←  1Kings (4/22)  →

---

1.

Solomon chu Israelhai po po chungah lalin a hung um ta a.

2.

Hienghai hi hotu lien a hnuoia thokhai chu an nih: Zadok naupa Azaria chu thiempu a nih;

3.

Sisa naupa Elihoref le Ahija chu lekha ziektu; Ahilud naupa Jehosafat chu chanchin rikawttu;

4.

Jehoiada naupa Benaia chu sipai kawmandar lu tak; Zadok le Abiathar hai chu thiempu;

5.

Nathan naupa Azaria chu biel hotuhai inrawitu; Nathan naupa bok Zabud chu lal thiempu le lal mi rawn;

6.

Ahisar chu lal in enkoltu; Abda naupa Adoniram chu sinthawa sor luihai hotu a nih.

7.

Solomon chun Israel ram pumpui chu biel sawm le pahniin a the a, biel tinah enkoltu larsap a sie seng a, chuonghai chun lal le a sungkuohai fak ding an ngaituo a, kum khata larsap tin mawphurna chu lal le a sungkuohai thla khat tlak ding hung tum seng a nih.

8.

Chuong larsaphai hming chu: Efraim tlangramah Ben-Hur;

9.

Makaz hai, Salbim hai, Beth Semes hai le Elon Bethanan khuo haiah Ben�Deker;

10.

Arubot bielah (Sukot le Heber khom huom sain) Ben-Hesed;

11.

Nafot Dor bielah Solomon naunu Tafat pasal Ben-Ahinadab;

12.

Tanak khuo, Megido khuo, Jezreel phai monga Zarethan khaw bula um Bet Shan biel po po, Bet Shana inthoka Jokmeam rala um Abel Mehola khuo chenin Ahilud naupa Baana;

13.

Gilead biela Ramo khuoah Ben-Geber (ama chun Manase naupa, Gilead biela Jair lobuk po po hai, Basan rama Argob biel po po le kula inhuon, kul kotkhara dar tluon hmang khaw ropui tak tak sawmruk chu a chang sa a nih);

14.

Mahanaim bielah Ido naupa Ahinadab;

15.

Naftali bielah Solomon naunu Basemat pasal Ahimaz;

16.

Aser le Alot bielah Husai naupa Baana;

17.

Isakar bielah Parua naupa Jehosafat;

18.

Benjamin bielah Ela naupa Simei;

19.

Gilead biel (Amorhai lal Sihon le Basanhai lal Oga ram po poah) Uria naupa Geber a nih.Hienghai po po baka hin a ram pum chunga hotu pakhat a la um bok.

20.

Judahai le Israelhai chu tuifinriet kama phaiphin anga tam an hung ni ta a, an fakin an dawn a, hlim takin an khawsa a.

21.

Solomon chun Eufretis vadunga inthoka Filistinhai ram chen le Aigupta ramri chena ram po po chungah ro a rel a. Chuong ram po pohai chun Solomon kuomah sie an hung chawi hlak a, a dam sung po po chu a khuo le tui an nih.

22.

Solomon ni khat khorsaw chu beiphit indip tak kilogram sangnga le beiphit pangngai kilogram singkhat;

23.

bawngchal, ina chawm thau sawm, bawngchal hlobeta chawm thau sawmhni, beram le kel zakhat; chu baka chun sakhi, sangai, sakhi chal le ar thau tak tak hai leh.

24.

Solomon chu Eufretis vadung thlang tieng ram po po, Tipsaa inthoka Gaza chena lal a na, a se vela ramhai po po leh inrem takin an khawsa a.

25.

Solomon dam sung po chu Dan-a inthoka Beersheba khuo chena inzar Judahai le Israelhai chu mani grep huon le theichang kung bula muong taka khawsa an nih.

26.

Solomon chun tawlailir hnuktu sakor siena in sang li le sakor singkhat le sanghni a nei a.

27.

Biel tina larsaphai chun an thaw hun dinga ruot thla sengah Solomon ta ding le a dawkana kiltuhai po po fak ding chu khorsaw an hung pek seng a, pek kim lo an nei ngai nawh.

28.

Chun, mi tinin an thaw zat dinga bituk ang pei chu a siena dinga ruot hmuna chun sakor tawlailir hnuktu sakorhai le sakor danghai fak dingin barli le bupawl an hung sie bok hlak a.

29.

Pathienin Solomon chu varna le sungril mit varna inthuk tak le thil hriet thiem theina zau tak, tuifinriet kama tiem seng lo tieuvut anga tam a pek a.

30.

Solomon varna chun khawsak mihai varna po po le Aigupta mihai varna po po khom a khum vong a.

31.

Mi po po nekin a var a, Ezra mi Ethan le Mahol nauhai Heman hai, Kalkol hai le Darda hai nek khomin a var lem a, a hming chu an se vela hnam po po lai a'n thang ta hle a.

32.

Thuvar sangthum a hril a, hla sangkhat le panga a phuok bok a.

33.

Thing le ruo le hna nei chi hrim hrim chanchin, Lebanon tlanga sidar thinga inthoka kul banga hung to suok husop chanchin dam chenin a hriet hne hle a; sa le vate chanchin dam, bokvaka invak chihai chanchin dam le nga chanchin dam mi a hril hlak a.

34.

Khawvela lalhai, Solomon varzie chanchin hre phak taphot chun a varna thu ngaithla dingin a kuomah mi an hung tir a.

---

←  1Kings (4/22)  →