← 1Kings (5/22) → |
1. | Tura lal Hiram chun Solomon chu a pa Davida thlaktua lala hriek nal a ni tah ti a lo hriet chun, Davida le inngaina taka lo khawsa hlak a ni leiin Solomon kuoma chun palai a tir a. |
2. | Solomon chun Hiram kuomah hieng ang hin thu a thon kir a: |
3. | "Ka pa Davida kha a se vel kil tina mihai leh indoa a buoi leiin le a ke hnuoia a hmelmahai LALPAN a sie vong hma khat chun LALPA a Pathien hming chawitu ding tempul a bawl thei nawh ti i hriet a. |
4. | Tu ruok hin chu LALPA ka Pathienin sir tinah muongna a mi pek a, hmelma amanih le siet tuok amanih khom a um ta nawh. |
5. | Chun, LALPAN ka pa Davida kuoma, "I aia lala ka sie ding i naupa chun ka hminga ding tempul chu hung bawl a tih' tia a lo hril tah angin, LALPA ka Pathien ta ding tempul bawl ka tum a. |
6. | Chuleiin, Lebanon tlanga mi sidar thinghai kha mi phurpek dingin thu pe la, ka mihai chu i mihai lai thang veng an ta, i mihai hlaw chu i ti ang zat zat peng ka tih. Sidon mihai ang tluka thing phur thiem ve ka mihai lai tu khom an um nawh ti i hriet si a" tiin. |
7. | Hiramin Solomon thucha a lo hriet chun a lawm hle a, "Hi hnam ropui tak chunga roreltu ding nau var Davida kuoma petu LALPA chu voisun hin inpakin um raw se" a ta. |
8. | Chuongchun, Hiram chun Solomon kuomah, "I thu mi hung incha kha ka lo hriet a, sidar thing le far thing chu i mamaw ang ang hung peng ka ti che. |
9. | Ka mihaiin Lebanon tlanga inthokin tuipuiah hung tol thlang an ta, thakna ding hmun i tinaah pumin hung intol thlaktir ka ta, chu taka chun sut an ta, i lo lak pei ding a nih. Nang khomin ka sungkuohai hi fak ding pein ka insung mamaw i lo phuhruk ve ding ni naw nim" tiin thu a thon a. |
10. | Chuong ang chun sidar thing le far thing chu Solomon mamaw ang peiin Hiram chun a pek a. |
11. | Solomon khomin Hiram le a sungkuohai fak dingin huit beiphit metric tonb sanghni le oliv hriek tha chi litar nuoi li a thon a, chu chu kum tina Solomonin Hiram a pek hlak dan chu a nih. |
12. | LALPAN a tiem angin Solomon chu varna a pek a. Hiram le Solomon chun inlaichinna tha tak neiin an inkarah inremna thu an thlung a. |
13. | Lal Solomon chun Israel ram sungah sinthawa sor lui mi singthum a nei a. |
14. | Chuonghai chu thla khat peia inthlak dingin tum khatah mi singkhat pei Lebanon-ah a tir a, thla khat zoah an hung kir a, thla hni sung anni in tieng an um a. Chuonga sinthawa sor luihai inrawituhai hotu chu Adoniram a nih. |
15. | Solomon chun thil phurtu mi singsari le lung sertu mi singriet tlanga chun a nei a. |
16. | Chuonghai baka chun sinthawhai inrawia an sinthaw keihruoitu mi sangthum le zathum a nei bok a. |
17. | Lal thupekin lung laknaa inthokin lung tha le lien tak tak, a chunga lung an serhai remna ding le tempul thuta hmang dingin an hung lak a. |
18. | Solomon le Hiram mistirihai le Gebal mihai chun lunghai chu serin, thinghai chu an at a, tempul bawlna dingin an buotsai a. |
← 1Kings (5/22) → |