←  1Kings (20/22)  →
1. Aram lal Ben-Hadad chun a sipai po po a khawm a, lal sawmthum le pahnihai chun an sakorhai le tawlailirhai leh an zui a, Samaria chu an inhuol a, an bei a.
2. Israel lal Ahab kuomah mi tirin thu a thon a, "Hi hi Ben-Hadad thu chu a nih:
3. I tangkaruo le rangkachak po po le i nuhmei le nauhai laia a tha tha chu ka ta a nih" tiin.
4. Israel lal chun, "Aw laltak, ka pu, i hril ang chun a ni hrim annawm, keima le ka nei po po chu i ta a nih" tiin a lo don a.
5. Chun, Ben-Hadad mi tirhai chu an hung nawk a, a kuomah, "Hi hi Ben-Hadad thu chu a nih: 'I tangkaruo le rangkachakhai le i nuhmeihai le nauhai ka lakpek ding che thuah mi ka hung tir ta a.
6. Amiruokchu, zingah hieng tik hun vela hin nang le iIthoktuhai po po in dap dingin ka thoktuhai ka hung tir ding a nih. In ro hlu po po hung lakpek an ti cheu a, tol hmang an tih' a ti a nih" tiin an hril a.
7. Israel lal chun a rama upahai po po chu a ko khawm a, an kuomah, "En ta u, hi mi hin thil tha lo thaw a hang tum nasat dan hi! Ka nuhmeihai le nauhai le ka tangkaruohai le rangkachakhai a hung ngen khan ka lo sel khom a ni bok si naw a" a ta.
8. Upahai le mipui po po chun, "Lo uksak naw la, a thil ngiethai chu lo remtipui bok naw rawh" an ta.
9. Chuongchun, Ben-Hadad mi tirhai kuoma chun, "Ka lalpa, lal kuoma chun hieng ang hin hril ro: 'I thil ngiet hmasa po kha chu i siehlaw hin thaw ngei a ta, tuta i hung ngiet ruok hi chu thaw thei naw nih' tiin" a ta. A donna chu hawnin Ben-Hadad kuomah an kir nawk a.
10. Chun, Ben-Hadad chun Ahab kuomah "Vei khat peia ka mihai kuoma sem ding Samaria-a hin pilvut ka hla vai chun, pathienhaiin an law law mi law hai sien, chuong neka nasa khom chun mi thaw raw hai se" tiin mi a tir nawk a.
11. Israel lal chun, " 'Sipai huoisenhai chu indo hma ni loin indo zo hnungah a nih an uong chauh hlak chu' tiin hung hril ro" a ta.
12. Ama le lalhaiin riebuka zu an dawn laiin chu thu chu Ben-Hadad chun a lo hriet a, a mihai kuoma chun, "Va bei ro leh" a ta, khawpui chu bei dingin an insiem ta a.
13. Chuong lai chun Israel lal Ahab kuomah zawlnei a hung a, "Hieng hin LALPAN a hril: 'Saw zozai sipai ruol saw i hmu am? Voisun hin sawnghai po po saw i kutah ka pek ding a nih, chuongchun, LALPA chu ka nih ti hre tang i tih' tiin" a ta.
14. Ahab chun, "Tuhaiin am an bei ding?" a ta. Zawlnei chun, "'Biel tin optuhaihai hnuoia sipai thlang khawmhaiin' ti hi LALPA thu suok chu a nih" a ta. Lal chun, "Tuin am hma a thuoi ding?" a ta. Zawlnei chun, "Nangin tie" a ta.
15. Ahab chun biel tin optuhai hnuoia sipai thlanghai chu a ko khawm a, an rengin zahni le sawmthum le pahni an nih. Chu zoah Israel thlahai po po chu a khawm a, an rengin sangsari an nih.
16. Sunchang lai an inthok suok a, Ben-Hadad le a thangruolpui lal sawmthum le pahnihai chu an riebukah zu an lo dawn rui a.
17. Biel tin optuhai thlang khawm sipai thothang thahai chun hma an tawn a, hma lawk dinga Ben-Hadad mi tirhai chun an lo hmu a, "Samari khuoa inthokin mi an hung suok" tiin an hril a.
18. Ama chun, "Inrem nuoma hung an ni leh a hringin lo man unla, indo dinga hung an ni leh a hringin lo man bok ro" a ta.
19. Biel optuhai thlang khawm sipaihai chu khawpuia inthok chun an suok a, an hnungah sipai nawlpui chun an zui a.
20. Mi tinin an bitum seng chu an that a, chuongchun Aram mihai chu an tlansie a, Israelhai chun an hnot a. Aram lal Ben-Hadad ruok chu sakor chungah chuongin, sakor chung chuong mi iemani zat leh a tlan suok a.
21. Israelhai lal chun hma a nor pei a, sakorhai le tawlailirhai chu an bei a, Aram mi tam tak an that a.
22. Chu hnunga chun Israel lal kuoma chun zawlnei a hung a, a kuomah, "Kum nawk thal hunah Aram lalin a hung do nawk ding che a ni leiin sipai la bel sauh sauh unla, thaw tulhai chu thaw ngei ro" a ta.
