←  1Samuel (11/31)  →
1. Amon mi Nahas chun Gilead rama Jabes khuo run tumin a hang inhuol a. Jabes mi po po chun Nahas kuomah, "Keini leh thuthlung siem la, i thu hnuoiah um kan tih" an ta.
2. Amon mi Nahas ruok chun, "Hieng ang hin in kuomah thuthlung siem thei ka tih: in mit chang tieng khel dok vong ka ta, Israelhai po po sukhmelhem ka tih" a ta.
3. Jabes khuoa upahai chun a kuomah, "Israel ram po poah mi kan tir theina dingin ni sari sung mi la ngai rawh. Mi sandam thei ding tu khom an um naw chun i kutah hung inpe lut kan tih" an ta.
4. An mi tirhai chu Saula umna Gibea khuoah an fe a, an thil ngiet an hang ripawt chun mipui chu an tap khek chul el a.
5. Chuong lai chun Saula chu loa inthokin bawngchal khalin a hung a, "Iem a ta mipui an tap chu?" a ta. Jabes khuoa mihai thu hril chu an hril sawng a.
6. Saulan chu thu a hriet char chun a chungah Pathien Thlarau thilthawtheina a hung tlung a, a lung a sen hle a.
7. Bawngchal tuok khat a that a, an sa a chan nawi vong a, Israel ram po poa chun a'n semtir a, "Tu khom Saula le Samuel hung zui nuom naw taphot chu hieng ang hin an bawngchal thaw ve ning a tih"tiin. Chuongchun, LALPA tina chu mipuihai lai chun a'n leng a, thu khat chelin an inthok suok a.
8. Bezek hmunah Saulan anni chu a tiem a, Israel mihai chu nuoithum an na, Juda mihai chu singthum an nih.
9. Chun, an mi hung tirhai kuoma chun, "Jabes mihai kuomah hieng hin hril ro: 'Zinga hin sunchang hmain san suok ning in tih' tiin" a ta. An mi tirhai chu an kir a, Jabes mihai chu an hril a, an lawm hle a.
10. Anni chun Amon mihai kuomah, "Zinga hin kan hung inpek ding a na, in nuom ang angin kan chungah thaw ro" an ta.
11. A zinga chun Saulan a mihai chu pawl thumin a the a, khawfingchatah an inkulna hmuna chun a va hlu khum a, Amon mihai chu sunchang lai chen an that a, an that mahlahai chu an tlan dar vong a, a kopa um hrim hrim an um nawh.
12. Mipuihai chun Samuel kuomah, "Tuhai am an na, 'Kan chungah Saulan ro a rel telul ding maw' tituhai kha? Chuong mihai chu hung thuoi suok unla, lo sukhlum kan tih" an ta.
13. Saula chun, "Voisun hi LALPAN Israelhai a san suok ni a na, voisun kher hin chu tu khom sukhlum lo ding a nih" a ta.
14. Chun, Samuel chun mipuihai kuomah, "Thaw ro, Gilgalah feng ei ta, ram chu indin thar nawk ei tiu khai" a ta.
15. Chuongchun, mi po po chu Gilgalah an fe a, Saula chu LALPA hmaah lalin an siem nghet ta a. Chu taka chun inremna inthawina LALPA hmaah an inhlan a, Saula le Israelhai chun lawmna ropui tak an siem a.
←  1Samuel (11/31)  →