←  1Kings (21/22)  →
1. Chuong thil hnunga chun Jezreel mi Nabot grep huon le inzomin thil a hung tlung a. Chu grep huon chu Jezreel khuoa Samaria lal Ahab in bul ela um a nih.
2. Ni khat chu Ahab chun Nabot kuomah, "I huon hi ka in bul ela um a ni leiin thlai huona ka siem theina dingin mi'n changtir rawh khai. A aiah grep huon tha lem peng ka ti che a, suma i lak nuom chun a man ang hu i sak taphot chu peng ka ti che" a ta.
3. Sienkhom Nabot chun, "Ka puhai ro ka pek che chu LALPA khomin phal naw raw se" a ta.
4. Jezreel mi Nabotin, "Ka puhaia inthoka ka rochung ram chu pe thei nawng ka ti che" a ti lei chun Ahab chu hmai thum le lungsenin inah a'n lawi a, inhmur butin khumah a zal a, bu khom a fak nuom naw a.
5. A nuhmei Jezebel chu a va lut a, "Ieng tiziea chuong ang khopa lungril naa, bu khom fa ta lo hiel am i na? a ta.
6. Ama chun, "Jezreel mi Nabot ka biek a, 'I grep huon hi mi'n chawktir rawh. I nuom lem chun a aiin grep huon dang peng ka ti che' ka ti a. Ama chun, 'Ka grep huon chu pe thei nawng ka ti che' tiin a mi don a" a ta.
7. A nuhmei Jezebel chun, "Tu hin Israelhai chunga lal i ni naw maw? Tho la, bu fa la, hlim takin um rawh. Jezreel mi Nabot huon chu keiin peng ka ti che" a ta.
8. Chuongchun, Ahab hmingin lekha a ziek a, a suoi a nam a, Nabot umna khuoa upahai le mi lunhai kuoma chun a thon a.
9. Chu lekhaa chun, "Bu nghei thu lo puong unla, mipuihai lai Nabot chu a hmatawngah inthungtir ro.
10. A hmaah ama ep charah mi suol turu pahnih inthungtir unla, chuonghai chun mipui hmaah, 'Pathien le lal a hril siet' tiin hek raw hai se. Chu zoah, thuoi suok unla, deng hlum ro" tiin a ziek a.
11. Nabot umna khuoa upahai le mi lunhai chun Jezebel ti ang chun an thaw a.
12. Bu nghei ni an puong a, Nabot chu mipui hmatawnga chun an inthungtir a.
13. Chun, mi suol turu pahnihai chu an hung a, ama epa chun an inthung a, mipui hmaa chun, "Nabot hin Pathien le lal a hrilsiet' tiin an hek a. Chuongchun, khaw puo tieng an thuoi a, lungin an deng hlum a.
14. Chun, Jezebel kuomah, "Nabot chu lungin an deng hlum tah" tia hril dingin mi an tir a.
15. Nabot chu lungin an deng hlum tah ti Jezebelin a hriet chun Ahab kuomah, "Tho la, Jezreel mi Nabot grep huon, a'n chawktir phal naw che chu nei ta raw leh; Nabot chu a dam ta nawh, a thi tah" a ta.
16. Ahab-in Nabot a thi tah ti a hriet chun a tho a, Nabot grep huon chu nei dingin a fe thlak ta a.
17. Chun, LALPA thu chu Tisbe mi Elija kuomah a hung tlung a:
18. "Samaria-a Israelhai lal Ahab inbepui dingin fe thla rawh. Tu hin Nabot grep huonah a um a, nei tuma chu taka fe thla chu a nih.
19. A kuomah, 'LALPAN hieng ang hin a tih: Ama chu thatin a huon i neipek a ni naw am a ni?' ti rawh. Chun, a kuoma bok, 'LALPAN hieng ang hin a tih: Uiin Nabot thisen an liekna hmuna ngei hin i thisen khom hi an la liek ve ding a nih' ti rawh" tiin.
20. Chun, Ahab chun Elija kuomah, "Ka hmelmapa, i mi hung hmu ta khong khong maw!" a ta. Elija chun, "Ka hung hmu ta ngei che, LALPA mithmuah suol thaw dingin i lo inzor ta tlat si a.
21. Ngai ta, i chunga hin sietna intlungtir ka ta, sukbohmang dai ka ti che a, Ahab-a inthok hin nau pasal taphot chu, bawi ni sien ni naw sien la, sukbohmang vong ka tih.
22. Nangin i mi suklungsen lei le Israelhai chu thil suol i'n thawtir leiin Nebat naupa Jeroboam sunghai le Ahija naupa Baasa sunghai ang elin i sunghai siem ka tih' tiin.
23. Chun, Jezebel chungthu khom hieng hin LALPAN a hril: 'Jezreel khaw kul bulah Jezebel hi uiin la fang an tih.
24. Ahab sungkuoa mi khawpuia thi taphot chu uiin fang an ta, ram hnuoia thi taphot chu chungleng vatehaiin tlan an tih' tiin" a ta.
25. (A nuhmei infuipor leia LALPA mithmua thil tha lo thaw dinga inzor Ahab ang hrim hrim hi tu khom an la um ngai nawh.
26. LALPAN Israel thlahai hmaa a hnot suokpek Amor mihai ang bokin, ritlo theipatawpa riloin milem a biek a nih)
27. Chuong ang thu Ahab-in a hriet chun a silfenhai a pot thler a, saiip a sil a, bu a nghei a, saiip silin a zal a, zainem takin a um a.
28. Chun, LALPA thu chu Tisbe mi Elija kuomah a hung tlung a,
29. "Ka hmaa Ahab inngaitlawmzie hi i hmu am? Ka hmaa a'n pha hnuoi em leiin ama huna chu sietna intlungtir loin, a naupa hunah intlungtir lem ka tih" a ta.
←  1Kings (21/22)  →