←  1Samuel (12/31)  →
1. Samuel chun Israel mi po po kuomah, "Ngai ta u, ka kuoma in thu hril po po ka ngaithlak a, lal ding khom ka siempek ta cheu a.
2. Tu hin chu thuoitu lal in lo nei ta hi. Kei ruok chu ka lo upa tain ka luah kel sam a to ta a, ka naupahai in kuomah an um hi. Ka tleirawla inthokin voi sun chen hin in thuoitu ka lo ni hlak a.
3. Tu hin in hmaah ka ngir a. LALPA le a hriek nal hmaa hin mi hang fie hrim ta um khai. Tu bawngchal am lapekin, tu sabengtung am ka lakpek hlak a? Tu am hlemin, tu am ka sukduda hlak a? Thlei bik nei dingin tu laka inthokin am thamna ka lak hlak a? Hieng thilhai hi ka lo thaw pal a um chun rul nawk vong ka ti cheu" a ta.
4. Mipui chun, "I mi hlem ngai naw a, i mi sukduda ngai bok nawh. Tu kuta inthok khomin ieng khom i lak ngai nawh" an ta.
5. Samuel chun an kuomah, "Ka kutin thil awm lo ka thaw ngai nawzie voisuna mi hrepuitu chu LALPA a na, a hriek nal lal khom hi a ni bok" a ta. Mipui chun, " Ni e, LALPA chu hrepuitu a nih" an ta.
6. Samuel chun mipui kuomah, "Mosie le Aron ruottu le Aigupta rama inthoka in pi le puhai thuoi suoktu chu LALPA a nih.
7. Chuleiin, LALPA hmaa hin ngaithla thap unla, LALPAN in chunga le in pi le puhai chunga thil fel taka a lo thaw danhai chieng takin hang suipui ka ti cheu.
8. Aigupta rama Jakob a lut hnung khan, in pi le puhai chun LALPA an ko a, LALPA chun Mosie le Aron a tir a, anni chun in pi le puhai chu Aigupta rama inthokin an thuoi suok a, hi hmuna hin a'n umtir a.
9. Nisienlakhom, LALPA Pathien chu an theinghil a, ama chun Hazor sipai hotu Sisera kuta le Filistin mihai kuta le Moab lal kutah a zor a, anni chun an do a.
10. Chu phing leh thangpuitu dingin LALPA an ko a, 'LALPA chu kan nghatsan a, Baal-hai le Astoret-hai rong kan bawl leiin kan lo suol a nih. Nisienlakhom, kan hmelmahai kuta inthokin mi san suok ta la, chuongchun i rong bawl tang kan tih' an ta.
11. "Chun, LALPA chun Jerubaal dam, Barak dam, Jeftha dam le Samuel haic dam a tir a, in hmelma khing tieng khing tienga inthokin a san suok cheu a, him takin in um a.
12. Amiruokchu, LALPA Pathien chu in lal a ni zing si laiin Amonhai lal Nahas chu nangni do dingin a hung ti in hriet charin ka kuomah, 'A ni naw ie, lalin mi op lem raw se' in ti a.
13. Chuong ang chun tu hin in lal thlang le dit chu en ro, en ro, LALPA chun lal a siempek ta cheu a ni hih.
14. LALPA chu ti a, a rong chu bawl a, a thu zawm a, a thupekhai lakah hel lo a, nangni le in chunga roreltu lal leh LALPA Pathien zuitu in ni chun thang a ta,
15. amiruokchu, LALPA rawl ngaithla lo a, LALPA thupek in helsan ruok chun in pi le puhaiin LALPA kut an tuor ang bokin nangni khomin tuor veng in tih.
16. Chuleiin, ngaithla ngun ro, LALPAN in mithmua thil ropui tak a thaw ding hi lo en ro.
17. Voisun hin bu an sik a ni naw am a ni? Van inrumtir ding le ruo insurtir dingin LALPA ko ka ta, chuongchun lal in hni thua hin thil suol in thaw nasatzie hrein hmung in tih" a ta.
18. Chuongchun, Samuel chun LALPA a ko a, chu ni chun LALPAN van a'n rumtir a, ruo an surtir bok a, mipui chun LALPA le Samuel chu an ti ta em em a.
19. Mipui chun Samuel kuomah, "Kan thi nawna dingin LALPA i Pathien kuomah i siehlawhai hi mi tongtaipek rawh, lal kan hni hin kan suolna chu a belsa zuol si a" an ta.
20. Samuel chun mipui kuomah, "Ti naw ro, thil tha lo tak chu in thaw ngei a, sienkhom LALPA chu pet hmangsan naw unla, in lungril po poin LALPA rong chu bawl ro.
21. Hmangna bo milem bieksan naw ro. Chuonghai chun thil tha intlun naw ni cheu a, san suok thei bok naw ni hai cheu, hmangna bo thil an ni tlat a.
22. A hming ropui tak leiin LALPAN a mihai chu hnawl naw nih, a mihaia siem cheu hi LALPA lawmzawng tak a ni si a.
23. Keima chungthua chu, nangni ta dinga tongtaipek bansanin LALPA lakah thil suol thaw ngai naw top ka ta, lampui tha le indik kawkhmu pei lem ka ti cheu.
24. LALPA chu ti phot unla, in lungril po poin titakzetin a rong bawl unla, in ta dinga thil ropui a thawhai hi ngaituo ro.
25. Amiruokchu, suol taka thil in la thaw rop chun, nangni le in lal chopin phit hmang a ti cheu" a ta.
←  1Samuel (12/31)  →