←  1Kings (6/22)  →
1. Israel thlahaiin Aigupta ram an suoksana inthoka kum zali le kum sawmrietna, Israelhai chunga Solomon a hung inlala inthoka kum lina le a thla hnina, Ziv thlaa chun LALPA tempul chu Solomonin a bawl tan a.
2. Solomonin LALPA tempul a bawl chu a dung meter sawmhni pasaria sei, a khang meter kuoa lien, a'n sangzie meter sawmpathum le centimeter nga a nih.
3. Tempul tuolpuk bathlar chu hmun thienghlim tieta sei, a khang meter kuoa lien a na, tempul kota inthok chun meter li le a chenve a sor dawk a.
4. Tempul banga chun tukver, a puo tieng para a sung tieng inzui chi, a siem a.
5. Tempul puo tieng, a hnung tieng le a sir ve vea chun a huol tuokin tempul bang ringsanin pindan sawng thum, sawng tin inkar chu meter hni le centimeter hnia insangin a bawl a.
6. A sawng hnuoi tak pindan chu meter hni le centimeter hnia lien a na, a sawng lailung chu meter hni le centimeter saria lien a na, a sawng chung tak chu meter thum le centimeter khata lien a nih. Tempul banga a kalkhang rol ngai loa sawng tin chu a hnuoi banga innghat thei dingin sawng tina tempul bang chu a hnuoia mi nekin a chunga mi chu inphan lem hreta siem a nih.
7. Tempul an bawl lai chun lunghai chu lung lakna hmuna ser sa vong hmang a ni leiin an bawl sungin tubo vuok ri dam, hreia thil tuk ri dam le hriemhrei ri hrim hrim tempul hmuna chun hriet ding a um nawh.
8. A hnuoi tak pindan lutna chu tempul sim tieng sirah a um a. A sawnga lawn kaina dingin kailawn inher kuol a um a, chuong ang bokin a sawng chunghnung tak kaina khom chu siem a nih.
9. Chuong ang chun tempul chu a bawl zo a, a chungah sidar kalkhang khangin chu chunga chun sidar thingphek a dang a.
10. Tempul bang ringsana bawl pindan sawng po po chu meter hni le centimeter hni senga insanga bawl a na, sawng tinah sidar kalkhang a hmang vong a.
11. Chun, LALPA thu chu Solomon kuomah a hung tlung a,
12. "Tempul chu i lo bawl zo ta a, ka thusuokhai zui a, ka thupek le danhai zawma i kengkaw tlat chun, nangma hmangin Davida kuoma ka thu tiem chu sukpuitling ka tih.
13. Israelhai lai cheng ka ta, ka mi Israelhai chu thlathlam ngai naw ning" a ta.
14. Chuong ang chun Solomonin tempul chu a bawl zo ta a.
15. Tempul sung tieng bang inthuona dingin sidar thingphek a hmang a, a tuonga inthoka a siling chenin thingphek a bel vong a, a tuongah far thingphek a pha a.
16. A chawr tieng kil tak meter kuo-a sei chu a tuonga inthoka a siling chenin sidar thingphekin a ping a, chu chu tempul sunga Hmun Thienghlimtak chu a nih.
17. Hmun Thienghlimtak lut hmaa pindan chu meter sawmpariet-a sei a nih.
18. Chu pindan sung tieng po po chu sidar thingpheka inthuo khum vong a na, chu taka chun um lim le par vul lai lim a ker a; lung hrim hrim inlang lo dinga arenga sidar thingpheka inkhum vong a nih.
19. Chun, LALPA Thuthlung Bawm siena dingin tempul sungrila chun pindan a buotsai a.
20. Chu pindan chu a dung meter kuo, a khang meter kuo le a'n sangzie meter kuo a na, rangkachak hlirin a'n luon khum vong a, chu taka sidar thinga siem maicham khom chu a'n luon khum bok a.
21. Chuong ang chun tempul sung tieng po po chu rangkachak hlir hlakin Solomon chun a'n luon khum vong a, pindan sungril tak lutna kotkhara chun rangkachak khaidiet a thlung a, kotkhar khom chu rangkachak hlira inluon khum vong a nih.
22. Tempul sung tieng cheina hrim hrim le Hmun Thienghlimtaka maicham khom chu rangkachaka inluon khum vong a nih.
23. Pindan sungrila chun oliv thinga siem cherub pahnih, meter li le centimeter li ve vea insang a sie a.
24. Cherub thla khing khat chu meter hni le centimeter hnia sei a na, a thla khing tieng khom meter hni le centimeter hnia sei bok a na, a thla ki hmawr ve ve inkar chu meter li le centimeter li a nih.
25. Cherub pahnina khom chu meter li le centimeter lia sei bok a na, cherubhai chu an insangzie le lienzie thuhmun char a nih.
26. Cherubhai chu meter li le centimeter lia insang ve ve an nih.
27. Cherubhai chu pindan sungril tak, Hmun Thienghlimtaka chun an sie a, thla an zar a, pakhat thla chun bang khing tieng a va tawk a, cherub pakhat dang thla khomin bang khing tieng chu a va tawk bok a, chu pindan lailung taka chun an thla ki ve ve chu an intawk a.
28. Cherubhai chu rangkachak tuia inluon an nih.
29. Chun, a sung tieng le puo tieng banga chun a vel tuokin cherub dam, tum thing dam le par vul lai lim dam a ker a.
30. Sung tieng le puo tienga tempul tuong po po chu rangkachak tuiin a'n luon a.
31. Chun, Hmun Thienghlim tak lutna dingin kotkhar tuok hni oliv thingin a siem a, kotkhar bieng chu kil nga nei a nih.
32. Oliv thing kotkhar pahnia chun cherub hai, tum thing hai le par vul lai lim a ker a, chuonghai chu rangkachak sut phekin a tuom khum vong a.
33. Tempul sung lutna kotkhar kawm chu kil li nei, kil tin inchen vong, oliv thinga siem a nih.
34. Chun, far thing hmangin kotkhar pahni a siem a, kotkhar tin chu thing phek hnia siem, kopzaa zom, kei thlep thei a nih.
35. Chuong kotkhara chun cherub dam, tum thing dam le par vul lai lim dam a ker a, chuonghai chu rangkachak sut phekin inruol takin a tuom khum a.
36. Tempul hmaa chun kotzawl sungril lem a siem a, lung insersuon thuo thum le sidar thingphek thuo khatin a'n huon a.
37. LALPA Tempul thut chu a kum lina, Ziv thla chun an rem zo a.
38. A kum sawm le kum khatna, thla rietna Bul thlaah tempul chu a rel dan ding ang takin iengkim chu zo fel a ni ta a. Kum sari zet a bawl a nih.
←  1Kings (6/22)  →