←  1Peter (2/5)  →
1. Chuongchun, suol tinreng bansan unla, inhlem le inlemder hai, inthik le inhril siethai po po bansan ro.
2. In sandamnaah in inthanglien pei theina dingin, naute pieng hlim angin thlarau tieng nenetui, tui pol lo chu chak hle ro.
3. "Lalpa thatna chu hang intem ve hrim ta u" ti ziek a ni kha.
4. Ama chu pan ro, Hringna Lung, mihriemhai hnawl, Pathien thlang hlu tak chu a ni si a.
5. Chuongchun, nangni khom hringna lung anga thlarau in dinga rem khawm le thiempu thienghlim hung ni vein, Isu Krista zara Pathien pom tlak, thlarau tienga inthawina chu inhlan ro.
6. Pathien Lekha thuin,"En ta, lungphum hlu tak ka thlang chu,Zaiawn thutah ka phum a;Tu khom ama ring zotu chu,Muolpho ngai naw nih" a ti si a.
7. Nangni ringtuhai ta ding chun lung hlu tak a na, ring nawtuhai ta ding ruok chun "In bawltuhai lung hnawl ngei kha,A kila lung tangkai tak a hung ni tah" a ti bakah ziek danga chun,
8. "Mi insui thlukna ding lung,An intol thlukna ding lung ngei chu" tiin a chuong ve thung a. Thu an awi naw leiin an tlu a, chuong anga um ding renga ruot chu an nih.
9. Nangni ruok chu hnam thlang, Lalpa thiempu, hnam thienghlim, Pathien ta bik, ama var ropui taka cheng dinga thima inthoka ko suoktu cheu inpakumzie chu puongtu ding in nih.
10. Kha hma khan Pathien mi in ni ngai naw a, tu ruok hin chu in ni tah; zangaina hlaw ve ngai lo khan tu hin chu zangaina in lo chang tah a nih.
11. Unauhai, hi khawvela hin ram dang mi le mikhuol el in ni leiin, in thlarau kala do hlaktu chakna suolhai laka chun inthier fihlim dingin ka ngen cheu a nih.
12. Ringnawtuhai lai mawi takin khawsa unla, thil suol thawa an intum cheu a lo ni khomin in thil thaw thathai an mit ngeiin hmung an ta, Pathienin a mi hung kan ni pha leh ama chawimawi thei an tih.
13. Lalpa leiin mihriem ruot thuneituhai kuoma chun intuklut ro. Thuneina insang tak neitu lal tak kuoma dam le
14. thil suol thawtuhai hrem ding le thil tha thawtuhai chawimawi dinga lalin a tir sawng larsaphai thu chu awi ro.
15. Ieng khom hre lohai thu hril invetthlakhai chu thil tha thawa sel dong dingin Pathienin a dit cheu a nih.
16. Pathien bawihai in ni ang hrimin, zalen unla, sien khom in zalenna chu suol thawna dinga suonlam remchangah hmang naw ro.
17. Mi po po inza thiem unla, unauhai hmangai unla, Pathien ti unla, laltak chu chawimawi ro.
18. Nangni siehlawhai, in puhai thupek awi unla, a tha le ngilneihai chauh ni loin, a khauhhai khom inza ro.
19. Miin Pathien lawmzawng nia a hriet tlat leia a tuor kher naw ding khom a tuor chun, chu chu Pathien lawmzawng a nih.
20. In suol leia in tuor chun sel takin tuor inla khom in ta dingin hming thatna ding iem um a ta? Thil tha in thaw sa khoma kut in tuor ruok chun Pathien lawmzawng a nih.
21. Hieng anga um dinga ko in ni a, Krista khomin in ta dingin a tuor a, a hniekhnung in zui theina dingin enton ding a maksanpek cheu a ni kha.
22. Ama chun thil suol a thaw ngai naw a, a bauah hlemna thu a suok ngai bok nawh.
23. Miin an biek el khomin a thungrul ve naw a, a tuor laiin a vau let ve naw a, indik taka roreltu kuoma chun a'n koltir lem hlak a nih.
24. Suol thisana felna tieng ei hring theina dingin, ama taksa ngeiin thinga khan ei suolhai a phur a, a hliemna behai chun sukdam ei ni tah.
25. Beram angin lam in inhmang tah a, tu ruok hin chu in thlarau Vengtu le Hotu kuoma chun in hung kir nawk tah a nih.
←  1Peter (2/5)  →