←  1Kings (8/22)  →
1. Davida khawpui, Zion-a inthoka LALPA Thuthlung Bawm chu Tempula son dinga hung zawn tung dingin Solomon chun Israel upahai, pahnam tina luhai le sungkuo tina luhai chu a kuoma hung inlang dingin Jerusalemah a ko khawm a.
2. Israel mi po po chu thla sarina, Ethanim thlaa kuta chun Solomon kuomah an hung inkhawm a.
3. Israel upahai an hung tlung chun thiempuhai chun Bawm chu an zawn a.
4. LALPA Bawm an zawn ruol chun Intuokna Puon in le a hmangruo le bur le bel po po chu thiempuhai le Levi chia mihai chun an zawn sa bok a.
5. Lal Solomon le a kuoma Israel mi pungkhawm po po chu Bawm hmaa chun an fe a, beram le bawng tam tak, a zat inchik seng lo le tiem seng lo chun an inthawi a.
6. Thiempuhai chun LALPA Thuthlung Bawm chu a umna ding, tempul sungril, Hmun Thienghlim Taka chun an lak lut a, cherub thla zar hnuoia chun an sie a.
7. Cherubhai chun Thuthlung Bawm chungah thla an zar a, an thla chun Bawm le a zawnfung chen chu a zar khum a.
8. A zawnfung hmawr chu Hmun Thieng Tak kotkhara inthokin hmu thei a na, puo tienga inthok ruok chun hmu phak a ni nawh; chuong ang chun tu chen hin a la um zing.
9. Aigupta rama inthoka an suok hnunga LALPAN Horeb tlanga Israel thlahai kuoma thu a thlung laia Mosien LALPA Thuthlung inziekna lungphek pahni a sie chauh naw chu Bawm sunga chun ieng dang khom a um nawh.
10. Chun, thiempuhaiin Hmun Thienghlim Tak an suoksan charin LALPA in chu sumin a hung inkhum ta mup a.
11. Sum lei chun thiempuhaiin rong khom an bawl thei ta naw hiel a, LALPA ropuinain Tempul chu a sip si a.
12. Solomon chun, "LALPA chun sum sa mupah hung cheng ka tih i lo ti ta hrim a.
13. A nih, kumkhuoa i chengna ding, i ta dingin Tempul mawi tak el ka bawlpek ta che ie" a ta.
14. A hmaa chun Israel mi pungkhawmhai po po chu an ngir a. Solomon chun anni tieng a ngha a, mal a sawm tawl a:
15. "LALPA, Israelhai Pathienin bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin ama chu inpakin um raw se.
16. Ama chu, 'Aiguptaa inthoka ka mi Israelhai ka thuoi suoka inthok khan Israel hnamhai khuo laia a ieng khom hi ka hming umna ding Tempul bawlna dingin ka la thlang ngai naw a, amiruokchu ka mi Israelhai chunga roreltu dingin Davida hi ka thlang a nih' titu kha a nih.
17. Ka pa Davida khan Israel Pathien, LALPA hminga ding Tempul bawl a lo tum hlak a.
18. Sienkhom ka pa kuomah LALPAN, 'Ka hminga ding Tempul bawl nuomna lungril i nei hi i thaw tha ngot el.
19. Amiruokchu, nang chu ka Tempul bawltu ding i ni nawh, i naupa, i thalbea inthoka suok ngei chu ka hminga ding Tempul bawltu ding chu a nih' tiin a lo hril a.
20. LALPAN a thutiem chu a hung suknghet a, a tiem tah ang ngeiin kei chun ka pa Davida chu ka hung thlak a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a.
21. Chu taka chun Thuthlung Bawm siena ding hmun ka ruot a, chu Thuthlung Bawma chun LALPAN Aigupta rama inthoka ei pi le puhai a thuoi suok hnunga an kuoma thu a thlung, LALPA thuthlung inziekna lungphek chu a um a nih" a ta.
22. Solomon chu Israel mi pungkhawm po po hmuah LALPA maicham hmaa chun a ngir a, van tieng banin kut a phar a,
23. a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vana le hnuoi tieng leihnuoiah Pathien dang hrim an um nawh.
