←  1Samuel (13/31)  →
1. Saula chu kum sawmthum le kum hni a niin a'n lal tan a, Israelhai chungah kum sawmli le kum hni a'n lal a.
2. Saula chun Israelhai laia inthokin mi sangthum a thlang suok a, sanghni chu Mikmas le Bethel tlangramah Saula kuomah an um a, sangkhat chu Benjamin ram Gibea khuoah Jonathan kuomah an um a, a dang po po chu an in tieng a tirkir vong a.
3. Jonathan chun Geba-a Filistinhai ralveng buk a bei a, chu chu Filistinhai chun an lo hriet a. Chuongchun, Saulan, "Hebrai mihai po poin lo hre ro" tiin a ram pumah tawtawrawt an muttir a.
4. Israel mi po po chun, "Saula'n Filistinhai ralveng buk a bei a, Filistinhai theida a phur" ti thu chu an lo hriet ta a, mipuihai chu Saula kuomah Gilgala chun an ko khawm a.
5. Filistinhai chu Israelhai bei dingin an incha khawm a, tawlailir singthum, sakor chung chuong mi sangruk le sipaihai chu tuifinriet kama tieu zat zeta tam an nih. Chuongchun, an kai tung a, Beth-aven sak tieng Mikmas-ah an inkul a.
6. Chuonga an sipaihai hnawchepa an um ti Israelhaiin an hriet chun puka hai, chimbuka hai, lungpui kara hai, khura hai le tuikula hai an inbi a.
7. Hebrai mi thenkhat lem chu Jordan vadung kanin Gad le Gilead rama hai an tlan a. Saula ruok chu Gilgalah a la um zing a, a sipaihai hlak chu tiin an inthin hawp a.
8. Samuel ni ruot angin Saula chun ni sari sung Gilgala chun a lo nghak a, sienkhom Samuel chu Gilgalah a hung ta si naw leiin mipui chun an tlan darsan ta a.
9. Saula chun, "Pumraw thilhlan le inremna thilhlan dinghai chu ka kuomah hung chawi ro" a ta, pumraw inthawina chu a'n hlan a.
10. Saulan an hlan zo charin Samuel a hung tlung a, Saula chun a va hmuok a.
11. Samuel chun, "Ieng thil am i lo thaw ta le?" a ta. Saula chun, "Mipui an tin dar ka hmu a, nang hlak i ni ruot niah i hung tlung ta bok si naw a, Filistin mihai hlak Mikmas-ah an pung khawm lui lui bok si leh,
12. chuongchun kan ngaituo a, 'Filistinhaiin Gilgalah an mi hung bei tep ta si a, LALPA ditsakna ka la hni bok si nawh' ka ta; chuleiin, pumraw thilhlan chu thaw lo thei loah ka ngai leiin ka lo inhlan el a nih" a ta.
13. Samuel chun Saula kuomah, "I thilthaw hi thil invetthlak a nih. LALPA i Pathienin thu a pek che chu i zawm naw a nih; zawm chu ni la, LALPA chun Israelhai chungah i lalna hi kumkhuoin a suknghet awm vei leh.
14. Tu ruok hin chu i lalna hin dai sawt naw nih; LALPA thupek chu i zawm naw leiin, LALPA chun ama lungril ang put mi a zong a, a mihai chunga roreltu dingin a ruot tah a nih" a ta.
15. Samuel chun Gilgal a maksan a, Benjamin ram Gibea khuoa chun a hang fe a. Saula chun a kuoma umhai chu a tiem a, mi zaruk vel an nih.
16. Saula le a naupa Jonathan le an kuoma umhai chu Benjamin rama Gibea khuoa chun an um a, Filistinhai chu Mikmas-ah an inkul a.
17. Filistin tienga inthoka hung runtu pawl chu hmun thumah an inthe a. Pawl khat chun Shual bula Ofra tieng chu an pan a,
18. pawl khat chun Beth Horon tieng an pan a, pawl khat chun thlaler dep Zeboim ruom tieng ep ramri lam tieng chu an hraw a.
19. Filistinhaiin, "Hebrai mihai hin kawlhnam le fei dam siem rawi an tih" an ti leiin Israel ram pumah thirsu hrim hrim an um nawh.
20. Chuleiin, Israel mihai chun an langkawn hai, lungral hai, hreipui hai le kawite hai an tat ngei ding pha Filistinhai umnaah an zu fe hlak a.
21. Langkawn le lungral tat ngeina man chu shekel hmun thuma thea hmun hni a na, thir kut le hreipui le ran hawlna thir zum tat ngeina man chu shekel hmun thuma hmun khat a nih.
22. Chuong chu a ni leiin, an indo ni chun Saula le Jonathan ti chauh naw chu an kuoma mi umhai chu kawlhnam amanih fei amanih nei hrim hrim an um nawh.
23. Chun, Filistinhai chun an sipai pawl khat chu Mikmas kawn tienga lo inchantu dingin an tir a.
←  1Samuel (13/31)  →