1Kings (3/22)  

1. Solomon chun Aigupta lal Faraw leh inkungkeina siemin Faraw naunu chu nuhmeiah a nei a, a lal in ding le LALPA tempul a bawl mek lai chu an zo hma le kula Jerusalem a'n huon zo hma po chun a nuhmei chu Davida khawpuiah a sie a.
2. LALPA hminga tempul bawl a ni hri si naw leiin mipuihai chun hmun sanga hai inthawina an inhlan hlak a.
3. Solomon khom hmun sangaa hai inthawiin rimtui inhlan ve hlak sienkhom LALPA a hmangaizie chu a pa Davida thuruothai zawmin a'n entir a.
4. Chun, lal chu inthawina inhlan dingin Gibeon-ah a fe a, chu chu an hmun sang po po laia poimaw tak a nih. Chu taka chun Solomonin pumraw thilhlan sangkhat zet maichama chun a'n hlan a.
5. Gibeon khuoa chun zanah a mangin a kuomah LALPA a hung inlar a, Pathien chun, "I dit dit mi hni la, peng ka ti che" a ta.
6. Solomon chun, "I siehlaw, ka pa Davida kha i lakah ringum le fel takin a um a, lungril ngil tak a put leiin a chungah lunginsietna nasa tak i'n langtir a. I lunginsietna ropui tak chu inlangtir peiin voisun hin a lalthungpha chu a naupa i hung inhluotir pei a.
7. Tu hin aw LALPA, ka Pathien, i siehlaw hi ka pa Davida hmunah lalah i siem taa chu naupangte chauh ka la ni a, ka mawphurna hlen suok dan ding khom ka la hriet nawh.
8. I mi thlanghai tam tak, ieng zata tam am an nih ti khom hriet lohai chunga hin i siehlaw hi lalah i mi sie a.
9. Chuleiin, i mihai ro ka rel thiem theina dingin varna lungril le a sie a tha ka thlier thiem theina dingin hrietthiemna lungril i siehlaw hi mi pe rawh. Chuong naw chun i mi hieng zozaihai ro hi tu in am rel zo an ta?" a ta.
10. Solomon thil hni chun LALPA a suklawm a.
11. Chuongchun, a kuomah, " I ta dinga dam sawtna dam, hausakna dam le i hmelmahai thina ding dam hni loa rorel thiemna i hni leiin,
12. i hni ang tak chun thawng ka ta, varna le hriet thiem theina lungril peng ka ti che a, nangma ang hrim tu khom an la um ngai naw ang bokin tu khom um nawk ta ngai naw ni hai.
13. Chu baka chun i mi hni sa lo hausakna le hmingthangna khom pe sa bok ka ti che a, i dam sungin a tluk phak che lal tu khom um naw ni hai.
14. I pa Davidan ka lampui hrawa ka thu a zawm ang boka i khawsa ve chun dam sawtna khom peng ka ti che" a ta.
15. Chun, Solomon chu a thang har a, a mang a nih ti a hriet suok a. Chuongchun, Jerusalemah a kir nawk a, LALPA Thuthlung Bawm hmaa chun a ngir a, pumraw inthawina le inremna inthawina thilhlanhai chu a'n hlan a, chu zoah a khawnbawlhai po po ta dingin ruoi a the a.
16. Thubuoi nei nawchizor pahni hi lal hmaah an hung ngir a.
17. Pakhat lem chun, "Ka lalpa, hi nu leh hin in khata um hlak kan ni a, chu ina kan um lai chun nau ka nei a.
18. Ka nau a pienga inthoka ni thumnaa chun ama khomin nau a nei ve a. Keini pahni chauh naw chu kan inah mi dang tu khom an um nawh.
19. Hi nu nau hi zanah a thi a, a del hlum a ni nghe nghe a.
20. Zan rilah a tho a, i siehlawnu in lai chun ka bula zal ka nau chu a lak a, a zalpui a, a nau thisa chu ka bulah a hung inzaltir a.
21. Zingkar ka nau chu nene hang pek ka tum a, a thi sa a lo ni zing a. Zing khawvarah ka hang en chieng chun ka nau kha a lo ni ta der da'l a" a ta.
22. Pakhat lem chun, "Ni hlak a tim ie! A dam lem hi ka naupa a na, a thi lem kha i naupa a nih" a ta. A hmasa lem chun, "A teu naw em el! A thi hi i naupa a na, a dam hi ka naupa a nih" a ta, lal hmaa chun an insel ta rak el a.
23. Lal chun, "Hi nu hin 'A dam hi ka nau a na, a thi lem hi i nau a nih' a ta, kha nu khan, 'A thi hi i nau a na, a dam hi ka nau a nih' a ti tlat bok si a.
24. Chuleiin, kawlhnam hung la ro" a ta, an hung lak a.
25. Lal chun, "Naute kha a laiah tan bong unla, a chenve chu pakhat kha pe unla, a chenve dang chu pakhat kha pe ro" a ta.
26. Naute dam nu chun a nau chu a lunginsiet em em a, lal kuomah, "Pu, lunginsiet takin naute hi ama kha pe el ro. That lul naw ro" a ta. Pakhat lem chun, "A tu khomin chang bik nawng kan tih. Tan bong ro" a ta.
27. Chu phing leh lal chun, "Naute dam lai kha a hmasa lem kha pe ro, ama ngei kha a nu chu a ni kha" a ta.
28. Israel mihai po poin lal thurem dan an hang hriet chun maktiin an inza hle a, ro indik taka rel thiem dingin Pathienin varna a pek a nih ti an hriet a.

  1Kings (3/22)