←  1Peter (3/5)  →
1. Chuong ang bokin nangni nuhai, in pasalhai thu awi ro; chuongchun anni lai ringnawtu an lo um a ni khomin thu hril kher ngai loin in nungchang chun hne el a tih,
2. anni ngeiin thienghlim tak le inza taka in khawsakzie chu an hmu ding a ni si a.
3. In hmel thatna chu puo tieng incheina sam chei ler dam, incheina hmangruo rangkachak dam le silfen to inbel dama innghat ni naw raw se.
4. Chuong nek hmanin, sung tieng hmel thatna, nunnemna le zaidawna thlarau, mawina chuoi thei loa inthuom ni lem raw se. Chu chu Pathien mit hmuah a hlu hlie hlie a nih.
5. Chuong ang chun tiena tlanga nuhmei thienghlim, Pathiena beiseina innghattuhai kha, an pasalhai thu awinain an lo inthuom mawi a nih;
6. Sarin Abraham thu a awi a, "Ka lalpa" tia a ko ang khan. Indik taka in thaw chun Sari nauhai ning in ta, titna ding hrim nei naw ti niu.
7. Nangni p�hai, chuong ang bokin nupa in ninaah in nuhmeihai lakah zai daw unla, derdep lema siem an ni lei le Pathien lunginsietna thilpek hringna chu hluopuitu cheu an ni leiin, inza takin cheibawl ro. Chuongchun, in tongtaina hluotu ieng khom a um naw ding a nih.
8. A tawp taka chun, in renga lungril hmun khat putin, inlainata unau anga inhmangai tuoin, inlunginsietin thuhnuoirol takin um ro.
9. Suol chu suolin thungrul naw unla, tongsie khom tongsiea thungrul loin malsawmpek lem ro; malsawmna dong dingin annawm Pathienin a ko cheu chu.
10. Pathien lekha thuin,"Tu khom mani nun thlakhla a,Ni tha hmua dam sawt nuom chun,Suol lakah a lei veng tha sien,A hmurin khel hril naw raw se.
11. Suol nghatsanin thil tha thaw ro,Inremna zongin hnot pei ro.
12. LALPAN mi felhai a hmu zing, An ko pha a ngaithlak var hlak.Suol thawtuhai laka ruok chu, LALPA hmel a'n tur zing hlak"a ta.
13. Thil tha thaw tieng thahnem in ngai chun tuin am in chungah thil tha naw a thaw ding?
14. Thil indik in thaw leia tuor in ni chun hamthaah inngai ro. An thil tihai chu ti ve naw unla, sukthlaphangin um naw ro.
15. In lungrilah Krista chu inzain Lalah sie ro. In beisei san indontu taphot cheu chu hril fie nghal dinga inpei sa zingin um ro.
16. Nisienlakhom, thuhnuoirol le hawihawm takin, sie le tha hrietna fim tak neiin thaw hlak unla, chuongchun, Kristaa in um dan tha hril hnawmtuhai chu sukzakin um an tih.
17. Pathien remtia tuor in ni rau rau si chun thil suol thaw leia tuor nekin thil tha thaw leia tuor chu a tha lem.
18. Krista khom ei suolhai leiin voi khat a thi a, Pathien kuoma a mi thuoi theina dingin, mi fel chu mi fel naw ta dingin a thi a nih. Taksaa sukhlum a na, thlaraua ruok chu sukhringin a um a.
19. Ama chun lung ina intang thlarauhai kuoma khom thu a zu hril a.
20. Chuonghai chu Nova long tuk sunga Pathienin dawthei taka a nghak laia awi nuom nawtuhai thlarau kha an nih. Longa chun mi tlawm te, pariet chauh sanhim an nih.
21. Chu angpui, baptisma hin, Isu Krista thonawkna leiin tu hin a sandam tah cheu a nih; baptisma chu taksa tirdakum sawpfaina chauh a ni naw a, sie le tha hrietna fim taka Pathien kuoma thu tiemna hi a ni lem.
22. Isu Krista chu vanah fein Pathien chang tieng a um a, vantirkohai le lalna le thuneina po po chu a thuhnuoiah an um ta vong a nih.
←  1Peter (3/5)  →