←  1Samuel (10/31)  →
1. Samuel chun a hriek bur chu a phor a, hriek chu Saula luah a bur a, a fawp a, "LALPA chun a rochan Israelhai chunga roreltu dingin hriek a nal che.
2. Voisuna i mi suoksan hnung hin Benjamin ramria Rachel thlan bul Zelza-ah mi pahni intuokpui i ta, anni chun i kuomah, 'Sabengtung i zonghai kha an hmu ta a, i pa chun sabengtung ngaituo ta loin nang mol a ngaituo che a, 'Ka naupa chu ieng am a chang an ta maw?' a ti a ti el a nih' tiin hril an ti che.
3. "Chun, chu taka inthok chun fe pei i ta, Tabor saisuo thing va tlung i ta, chu taka chun mi pathum, Bethela Pathien be dinga fehai chu intuokpui i ta, pakhat chun kelte pathum kei a ta, pakhat chun beiper pathum chawi a ta, pakhat chun uoiin peng chawi a tih.
4. Chibai buk an ti che a, beiper pahni chu peng an ti che a, chu chu la rawh.
5. Chu zoah Filistin sipaihai umna Pathien tlang Gibea chu va tlung i ta, chu taka chun perkhuong dam, khuongte dam, theihle dam, tingtang dam chawia zawlnei ruol, hmun sanga inthoka hung thlahai chu intuokpui i ta, thu hril duol duol an tih.
6. Chun, LALPA thlarau i chungah nasa takin hung tlung a ta, nang khom an thu hrilnaa chun thang veng i ta, mi danglam daiah hung inchang i tih.
7. Hieng inchiknahai hi i chungah a hung tlung pha leh thil hung um dan zir ang peiin i thaw ding a nih, Pathien i kuomah a um si a.
8. Chun, ka fe hmain Gilgalah lo zu fe hmasa la, keikhom pumraw inthawina le inremna inthawinahai inhlan dingin hung thla veng ka ta, ka hung tlung phaa i thaw ding ka hung hril hma che chu ni sari sung mi lo nghak rawh" a ta.
9. Samuel a maksan ding tawmin Pathienin Saula chu lungril thar a pek a, chuong inchiknahai po po chu, chu ni chun a chungah a hung tlung vong a.
10. Gibea an tlung chun zawlnei ruolin an lo hmuok a, Pathien Thlarau chu a chungah thilthawtheinain a hung tlung a, an thu hrilnaa chun a thang ve ta a.
11. A hmaa ama lo hretuhaiin zawlneihai ruola thu a hang puong ve an hmu chun, "Kisa naupa chungah ieng top am a tlung an ta le? Saula chen khom zawlneiah a lo thang an ta maw?" tiin an indon tuo a.
12. A umna khuoa mi pakhat chun, "Hieng zawlneihai khom hi an pahai chu iem an ni bik a? a lo ti a. Chu taka inthok chun, "Saula chen khom zawlneiin a thang an ta?" ti chu infiemna tongkam takah an hung hmang pha tah a nih.
13. Chun, zawlnei anga thu a hril zoin Saula chu hmun sangah a fe a.
14. Saula pate chun Saula le a siehlaw kuomah, "Khaw lai am in fe a?" tiin a lo indon a. Ama chun, "Sabengtung zongin kan fe a, kan hmu naw phing leh Samuel kuomah kan fe a nih" a ta.
15. A pate chun, "Samuel chun i kuomah iem a lo hril che, mi hang hril ta" a ta.
16. Saula chun a pate kuomah, "Sabengtunghai chu an hmu tah ti a mi hril" a ta, inlalna thu ruok chu ieng khom a pate kuoma chun a hril sa nawh.
17. Samuel chun Israel mipuihai chu Mizpaah LALPA hmaah a ko khawm a.
18. Israel thlahai kuoma chun, "LALPA, Israelhai Pathien chun hieng ang hin a tih: 'Israelhai chu Aigupta rama inthokin ka thuoi suok a, Aigupta mihai kuta inthok le a suknomnatu po pohai laka inthokin ka san suok a;
19. nisienlakhom voisun hin an mangangna le rinumna po poa inthoka sanhimtu an Pathien chu an mi dit naw a, ka kuomah, 'Ni lo e, lal mi siempek rawh' an ti a. Chuleiin, tu hin Israel hnam po po le pahnam po po chu LALPA hmaah hung inlang ro" a ta.
20. Chuongchun, Samuel chun Israel mi po po chu a hung inlangtir a, Benjamin hnam chu thlang a lo ni ta a.
21. Benjamin chihai chu an sungkuoin an hung inlang a, Matri sungkuoa mi, Kisa naupa Saula chu thlang a lo ni ta a, sienkhom ama an hang zong a, an hmu naw a.
22. Chuongchun LALPA kuoma chun, "Ama chu a la hung inlang naw zing am a ni?" tiin an indon a, LALPA chun, "Ngai ta u, a thuomhnaw lai an biruk a ni kha" a ta.
23. Chuongchun an tlan a, an va thuoi suok a, mipui lai a hang ngir chun anni lai a dung a'n sang tak a.
24. Samuel chun mipui kuomah, "LALPA mi ruot hi in hmu am? Mi po po lai ama ang hrim an um nawh" a ta. Mipui chun, "Pathienin laltak chu humhim raw se" tiin an khek a.
25. Samuel chun lal hnuoia an invong dan dinghai chu mipui a zirtir a, lekhabuah a ziek thlak a, LALPA hmaa chun a sie tha a. Chu zoah mipui chu mani in sengah a'n tintir tawl ta a.
26. Saula khom Gibea khuoa a inah a kir a, Pathienin an lungril a them tah mi huoisenhai chun an zui a.
27. Buoina siem chak mi rilo thenkhat ruok chun, "Ieng tin am hi mi hin a mi san suok ding a na?" tiin an deusaw a, thilpek ieng khom an pek nuom nawh. Saula ruok chu a to zing a.
←  1Samuel (10/31)  →