←  1Kings (22/22)    
1. Kum thum sung Aramhai le Israelhai chu indo loin an um a.
2. A kum thumnaa chun Juda lal Jehosafat chu Israelhai lal hmu dingin a zu fe a.
3. Israel lal chun a khawnbawlhai kuomah, "Gilead biela Ramot khuo hi eini ta a nih ti hre zing sia ieng leia Aram lal kuta inthoka lapek loa ei um am a na?" a ta.
4. Chuongchun, Jehosafat kuomah, "Gilead biela Ramot khuo i mi hang beipui nuom ve naw maw?" a ta. Jehosafat chun Israel lal kuomah, "Kei le nang, ka mihai le i mihai le ka sakorhai le i sakorhai chu thang hmunkhat vong ei ni annawm" a ta.
5. Chun, Jehosafat chun Israel lal kuomah, "LALPA thu dam la nghak phot la tie" a ta.
6. Chuongchun, Israel lal chun zawlnei zali lai a ko khawm a, an kuomah, "Gilead biela Ramot khuo ka hang bei ding am bei naw ding?" tiin a'n don a. Anni chun, "Hang bei rawh, LALPAN i kutah peng a ti che" an ta.
7. Sienkhom, Jehosafat chun, "Hi taka hin LALPA zawlnei tu amani bek hang rawn ding an um naw maw?" a ta.
8. Israel lal chun, "LALPA mi rawnpek ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchang thu hi a se tieng ngot naw chu a tha tieng a la hril ngai hrim hrim nawh" a ta. Jehosafat chun, "Lalin chuong chun ti naw hram raw se" a ta.
9. Lal chun a thoktuhai laia mi pakhat a ko a, "Imla naupa Mikaia hang ko vat rawh" a ta.
10. Israel lal le Juda lal Jehosafat chu Samaria kul kotkhar bula hrizawla chun lal thuom inbelin, an lalthungpha ve vea chun an inthung a, zawlnei dang po po chun an hmaah thu an hril a.
11. Chun, Kenana naupa Zedekia chun thirin siel ki a siem a, "Hieng ang hin LALPAN a hril: 'Hi ki hin Aram mihai chu an bohmang chenin phir tlang i tih' tiin" a ta.
12. Chuong ang bokin zawlnei po po chun, "Ramot-ah hang fe la, hang hlawtling rawh khai, LALPAN lal kuomah a pek ding a nih" tiin an hril seng bok a.
13. Chun, Mikaia ko dinga an tir chun a kuomah, "Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a tha tiengin hrilpek ve raw khai" a ta.
14. Sienkhom Mikaia chun, "LALPA hringna salin ka hril hi, LALPAN a mi hril chauh chu hril thei ka tih" a ta.
15. An hung tlung chun lalin a kuomah, "Mikaia, Gilead biela Ramot khuo ka hang bei ding am bei lo ding?" a ta. Ama chun, "Bei la, hlawtling i tih, LALPAN lal kutah a pek ding a ni si a" a ta.
16. Lal chun, "Voi ieng zat top am LALPA hminga thutak chauh mi hril dingin thu ka'n khamtir ta che a?" a ta.
17. Mikaia chun, "Israelhai chu vengtu nei lo beram anga tlanga indar vong ka hmu a; LALPAN, 'Hienghai hin hotu an nei ta naw a, mi tin mani in tieng thlamuong takin inlawi diel raw hai se' a ti a nih" a ta.
18. Chun, Israel lal chun Jehosafat kuomah, "Ka chungthua chu a se tieng naw chu a tha tieng hrim hrim a hril ngai nawh ti ka hril ta che kha" a ta.
19. Mikaia chun a hril zom pei a, "Chuleiin, LALPA thu hi ngaithla rawh. LALPA chu a lalthungphaa inthung a, a chang tieng le voi tienga van mipui ngir khup lai chu ka hmu a.
20. Chun, LALPAN, 'Ahab hi Gilead rama Ramot khuoah hang fe a, ral kuta thi dingin tuin am thlem thlu thei a ta?' a ti a. Pakhatin hieng hin a ti a, mi dangin chuong ang chun an ti bok a.
21. Chun, thlarau pakhat hi a hung suok a, LALPA hmaah a ngir a, 'Keiin thlem thlu thei ka tih' a ta.
22. Chun, LALPAN a kuomah, 'Iengtin am?' a ta. Ama chun, 'Zu feng ka ta, zawlnei po po hmurah thlarau khelhlipah inchang ka tih' a ta. LALPA chun, 'Thlem hne ngei i ta, hlawtling bok i tih. Fe la, chuong ang tak chun zu thaw rawh' a ta.
23. Chuongchun, ngai ta, LALPA chun hieng i zawlneihai po po hmura hin thlarau khelhlip a sie a, siet tuok dingin i chungthu LALPA chun a rel tah a nih" a ta.
24. Kenana naupa Zedekia chun a hung hnai a, "Iengtik lai khan am LALPA thlarau chun i kuoma thu puong lem dingin iengtik khan am ie kei a mi suoksan chu?" tiin Mikaia biengah a ben a.
