1Peter (1/5)  →
1. Kei Peter, Isu Krista tirko hin Ponto ram dam, Galati ram dam, Kapadokia ram dam, Asia ram dam le Bithunia rama dam Pathien mi thlang um darhai chu chibai ka buk.
2. Pa Pathien hriet lawk anga thlang, Isu Krista thu awi ding le a thisena tleng fai dinga Thlarau sukthienghlimhai chu in nih. In chungah lunginsietna le inremna sukpungin um raw se.
3. Ei Lalpa Isu Krista Pathien le P� chu inpakin um raw se. Ama chun a zangaina ropui tak leia mithi laia inthoka Isu Krista a keithona zara chun beiseina hring nei dingin nun thar a mi pek a.
4. Ro se thei lo, hmel hem lo le chuoi thei lo hluotu ding ei lo ni tah a, chu chu in ta dingin vanah sie diem a ni tah.
5. In sandamna buotsaia um tah chu hun nuhnunga suklanga a um ni chenin, ama in ringna leiin Pathien thilthawtheina chun hum zing a tih.
6. Hi sawt naw te sung hin fiena le lungngaina tinreng in tuok a ni khomin, hlim takin um ro.
7. Chuong thil chu in ringna a tak ngeizie fiena ding a nih. Se thei rangkachak hman meia fie a ni chun, a neka hlu lem in ringna chu fie ding a ni hrim a nih, Isu Krista hung inlang phaa a hlir ni a, inpakna dam, ropuina dam le chawimawna dam in dong theina dingin.
8. Ama hmu lo khomin in hmangai a, tu hin ama in la hmu hri nawa chu in ring a, hlimna hril seng lo khopa nasain in sip a ni hi,
9. in ringna ra, in thlarau sandamna chu in hmu mek leiin.
10. Hi sandamna chungchang hi zawlneihaiin fimkhur taka zongin an sui a, in chunga Pathien thilpek, lunginsietna hung tlung ding chu an lo puong a nih.
11. Annia Krista thlarau um chun Krista tuorna le a hnunga chawimawia a um ding thu chu a'n hriettir lawk a, a hung ding le a hung dan ding chu hriet an tum hlak a nih.
12. Anni ta ding ni loin nangni ta dinga rongbawl an nih ti inhriettir an ni a, vana inthoka tirh Thlarau Thienghlim hmanga in kuoma Chanchin Tha hriltuhai khan chu thu chu an hril ta cheu kha. Chuong thil chu vantirkohai chen khomin hmu ve an chak ngawi ngawi a nih.
13. Chuleiin, in lungril chu thilthaw dinga inpei diemin, mani inthunun unla, Isu Krista hung inlang huna lunginsietna vura in um ding chu beisei tlat ro.
14. Nau thu awi thei anga umin, kha hmaa in mawl laia chakna suol in zui ang khan zui ta naw ro.
15. A kotu cheu a thienghlim angin nangni khom in chet dan iengkimah lo thienghlim lem ta ro.
16. Pathien Lekha thuin, "Kei ka thienghlim a, nangni khom in thienghlim ding a nih" a ti si a.
17. Paa in ko hi thlier bik nei lo, mi tin an thilthaw ang peia relpektu a ni leiin, hi khawvela in cham sung hin ama chu inza le ti dekin khawsa ro.
18. In thlatuhaia inthoka in dong sawng, nun dan invetthlak taka inthoka thil se thei tangkaruo le rangkachaka intlan in ni naw a,
19. beramte hmel hem lo le soisel bo, Krista thisen hlua intlan in ni lem ti in hriet si a.
20. Ama chu leilung insieng hmaa ruot lawk a ni a, tuta hun nuhnunga hin in ta dingin a hung inlang tah a nih.
21. Mithi laia inthoka keithotu le ropuina petu Pathien chu ama leiin in ring tah a, chuongchun Pathien chu in ringna le beiseina innghatna tak a hung ni tah a nih.
22. Thutak zawma in insukthieng tah leiin unauhai khom titak zetin in hmangai tah a, chuleiin lungril po poin inhmangai tuo ro.
23. Chi hmon thei ni loin, chi hmon thei lo Pathien thu hring le tloa inthoka pieng thar in nih.
24. "Mi po po hi ram hlo ang an na,An ropuina khom hlo par ang a nih; Hlo chu a hung vuoi a,A par chu a til a;
25. Lalpa thu ruok chu,Chatuonin a um zing"ti a ni si a. Chu ngei chu a nih Chanchin Tha an hril cheu kha.
      1Peter (1/5)  →