1Peter (5/5)    

1. Nangni laia kohran upahai chu kei, upa ve bok, Krista tuornahai hmutu le ropuina hung inlang ding chang ve beiseitu hin ka'n fui a ni.
2. Nangni laia Pathien beramhai chu enkol tha ro. Thaw dinga ti in ni lei ni loin, Pathien dit dan anga nangnia thaw inhawkna leiin thaw unla, sum tienga in inhawmthaw lei ni loin, rongbawl nuomna lungril putin enkol ro.
3. In enkolhai chungah insuklal naw unla, an enton tlakin um lem ro.
4. Chuongchun, Beram Vengtu Laltak a hung pha chun ropuina lallukhum chul thei lo chu chang in tih.
5. Chuong ang bokin nangni thalaihai, upahai thu awi ro. In rengin thuhnuoirolnaa inthuomin rong inbawlpek ro. "Pathienin chapohai a dodal a, inngaitlawmhai ruok chu a lunginsiet hlak" ti a ni si a.
6. Chuleiin, a hun takah chawimawia in um theina dingin Pathien kut hrat tak hnuoia chun inphahnuoi ro.
7. In lungzingna po po ama chungah innghat vong ro, a ngaisak em em cheu a nih.
8. Ngaiven unla, fimkhur ro; in hmelma Diebol chun sakeibaknei inrum angin se ding zongin a ve zing cheu a nih.
9. Ringnaah ngir nghet unla, ama chu do ro. Khawvel hmun danga in unauhai khomin chuong ang bok chu an tuor ti in hriet si a.
10. Sawt naw te in tuor hnungin, Kristaa a chatuon ropuina chang dinga kotu cheu, lunginsietnaa sip Pathien chun hung tungding a ti cheu a, siem thaa sukhratin, suknghet a ti cheu.
11. Ama kuoma chun thilthawtheina kumkhuoin um raw se. Amen.
12. Unaupa, mi ringum a nih ti ka hriet Sila kuta hin hi lekha tawite hi ka hung thon cheu a nih. Hi hi Pathien lunginsietna chu a nih ti inhriettir ding cheu le chu taka chun ngir nghet tlat dinga ka'n fuina cheu a nih.
13. Babulon kohran, nangni ang boka thlanghai hin chibai an buk che; ka naupa Marka khomin a buk cheu.
14. Krista hmangainaa kut inchelin, chibai inbuk ro. Nangni Kristaa umhai po po kuomah inremna um raw se.

  1Peter (5/5)