ve a, an hnot zui ta ngat ngat a.
23. Chuongchun, chu ni chun LALPAN Israelhai chu a san suok a, Beth-aven tlung rakin an bei a.
24. Chu ni chun, "Ka hmelmahai chunga phuba ka lak hma le khaw inthim hmaa bu fa taphot chu tongse phurin um raw se" tia Saula a'n kham leiin Israel mihai chu an beidong hle a, sipai tu khom bu fa an um nawh.
25. Sipai po po chun ramhnuoi an va tlung a, hnuoia chun khuoizu a lo um a.
26. Mipui chun ramhnuoia khuoizu lo luong chu an hmu a, sienkhom tu khomin an liek nawh, inkhamna chu an ti leiin.
27. Jonathan ruok chun a pa inkhamnain mipuihai chu a khuop ti a hriet naw a, a hmol chawi lai hmawr zum chun khuoithlar chu a zuk sun a, a liek a, a mit meng a hung fie ta a.
28. Chu phing leh sipai pakhat chun, "I pa chun mi tu khom voisuna bu fa taphot chu tongsie phur dingin a mi khuop tlat a, chu leia mipui an tamsawl a ni hi" a ta.
29. Jonathan chun, "Ka pa hin mi a sukbeidong lem chauh a nih. En ta u, khuoizu tlawmte ka hang intem leiin ka mitmeng khom a hung fie ta hi.
30. Mipuiin an rallak thil an hmu taphot an du duin fa hai sienla lem chu voisun hin ei va thaw tha nasa zuol awm de! Tuta nek dai hin Filistinhai ei that rawn lem naw ding maw?" a ta.
31. Chu ni chun Mikmas-a inthokin Aijalon chenin Filistin mihai chu an bei a, mipuihai chu an chau ta hle a.
32. Chuongchun, mipuihai chun an rallakhai chu a bawin an baw a, beramhai, bawnghai le bawng tuoihai chu an man a, tuola chun an that a, a thisen pumin an fak a.
33. Chun, mi thenkhatin, "Ngai ta, mipuihai chun sa chu a thisen puma an fak leiin LALPA chungah thil suol an thaw tah" tiin Saula chu an hril a. Saula chun, "Thuthlung in bawsiet a nih. Ka bula hin lung lien tak mi hung inhlumpek ro" a ta.
34. Saula bok chun, "Mipuihai lai fe unla, 'Mi tinin a bawng le beram chu a thisen puma faa LALPA chunga thil suol thaw loin, ka kuoma hung kei hai sien la, hi taka hin that raw hai se' a tih tiin va hril ro" a ta. Chu zan chun mi tinin mani bawngchal seng an hung kei a, chu taka chun an that a.
35. Saula chun LALPA ta dingin maicham a siem a, chu chu LALPA ta dinga maicham a siem hmasakna tak a nih.
36. Saula chun, "Zanah inthok suok ei ta, zing khaw var chenin Filistinhai zu rok ei ta, tu khom a hringin hla hrim hrim nawng ei tiu" a ta. Anni chun, "Tha i ti dan ang takin thaw rawh" an ta. Thiempu ruok chun, "Pathien la hang rawn hmasa phot ei tih" a ta.
37. Saula chun Pathien kuomah, "Filistinhai chu ka zu bei dim a ni? Israelhai kutah anni chu peng i ti?" tiin a'n don a, sienkhom chu ni chun Pathienin a don nawh.
38. Chun, Saula chun Israelhai kuomah, "Nangni sipai hotuhai, ka kuoma hin hung unla, voisun hin ieng suol am ei thaw ti zong suok ei tiu.
39. Israelhai hnena petu LALPA hring zing hmingin thu ka tiem a, ka naupa Jonathan chungah a tla khomin, a thi ngei ding a nih" a ta, tu khomin ieng khom an hril nawh.
40. Chu zoah Saula chun Israelhai kuomah, "Nangni po kha tieng khan ngir unla, kei le ka naupa Jonathan hi tieng hin ngir kan tih" a ta. Mihai chun, "Tha i ti dan ang takin thaw rawh" an ta.
41. Chuongchun, LALPA Israelhai Pathien kuoma chun Saulan, "A'n dik tak chu hung suklang rawh" tiin a tongtai a. Saula le Jonathan inkara thumvawr chu a tlu a, mipui chu an fihlim ta vong a.
42. Saula chun, "Kei le ka naupa Jonathan inkara dingin thum chu vawr ro" a ta, Jonathan chungah a tlu a.
43. Saula chun Jonathan kuomah, "Iem a na i thaw mi hril raw khai" a ta. Jonathan chun, "Ka hmol chawi hmora mi khuoizu tlawmte chu ka'n tem ngei kha tie. Chu lei chun ka thi ding maw?" a ta.
44. Saula chun, "Jonathan, i thi naw chun Pathienin a nuom ang taka nasain mi soisak raw se" a ta.
45. Mipui chun Saula kuomah, "Israelhai sansuokna ropui tak hung intluntu Jonathan hi a thi ding maw? Ni thei teu naw nih. LALPA hring zing hming salin kan hril, a sam zai pakhat khom hnuoiah tla naw nih; voisuna a thilthaw hi Pathienin a thangpui lei a nih" an ta, mipui chun Jonathan chu thi lo dingin an sanhim ta a.
46. Chuongchun, Saulan Filistin mihai a hnot chu a kirsan a, an ram tieng an insaseng tawl ta a.
47. Israelhai chunga lal a hung nia inthokin Saula chun sir tinah hmelma Moab mihai, Amon mihai, Edom mihai, Zoba lalhai le Filistin mihai chu a do a, a nghatna tieng tieng chun a hne tawl pei a.
48. Huoisen taka doin Amalek mihai chu a hne a, Israelhai chu anni rok hlaktuhai kuta inthokin a san suok tah a nih.
49. Saula naupahai chu Jonathan, Ishvi le Malki-Shua an nih. A naunu pahnihai chu, a upa lem hming Merab a na, a naupang lem hming chu Mikal a nih.
50. Saula nuhmei chu Ahimaz naunu Ahinoam a nih. Saula sipaia kawmandar chu Nera naupa Abner a na, Nera chu Saula pa unaupa a nih.
51. Saula pa Kisa le Abner pa Nera chu Abiel nauhai an nih.
52. Saula dam sung po po chu Filistinhai leh nasa takin an indo hlak a; Saula chun mi hrat le huoisen a hmu taphot chu a hnuoia thok dingin a lak pei a.
←  1Samuel (14/31)  →