24. Ka pa, i siehlaw Davida kuoma bau ngeia thu i tiem chu i hung hlen a, chu chu voisuna kan hmu hi a nih.
25. "Tu hin aw LALPA, Israelhai Pathien, ka pa Davida kuoma, 'Ka mithmua i um dan anga i thlahai khom ka mithmua fimkhur taka an um ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngen che.
26. Aw Israelhai Pathien, ka pa Davida kuoma thu i tiem kha hung intlungtir ngei rawh.
27. "Amiruokchu, nang Pathien meu chu hnuoi mihai lai i cheng nuom tak tak ding am a ni? Vanhai, van insang tak hmanin an dawl zo naw che a na, hi ka Tempul bawla lem hin chu i va hang inleng naw nasa zuol awm de aw!
28. Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngaithlapek hram rawh.
29. Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngaithlak theina dingin, hi Tempula hin sun le zanin mit inlen zing hlak rawh.
30. Hi hmun tieng hi nghaa i siehlaw le i mi Israelhai dawvan hung kaina chu lo ngaithlapek rawh. I chengna vana inthok chun lo ngaithla la, i hriet pha leh lo ngaidam hlak rawh.
31. "Mi tu khomin a tuolbawm poi a tawk a, inkham hiel a lo ngai a, hi Tempula i maicham hmaa thu inkham dinga a hung pha chun,
32. vana inthokin lo ngaithla la, che nghal la, i siehlawhai chungah ro hung rel la, a thiem naw lem lu chunga chun a thil suol thawna maw chu intlaktir la, poi tawk nawtu chu thiem inchangtir la, a thiemzie chu namnghet rawh.
33. "Nangma lakah an suol leia hmelmahaiin i mi Israelhai an hne changin, nangma tieng hung ngha a, i hming lam a, hi Tempula hin ngaidam an hung inhni pha chun,
34. vana inthokin lo ngaithla la, i mi Israelhai suolna chu ngaidampek la, an pi le puhai kuoma ram i peka chun thuoi kir nawk rawh.
35. "I mihaiin i lakah thil suol an thaw leia vanin ruo hrim a'n surtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun,
36. vana inthokin lo ngaithla la, i siehlaw, i mi Israelhai suolna chu lo ngaidam la, an khawsak dan ding lampui indik kawkhmu la, i mihai rochana i pek rama chun ruo hung insurtir rawh.
37. "A ramah tam tla a, hripui dam, inlawngna dam le hmonna hri dam inleng a, khauthikthi le tuktulung dam intam a, an khuo khaw lai khom hmelmahaiin inhuol a, sietna le hri le hrai ieng khoma a tlak buok changin,
38. i Tempul tieng kut hung phar a, hrem an tuor dan chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun chang chun,
39. i chengna vana inthokin lo ngaithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a.
40. Chuongchun, kan pi le puhai kuoma ram i peka hin an um sung chun ieng lai khomin nangma ti nachang hung hre pha tang an tih.
41. "Ram dang mi, i mi Israel mi ni ve lo, sienkhom i hming leia ram hla taka inthoka hung pantuhai che khom,
42. (i hming ropui tak le kut hrat tak phara i thawpekzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun,
43. i chengna vana inthokin lo ngaithla la, ram dang mi thil hni ang chu lo thawpek la, chuongchun i mi Israelhai ang bokin khawvela hnam tinin i hming hung hrea tiin, hi ka Tempul bawl hin i hming a put ngeizie hung hre thei an tih.
44. "I mihaiin hmelmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun,
45. i chengna vana inthokin an tongtaina le hnina chu lo ngaithlapek la, an hnina chu lo pompek rawh.