25. Mikaia chun, "Lo ngai zing rawh, pindan rila inbi dinga i fe ni pha leh la hrieng i tih" a ta.
26. Israel lal chun, "Mikaia hi khawpui optu Amon le lal naupa Joash kuomah thuoi unla,
27. hieng hin an kuomah, 'Hieng ang hin lal chun a tih: Hi mi hi lung inah khum unla, him taka ka hung kir nawk hma khat chu bei le tui chauh lo pe ro' a tih" tiin thu a pek a.
28. Mikaia chun, "Dama i hung kir nawk a ni hrim chun LALPAN keima hmangin thu a hril nawh tina ning a tih" a ta. Chun, ama vekin, "Nangni mipuihai, in rengin ka hril hi inchik ran ro" a ta.
29. Chuongchun, Israel lal le Juda lal Jehosafat chu Gilead biela Ramot khuo run dingin an inthok suok a.
30. Israel lal chun Jehosafat kuomah, "Insiem danglam ka ta, indonaa chun hang thang veng ka tih. Nang ruok chu i lal puon hin inchei zing rawh" a ta. Chuongchun, Israel lal chu a'n siem danglam a, indonaa chun a hang thang ve ta a.
31. Aram lal chun tawlailir khaltu hotu sawmthum le pahnihai kuoma chun, "Israel lal ti chauh naw chu mi chin amanih mi lien amanih tu khom bei naw ro" tiin thu a pek a.
32. Chun, tawlailir khaltu hotuhaiin Jehosafat an hmu chun, "Israel lal a ni ngei hi" tiin bei tumin an inhuol a, Jehosafat chu a hung khek suok ta a.
33. Tawlailira chuong hotuhai chun Israel lal a ni nawh ti an hriet phing leh an hnot lai chu an kirsan ta a.
34. Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kar takah a kap a. Ama chun a tawlailir khaltu kuomah, "Tawlailir kha kei her la, sipaihai laia inthok hin mi tlan suokpui rawh, hliem na tak ka tuok a nih" a ta.
35. Chu nia an indo chu an inbei nasa hle a. Lal chu a tawlailir chunga chun Aramhai tieng nghain a thung a, zan tieng chun a thi a, a hliemnaa inthoka thisen far chu tawlailir sunga chun a luong nguoi nguoi a.
36. Ni tlak tawm chun sipaihai kuomah, "Mi tin mani khuo le ram tieng kir nawk vong ta ro" tiin tlang an insam a.
37. Chuongchun, lal chu a thi a, Samaria-a chun an hung phur a, chu taka chun an phum a.
38. A tawlailir chu Samaria dila nawchizor ruol insilna hlak kama chun an sawp a, LALPA thu hrila a um ang ngei khan a thihai chu uiin an liek a.
39. Ahab inlal laia thil tlunghai le a thilthaw dang po po, saiha hmanga lal in a bawl le khaw kul a siemhai po po chu Israel lalhai inlal lai chanchin inziekna lekhabuah a chuong.
40. Chuongchun, Ahab chu a thlatuhai kuomah a chawl a, a naupa Ahazia chun a lalna chu a hung hluo a.
41. Israel lal Ahab inlala inthoka kum linaah Asa naupa Jehosafat chu Judahai chungah a hung inlal tan a.
42. A hung inlal chun kum sawmthum le kum nga mi a na, Jerusalemah kum sawmhni le kum nga ro a rel a. A nu hming chu Azuba a na, Silhi naunu a nih.
43. A pa Asa lampui hraw po po chu a hung hraw ve a, pensan der loin LALPA mithmuah thil tha a thaw hlak. Hmun sanghai ruok chu a sukbo naw a, mihaiin chuonga hai chun inthawiin rimtui an la'n hlan zing hlak.
44. Jehosafat chun Israel lal leh inremna a siem a.
45. Jehosafat inlal laia thil tlung danghai le a thil hlen suokhai le hnena a changhai chu Juda lalhai inlal lai chanchin inziekna lekhabuah a chuong.
46. A pa Asa inlal hnung khoma la um zing, pasal inzorna in po po chu a khar a.
47. A'n lal lai hin Edom ramah lal an um naw a, Juda lalin a ruot, lal aiawtuin ro a rel a.
48. Jehosafat chun Ofir-a rangkachak phur dingin sumdawng long ruol a siem a, sienkhom Ezion Geber-ah long siet an tuok leiin an fe ta nawh.
49. Chuong lai chun Ahab naupa Ahazia chun Jehosafat kuomah, "Ka mihai hi i mihai leh fe raw hai se" a tia chu Jehosafatin a remti nawh.
50. Jehosafat chu a thlatuhai lai a chawl a, Davida khawpuiah an phum a; a naupa Jehoram chun a lalna chu a hung hluo a.
51. Juda lal Jehosafat inlala inthoka kum sawmpasarinaa chun Ahab naupa Ahazia chu Samaria khuoah Israelhai chungah a hung inlal tan a, kum hni a'n lal a.
52. Ama chun LALPA mithmuah thil tha lo a thaw hlak a, a nu le a pa lam hraw dam, Nebat naupa Jeroboam, Israelhai thil suol inthawtirtu lam hraw dam chu a zui ve a.
53. A pa thaw ang taphot a thaw ve a, Baal rong a bawl a, a biek hlak a, LALPA, Israelhai Pathien chu a suklungsen hle a.
←  1Kings (22/22)