←  1Kings (9/22)  →
1. Solomonin LALPA tempul le ama in a nuom dan ang taka a bawl zo hnung chun,
2. kha hmaa Gibeon-a LALPA a hung inlar ang khan Solomon kuomah a hung inlar nawk a.
3. LALPA chun a kuomah, "Ka kuoma tongtaia i hung hni kha ka lo ngaithlak a, hi i Tempul bawl hi kumkhuoa ka hming umna dingin ka sukthienghlim ta a, chu taka chun ka mit le ka lungril fu zing hlak a tih.
4. "Nang khom i pa Davida anga lungril ringum tak le ngil tak puta ka hmaah i khawsa ve a, ka thupekhai po po zui a, ka thusuokhai le danhai po po i zawm chun,
5. i pa Davida kuoma, 'Israelhai lalthungpha hluotu ding mi invai ngai naw ti nih' tia ka lo tiem tah angin, Israelhai chungah i lalthungpha chu kumkhuoin suknghet ka tih.
6. "Amiruokchu, nang le i nauhaiin in mi nghatsan a, ka thupekhai le thusuokhai zawm lo a, pathien dang rong bawla in biek chun,
7. ka pek tah hi rama inthok hin Israelhai chu sukbo ka ta, ka hminga dinga ka sukthienghlim tah hi Tempul hi hnawl bok ka tih. Chu pha chun Israelhai chu hnam tin laia mi nuizatbur le hmusit hung ning an tih.
8. Tu hin hi Tempul hi ropui hlein inlang sienkhom, a fe pel taphotin maktia deusawin, 'Iengti lawm lawma LALPA an Pathienin hienga a ram le Tempul hi a thaw el am ning a ta?' la ting an tih.
9. Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta.
10. Solomonin kum sawmhni sungin LALPA Tempul le lal in chu a bawl zo a.
11. Chu sunga sidar thing hai, far thing hai le rangkachak a mamaw zat po po chu Tura lal Hiramin a tumpek vong leiin Solomon chun Galili biela khaw sawmhni a pek a.
12. Solomonin khuo a pekhai chu en dingin Hiram chu Turaa inthokin a'n thok suok a, a hmu chun a lung a awi naw hle a.
13. Hiram chun Solomon kuomah, "Ka unaupa, khuo i mi pekhai hi ieng ang khuo am an ni ta le?" a ta, a khuohai chu 'Kabulg ram' tiin a'n buk a, chu hming chu tu chen hin a la put zing a nih.
14. Chun, Hiram chun lal Solomon chu rangkachak kilogram sangli dang a thon nawk a.
15. Solomonin sinthawa a sor luihai chu LALPA Tempul le ama lal in le a in thuthai bawltu ding dam, Jerusalem kul dam, Hazor khuo dam, Megido khuo dam le Gezer khuo dam bawl tha dinga a sor an nih.
16. Gezer khuo chu Aigupta lal Faraw-in a hmain a run a, a lak a, a raw a, Kanan mi chenghai po po a that vong a, chu zoah a naunu, Solomon nuhmei a'n somtir a nih.
17. Solomon chun Gezer khuo chu a'n din thar nawk a. Beth Horon thlang hnung lem dam,
18. Baalat khuo le Israel ram thlalera Tamar khuo dam,
19. thil a siekhawmna khuohai, tawlailir le sakor a siena khuohai, Jerusalem le Lebanon le a op ram sunga bawl dinga a ti po po chu a bawl bok a.
20. Chun, Israel mi ni ve lo, Amor mi hai, Hit mi hai, Periz mi hai, Hiv mi hai le Jebu mi la um sun hai,
21. chuong mihai thla, Israel mihaiin an sukchimit thieng lohai chu an nih Solomonin a sor luihai chu, tu lai chena an thaw dan ang hin.
22. Israel mihai ruok chu Solomonin suokah a siem ve naw a, sipaia dam, sorkar thoktua dam, ofisar-a dam, kaptena dam, a sakor tawlailir le sakor chung chuong mi kawmandara dam a hmang thung a.
23. Chuonghai chu Solomonin in bawl prawzek-hai chunga hotu bik le sinthawhai vengtu mi zanga le sawmnga a ruoihai chu an nih.
24. Davida khawpuia inthoka Solomonin a bawlpek ina Faraw naunu a hung inson hnung chun a inthuthai khom chu a siem tha a.
25. Solomon chun kum tinin LALPA ta dinga maicham a siema chun pumraw thilhlan le inremna thilhlanhai chu voi thum inhlanin, LALPA hmaa chun rimtui rawin a'n thawi zie a, tempul danin a phuthai chu a hraw kim hlak.
26. Lal Solomon chun Edom rama Elath bul, Agaba litengsawla um Ezion Geber-a chun long ruol a'n siemtir a.
27. Hiram chun a longpu ruol, tuinfinrieta che thanghai chu longa Solomon siehlawhai chu thangpui dingin a tir a.
28. Chuonghai chu Ofir-ah an fe a, rangkachak kilogram singkhat le sangli chuong an hung hawn a, Solomon an hung pek a.
←  1Kings (9/22)  →