1Samuel (1/31) → |
1. | Efraim tlang ram Ramathaim- zofim khuoah mi pakhat a hming Elkana a um a, ama chu Jehoram naupa a na, ama chu Elihu naupa a na, ama chu Tohu naupa a na, ama chu Efraim mi Zufa naupa a nih. |
2. | Elkana chun nuhmei pahni a nei a, pakhat chu Hana a na, pakhat chu Penina a nih. Penina chun nau a nei a, Hana ruok chun a nei ve nawh. |
3. | Iengkim LALPA chawibiek ding le a hmaa inthawina inhlan dingin Elkana chu an khuoa inthokin Silo khuoah kum tinin a hang fe zie hlak a, chu taka chun thiempu Eli naupa Hofni le Finehas hai chun thiempu sin an thaw a. |
4. | Inthawina an inhlan ding pha Elkana chun a nuhmei Penina le a naupa le naunu hai chan ding seng sa iemani zat a sem hlak a. |
5. | Hana ruok chu a hmangai a, LALPAN a sul a khar hri bok leh, chan hni a siempek bik zie hlak a. |
6. | LALPAN a sul a khar lei chun a khingpuinu chun a lung khei zawng ding tak thawin a suklungsen hlak a. |
7. | Kum tin kum tin elin LALPA ina Hana a fe zatin a khingpuinu chun elsenin a suktap a, bu a nghei pha hiel hlak a. |
8. | Elkana chun, "Hana, ieng dinga i tap am? Iem a ta bu i fak naw? Iem a ta i lung a hnuol? Naupa sawm nek khomin i ta dingin ka hlu lem naw maw?" tiin a thlem hlak a. |
9. | Tum khat chu Silo-a an fak an dawn zoin Hana chu a tho a. Chuong lai chun thiempu Eli chu LALPA tempul kotkhar ban bula thungnaah a'n thung a. |
10. | Beidong le lungril na taka tap hlop hlop pumin Hana chu LALPA kuomah a tongtai a. |
11. | LALPA kuomah, "Iengkim LALPA, i bawinu rinum tuor hi zuk thlir la, hre zing rawh. I bawinu hi theinghil loa nau pasal i pek chun, a dam sung po po LALPA ta dingin pe suok ka ta, a lu khom vaw ni ngai hrim hrim naw nih" tiin inkham meuin thu a tiem a. |
12. | Chuonga a tongtai mel mel laia a hmur inphu chu thiempu Eli chun a lo thlir zing a. |
13. | Hana chu lungril takin a tongtai a, ri nei si loin a hmur a'n phu sep sep a. |
14. | Eli chun zu inrui sawnin, "Ieng chen am inruiin i um zing ding a na? I uoiin sie hmang raw khai" a ta. |
15. | Hana chun, "K'an rui naw ie, Pu, nu lungril rimsi tawpkhawk ka ni hi. Zu amanih uoiin amanih ka dawn nawh; LALPA hmaah ka lungril ka phor suok lem a nih. |
16. | I siehlaw hi nuhmei rilo angah mi sie naw rawh; ka lungrila sip liem ka lungngaina le beidongna hai ka phor suok lem a nih" tiin a don a. |
17. | Eli chun, "Lungmuong takin fe ta rawh, LALPA, Israelhai Pathien chun i hni ang tak chu hung pe raw se che" a ta. |
18. | Ama chun, "I bawinu hin i mit tlung ngei raw se" a ta. Chuongchun, nuhmei chu a fe a, bu a fak a, lungngai hmel a put zing ta naw a. |
19. | A zinga chun inhma takin an tho a, LALPA an chawibiek a, an khuo Rama tieng an kir nawk a. Elkana chun a nuhmei a pawl a, LALPAN ama nu chu a hriet zing a. |
20. | Chuongchun, Hana chun nau a pai a, nau pasal a nei a, "LALPA kuoma ka hni suok a nih" a ta, a hmingah Samuel a sak a. |
21. | Chun, LALPA hmaa kum tina pumraw inthawina an nei hlak ang le a thu intiemkamna hlen dingin a sunghai thuoiin Elkana chu Silo-ah a hang fe a. |
22. | Hi tum hin Hana ruok chu a hang fe ve nawh. A pasal kuomah, "Naupang hin nene a nghei pha le chauh ama thuoiin LALPA hmaah hang inhlan ka ta, chu taka chun ama chu um zing tang a tih" a ta. |
23. | A pasal Elkana chun, "Tha i ti ang tak chun thaw rawh. Nene nek i'n bantir chenin hi taka hin um rawh; LALPAN i thu chu sukpuitlingpek ngei raw se che" a ta. Chuongchun, naupangin nene nek a ban hma khat chu Hana chu inah a um a, a naupa chu a enkol a. |
24. | Nene nek a ban chun naupang dawng tak la ni sien khom a nu Hana chun bawngchal kum thum mi keiin, beiphit kilogram sawm le uoiin savun peng khat chawi bokin Silo khuoa LALPA inah a fepui a. |
25. | Bawngchal chu an that a, naupang chu Eli kuomah an thuoi a. |
26. | Nuhmei chun, "Pu, i hringna salin ka hril, kei hi i bula hi hmuna ngira LALPA kuoma tongtai nu ngei kha ka nih. |
27. | Hi naupang hi hniin ka tongtai a, ka hni ang takin LALPAN a mi pek a. |
28. | Tuhin keikhomin LALPA kuomah naupang hi ka hung inhlan a, a dam sunga LALPA ta dinga pek suok a nih" a ta. Chu taka chun Samuel chu LALPA rongbawlin a um ta a. |
1Samuel (1/31) → |