46. "I lakah thil suol an thaw a, (tu khom suol lo an um bok si naw a), an chungah i lung a sen a, hmelma kutah i pek a, an ram tieng, hnai te amanih hla tak amaniah sala an thuoi pha,
47. sala an thuoina hmunah hung inngaituo suok a, insir a, an intangna rama inthokin hung ngen a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha,
48. an hmelmahai, sala thuoituhai rama inthoka lungril le thlaraua nangma tieng hung ngha kir a, an pi le puhai i pek ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun,
49. i chengna vana inthokin an tongtaina le hnina chu lo ngaithlapek la, an hnina chu lo pompek la,
50. i mipuihai thil suol thaw chu lo ngaidam la, an poi tawkna po po chu ngaidam la, sala mantuhai chu inlunginsiettir rawh;
51. i mi, i rochanhai, Aigupta rama inthoka rawtuina puma inthoka i hung thuoi suokhai an ni si a.
52. "I siehlaw hnina le i mi Israelhai hnina lakah i mit insim ngai naw la, an hung ko pha che lo ngaithlapek hram rawh.
53. Aw LALPA Pathien, Aigupta rama inthoka kan pi le puhai i thuoi suok laia i siehlaw Mosie hmanga i puong tah ang khan, i rochan dinga khawvel hnam po po laia i ser hrang bik an ni si a" tiin.
54. LALPA kuoma a tongtaina le hnina po po Solomonin a'n sam zo chun van tieng kut phara a dingthathuonna LALPA maicham hmaa inthok chun a tho a.
55. Chuongchun a ngir a, rawl inring takin Israel mi pungkhawm po po chu mal a sawm a:
56. "A thutiem anga chawldamna Israelhai petu LALPA chu inpakin um raw se. A siehlaw Mosie hmanga thil tha a lo tiem po po chu pakhat khom a'n khel nawh.
57. Ei thlatuhai kuoma LALPA Pathien a um hlak ang bokin ei kuoma khom um sien la, mi thlathlam loin mi maksan ngai bok naw raw se.
58. Ei thlatuhai kuoma thu a pek hai, ruot hai le dan hai chu zawm a, lungril po poa a lampuihai ei hraw theina dingin ei lungrilhai chu ama tieng innghattir raw se.
59. Ni tina ei mamaw ang peia a siehlaw chungthu le a mi Israelhai chungthua kut a rol theina dingin LALPA kuoma hnina ka'n tlunhai po po hi sun le zanin LALPA ei Pathien kuoma chun cham zing raw se.
60. Chuongchun, hnuoia mi po poin LALPA chu Pathien a nizie le ama naw chu tu khom an um nawzie hung hre thei tang an tih.
61. Amiruokchu, voisun ang hin a thuruothai le thupekhai chu nunpuia zawm tlat dingin in lungrilhai chu LALPA ei Pathienah a kop tlat ding a nih" tiin.
62. Lal le Israel mihai po po chun LALPA hmaah inthawina an inhlan a.
63. Solomon chun LALPA kuomah inremna inthawinain bawngchal singhni le sanghni le beram nuoi khat le singhni a'n hlan a. Chuong ang chun lal le Israel mihai po po chun LALPA tempul chu an inhlan a nih.
64. LALPA hmaa dar maicham chu pumraw thilhlan dam, bu le bal thilhlan dam le inremna thilhlana a thauhai inhlanna dingin a chin taluo leiin, chu ni ma chun LALPA tempul hma zawna tuolpuk lailung chu lalin a'n hlan thienghlim a, chu taka chun pumraw thilhlanhai, bu le bal thilhlanhai le inremna thilhlana a thauhai chu a'n hlan a.
65. Chu tum chun Solomon le Israel mipui pungkhawm, Hamath kotsuoa inthoka Aigupta ruom chena mi fe khawmhai chun kut chu an hmang a. LALPA ei Pathien hmaah ni sari an hmang phot a, ni sari dang an hmang zom nawk a, a rengin ni sawm le ni li sung zet an kut tlang a.
66. A tumtiek tuk chun mipui chu lalin a'n tintir a. Mipui chun lal chu mal an sawm a, LALPAN a siehlaw Davida le a mi Israelhai chunga a thatna chuong ang zozai a'n langtir lei chun lungril hlim tak le lawm takin an in tieng an kir tawl ta a.
←  1Kings (8/22)  →