23. Chun, Aram lal hotuhai chun lal kuomah, "An pathienhai chu tlangram pathien an ni leiin eini nekin an hrat lem a nih. Phaizawlah inbeipui inla, mi ngam naw ni hai.
24. Chun, hi hi thaw ngei rawh: lalhai hi an rengin thlak vong la, anni hmunah ram optuhai sie la,
25. sipaihai sakor le tawlailir i chan zat char kha indin thar nawk la, phaizawlah inbeipui ei ta anni nek chun hrat lem ngei ei tih" an ta. An thu chu a pom a, an ti ang tak chun a thaw a.
26. A kum nawk thalah Ben-Hadad chun Aram mihai chu a khawm a, Israelhai do dingin Afek chen a hang tlung a.
27. Israel thlahai chu an pung khawm a, fak ding an sek khawm a, lo bei dingin an inthok a. Aramhai epa chun Israelhai chu hmun hniah thanghmun an khuor a. Aramhai le hrilkhi chun Israelhai chu kelte tlawmte bok khawm ang chauh an nih. Aramhai chu a ram phekin an inzar sip mup a.
28. Chun, Pathien zawlnei pakhat hi Israel lal kuomah a hung a, "LALPA chun hieng hin a hril: 'Aram mihaiin LALPA hi phaizawl pathien ni loa tlangram pathien ni dinga an ngai leiin, hieng zozai sipaihai hi i kutah peng ka ta, kei hi LALPA chu ka nih ti hung hrieng i tih' tiin" a ta.
29. Ni sari sung chu an inep tuo a, a ni sari ni chun an inbei ta a, Israel thlahai chun Aram mihai chu ni khat thilthuah nuoi khat an that a.
30. That banghai ruok chu Afek khaw sungah an tlan lut a, mi singhni le sangsari chu kul chimin a del hlum a. Ben-Hadad chu khawpui sungah a tlan lut a, pindan rilah a'n bi a.
31. A rawihai chun a kuomah, "Ngai ta, Israel sungkuoa lalhai hi zangai thei tak mi an nih ti kan hriet a. Saiip dierkeiin, hruola ring inkhitin Israel lal kuoma va feng ei ta, ei hringna a hla nuom el rawi mawh" an ta.
32. Chuongchun, saiip dierkei a, ringah hruol batin Israel lal kuoma chun an fe a, a kuomah, "I siehlaw Ben-Hadadin, 'Lunginsiet takin mi hla hram raw se' a tih" an ta. Ama chun, "A la dam a ni maw? Ka unaupa annawm" a ta.
33. Chuong mihai chun ngai tha takin, a lungril taka a hril sawnin, "Ni e, i unaupa Ben-Hadad ni e" an ta. Ama chun, "Va fe unla, hung thuoi ro" a ta. Ben-Hadad chu a hung suok a, a kuomah a hung a, tawlailirah a lo inchuongtir a.
34. Ben-Hadad chun a kuomah, "Ka pain i pa laka inthoka khuo a lo lakhai kha pe kir nawk vong ka ti che a; ka pain Samaria dawrpui hmun a siem ang bok khan nang khomin Damaska khawpuiah dawrpui hmun i siem ve ding annawm" a ta. Ahab chun, "Chuong anga thu i thlung phot chun infetir ka ti che" a ta. Chuongchun, a kuomah thu a thlung a, a'n fetir ta a.
35. Chun, zawlnei naupahai laia pakhat hin LALPA thuin a ruolpa kuomah, "Mi hang vaw raw khai" a ta, sienkhom a vuok nuom naw a.
36. Zawlnei chun a kuomah, "LALPA thu i awi naw leiin i mi liemsan charin sakeibakneiin lo seng a ti che" a ta. A fe suok charin sakeibaknei a'n tuokpui a, a lo se hlum ta a.
37. Zawlnei chun mi dang a hmu a, a kuomah, "Lunginsiet takin mi hang vaw ta leh" a ta, mi chun a vuok a, a vuok sil ta a.
38. Chuongchun, zawlnei chu a fe a, lampuia chun lal a lo inchan a, a mit chauh inlangin hmai a tuom a.
39. Lal a hung tlung chun a lo ko a, "I siehlaw hi indona runpui hmunah a fe a, mi pakhat hi a ral man thuoiin a hung a, ka kuomah, "Hi mi hi lo veng rawh, a tlan hmang hlauh chun a hringna aiah i hringna chan i ta, chuong a ni naw chun tangkaruo sangthum chawi i tih' a ta.
40. Chun, i siehlaw hi a khing khinga ka buoi vel sungin chu mi chu a lo bo ta dai a" a ta. Israel lal chun, "I chungthu chu nangin i rel zo der tah annawm" a ta.
41. Chu phing leh zawlnei chun a hmai tuomna chu a hawk a, lal chun zawlneihai laia mi a nih ti a hriet ta a.
42. Zawlnei chun lal kuomah, "LALPAN hieng ang hin a tih: 'Thi ngei dinga ka ti ta sa chu i'n suoktir leiin a hringna aiah i hringna, a mihai aiah i mihai chan i tih" a ta.
43. Hmai thum le lungdongin, Israel lal chu Samaria tieng a kir ta a.
←  1Kings (20/22)  →